Rokstu sagataveja: portals lakuga.lv

Rotko muzejs aicynoj dasaceit dorbus Latgolys regiona muokslinīku konkursa izstuodei “Vēlēšanās”, kas tiks nūdūta skateituojim 2025. gods pavasara sezonā, viestej informaceja muzeja sātyslopā.

Gribiešona (vieliešonuos) ir jiedzīņs, kas naprosa gara skaidruojuma. Ar tuo vysaidajim atvasynuojumim i sinonimformom mes izsokom attīksmi pret tū, kas mums ir teikams voi teikojams – līkam saprast, ka turim tū augstā vītā i gribim dabuot voi sagaideit.

Bārnam gribiešona (vieliešonuos) ir breinums voi sapyns, kurū gaideit voi ilguotīs pīpiļdeit. Muokslinīkam tei, dūmojams, ir atzineiba, breivs, augleigs dūmys liduojums voi varbyut muokslys tierga labvieleiba.

Atbiļdeigam pīaugušajam tei var saisteitīs ari ar vieliešonom, kam byutu juonas pozitivys puormainis voi uzlobuojumi. Taidā gadīnī vieliešonu rezultats ītekmej ari piļsūņa gribiešonys (vieliešonuos) pīpiļdejumu – roda gondarejumu, nūceju voi saguodoj viļšonūs. Kam tod, kad vieliešonuos vītā stuojās vieliešonys, atsaraisa dinamiska personeiguos i kolektivuos grybys i izvēlis saspēle, cylvāka individualajom gribiešonom i vydyskuo pasauļa diktatam sasadurūt voi saplyustūt ar uorejū, kūpejū reiceibu i atbiļdeibu.

Izstuode byus apsaverama Rotko muzejā nu 2025. gods 7. marta da 18. maja. Dasasaceit aicynuoti Latgolys regiona kulturtelpai pīdareigi muokslinīki. Dorbu viertiešonu i atlasi veiks Rotko muzeja veiduota žureja. Natiks pījimti dorbi, kas atkluoti agitej voi pauž simpatejis konkretam politiskam spākam.

Kab dasasaceitu izstuodei, da 2025. gods 13. janvara 24.00 stuņžu juoaizpylda dasacejuma anketa. Informaceju par atlasis rezultatim izstuodis reikuotuoji nūsyuteis da 19. janvara. Izstuodei pījimtī dorbi iz Rotko muzeju juonūguodoj da 24. februara.