Rokstu sagataveja: portals lakuga.lv

Folklorys kūpa “Vīraksne”, sasadorbojūt ar Daņču kruotivi, apkūpuojuse Atašīnis pusē vuoktūs daņčus. 2024. gods suokuos tyka izdūta būrtneica ”Atašienes danči. Moza beju, gonūs guoju’’, niu – publicāti 10 muzykys īroksti i 26 daņču video, informej Daņču kruotivis puorstuovs Sandis Zučiks.

Atašīnis daņču apkūpuošona nūtykuse nu 2019. gods. Itymā laikā ir apkūpuots montuojums, kū vuokuse Valentīna Mičule, tū publicejūt sovuos gruomotuos (“Vīraksne” (1992), “Rītava I” (2000), “Rītava II” (2001), “Rītava III” (2004)). Dejis atjaunuotys kai piec pīroksta, tai piec atmiņu, i itūgod Atašīnis daņču montuojums teik nūdūts plašuokai publikai.

Par Atašīnis daņču montuojumu stuosta folklorys kūpys “Vīraksne” vadeituojs Ingus Paeglis: “Atašīnis daņču īraksteišona beja eipaša nūtikšona kai “Vīraksnei”, tai vysai Atašīnis kūpīnai. Skaņu īrokstu studejā tyka īraksteitys dzīsmis. Koč i myusu folklorys kūpa pavasarī svieteis sovu 40. jubileju, itei beja myusu pyrmuo pīredze studejā. “Vīraksne” itūs daņču īraksteišonai ilgi i cīteigai gatavejuos. Fiļmejūt daņču video, tyka īsaisteiti ari cyti Atašīnis amatermuokslys kolektīvi – deju kolektivi “Teiči”, “Mūžīgais dzinējs”, “Zvirbuļi”. Vysi meklēja Atašīnis skaistuokuos vītys, kab tī varātu izdoncuot Atašīnis daņčus!”

Sovpus Daņču kruotivis vadeituojs Sandis Zučiks nūruoda: “Atašīnis daņču montuojums ir unikals Latvejis mārūgā. Ir cīši moz vītu Latvejā, kur tik lelā pyurā vuoktys vītejuos horeografiskuos nūtikšonys. Daži nu itūs daņču ir tykuši īmeiļuoti vysā Latvejā, kai “Atašīnis suseklis” i “Syla Jurs”. Ir eistyna prīca itūs daņčus paruodeit plašuokai publikai, eipaši, ka tū dora Atašīnis vysaidu paaudžu dzeivuotuoji. Ite juoizceļ Ingus i Madara Paegli, kas ir uzajāmuši itū montuojumu īdzeivynuot naskaitomūs mieginuojumūs ar doncuotuojim i muzikim.”

Daņču muzyku var klauseitīs ITE, izalosūt izpiļdeituoju “Vīraksne”. Daņču video pylnā garumā var vērtīs ITE.

Daņču muzykys īroksti radeiti ar Latgolys kulturys programys 2024 paleigu, kū nūdrūsynoj Vaļsts kulturkapitala fonda mierkprograma “Latvīšu viesturyskūs zemu atteisteibys programa” i bīdreiba “Latgolys regiona atteisteibys agentura”. Video īroksti radeiti, pasasokūt Vaļsts kulturkapitala fonda paleigam.