Rokstu sagataveja: portals lakuga.lv

Šudiņ ir Katrīnys dīna, kū kotru godu svietej 25. novembrī i kas īzeimoj rudiņa dorbu nūbeigšonys laiku. Katrīna tautys ticiejumūs atsakluoj kai lūpu – vušku i kozu – aizguodne. Ti ir sīvīšu svātki, saisteiti ari ar laika vāruošonu i pareguošonu. Ituos nedelis īsacejumus sagatavejuse ituo vuorda volkuotuoja – Lūznovys pogosta kulturys centra kulturys pasuokumu organizatore i Rēzeknis nūvoda turysma informacejis specialiste Katrīna Grietiņa. Katrīna ari doncoj tautys dejis jaunīšu deju kolektivā “Jumalēni”.

Pi sābru ari juoaizīt

Koč ari bīži dzieržu Rēzeknis vacticeibnīku noma zvonus i munā saimē ir vacticeibnīki, leidz šam lyugšonu nomā natyku bejuse. Tok draudze saprūt, ka ir daguojs laiks plašuok īpazeistynuot ar vacticeibnīku kulturu, tradicejom i dzeivisveidu. Vacticeibnīku draudze ir kai nalels cīmats, kur var atsaslēgt nu kasdīnys steigys. Apmaklātuojim ir vareiba apsavērt i lyugšonu nomu, i muzeja ekspozicejis, kas atkluoj vacticeibnīku montuojumu. Tei ir vīta, kur atrast mīru i harmoneju. Ekskursejis var rezervēt, zvonūt 26354441. Adrese: J. Sinicina 6, Rēzekne

Tyvuok dobai

Naseņ Sarkaņkolnā tyka atkluota jaunizveiduotuo dobys styga – breineiga vīta, kur aizbēgt nu kasdīnys. Ap Sarkaņkolnu ir sataiseitys stygys, kur ir informacejis stendi i atpyutys vītys. Myusu dīnuos, kod kasdīnys rytmys ir tik straujs, mes eipaši nūviertejam īspieju pavadeit laiku dobā. Itei styga ir lobs variants tim, kas grib izbaudeit puorguojīņa sajiutu, bet nav laika garuokim maršrutim. Eipaši aicynoju šyupuotīs iz šyupeļu, kas pīduovoj breineigu skotu iz Adamovys azaru – breineiga vīta, kur atgiut elpu i ļaut sevi apbūrt dobai.

Doncuošonys vierpulī

Tautys dejis ir naatjamama munys dzeivis sastuovdaļa. Tuos dūd vareibu kai atsapyust, tai aktivi izapaust i uzastuot koncertūs. Tok reizem, pīsadolūt daņčūs, ir gryuts veļteit laiku cytu kolektivu uzastuošonys baudeišonai. Tik itymā nedeļgolā ar īplānuotu atpyutys breivdīnu laisšūs iz Pušmucovu, kab nūsavārtu kaidu kruošņu tautys deju koncertu i dabuotu īdviesmi. Ituos dejis na viņ motivej i īdvasmoj rodūši izapaust, bet ir ari breineigs veids, kai pavadeit vokoru tautyskā nūskaņā.