Rokstu sagataveja: portals lakuga.lv

1. decembrī 16.00 stuņdēs Latgolys viestnīceibā “Gors” izskanēs pyrmizruode koncertizvadumam “Atīšona”, kū veidoj literate Ilze Sperga, dzīduotuoja Ieva Parša i pianists Rihards Plešanovs, informej “Gora” puorstuove Santa Kļaviņa. Literari-muzykalais koncertizvadums nūtiks pyrmajā adventa svātdīnē i, kai stuosta Ilze Sperga, byus “par leluokū suokumu, kas var byut sīvītis dzeivē – par juos bārna atīšonu”.

Koncertizvadums “Atīšona” ir pasuokumu serejis “Muzyka i vuords” nūslādzūšais pasuokums, kurā literari-muzykalā koncertizvadumā sasatiks dzīduotuoja Ieva Parša, literate Ilze Sperga i pianists Rihards Plešanovs. Izvadumā Ilzis Spergys prozys teksti meisīs ar Rutys Paideris, Jura Kulakova, Imanta Zemzara, Ievys Paršys, Alisis Rancānis, Andra Dzenīša i cytu komponistu solo dzīsmem i instrumentalū muzyku.

Ilze Sperga par koncertizvadumu stuosta: “Advents ir atīšona, gaismys gaideišona. Adventa suokums ir bazneicys goda suokums. “Atīšona” “Gorā” ir par leluokū suokumu, kas var byut sīvītis dzeivē – par juos bārna atīšonu. Muns stuosts, kas īt cauri itam koncertam ir par sīvīti, kas gaida sovu pyrmū bārnu. Jei ir nūsabeiduse, nūguruse, jei ir ceļā, partū ka nu sova tāva sātys, kū jei ir pamatuse, īt iz sova veira sātu, kura nazkod byus. Jai nav nikuo, tik ezeļs, gryutums i bailis. Reizē jai juoatrysynoj sovys attīceibys ar muoti, partū ka tod, kod sīvīte gatavejās dzemdēt, jei ir vystyvuok sovai muotei. Piec tam jei aizīs sovā dzeivē. Piec tam jei byus Jumprova Marija – vysu myusu muote. Itei jaunuo sīvīte, par kurū es rokstu, byus tei sīvīte, kam mes skaiteisim litanejis, iz kuo mes cerēsim, kū mes pīlyugsim, kas byus vydutuoja storp mums i Dīvu, storp augstuokū. Niu tei ir atīšona.”

Beletus var nūpierkt Latgolys viestnīceibys “Gors” beletu sistemā internetā škārsteiklā i kasē, kai ari “Biļešu Paradīze” beletu tierdznīceibys kasēs i škārsteiklā.