Rokstu sagataveja: portals lakuga.lv

Grupa “Latgalīšu reps” svātku gaideišonys laikā prīcynoj sovus klauseituojus ar jaunu singlu “Siļče kažukā”, viestej grupys snāgtuo informaceja. Dzīsme ir muzykals pīdzeivuojums, kas apvīnoj latgaliskū humoru i sevkuram pazeistamu svātku tradiceju sajiutu.

Grupys dalinīki Ivo Grigalis i Didzis Kozlovs stuosta: “Siļče kažukā i rosols vysim mums – kai latgalīšim, tai latvīšim kūpumā – asociejās ar zīmys svineibom, kūpā byušonu ar saimi i draugim, deļtam mums īguoja pruotā radeit taidu dzīsmi, kas īmīsuotu ituos vīnuotuos sajiutys. Tei ir dzīsme, kas savīnoj i roda leidzeigys emocejis naatkareigi nu tuo, kurā Latvejis voi pasauļa molā teik svieteiti Zīmyssvātki voi Jaunais gods.” Dzīsmis ideja asūt rodusēs pyrma diveju godu, kod grupa svineigā gaisūtnē gatavejusēs “Dod pieci” labdareibys koncertam.

Grupa “Latgalīšu reps” ir hiphopa duets, kurā apsavīnuojuši Ivo Grigalis i Didzis Kozlovs. Grupa tyka dybynuota 2017. godā, kab īdvasmuot jaunū paaudzi nūviertēt i saglobuot latgalīšu volūdu. Grupa dzīd latgalīšu volūdā, apvīnojūt hiphopu ar Latgolys kulturu, humoru i tradicejom.