Rokstu sagataveja: portals lakuga.lv

Novembra beiguos Rogovkā, Nautrānu kulturys centrā, nūtyka eipaša Večerinka Latgolys nūvodu vydsškolānim ar mierki paplašynuot jaunīšu zynuošonys par Latgolu, popularizēt latgalīšu volūdys praktiskū lītuojumu, kai ari radeit jauku kopā byušonys pīredzi, informej Latgalīšu volūdys, literaturys i kulturviesturis školuotuoju asociacejis vadeituoja Veronika Dundure. Pasuokumu organizēja Nautrānu vydsškolys latgalīšu volūdys puļceņš kūpā ar puorejim vydsškolānim. Rogovkā īsaroda ostoņu Latgolys izgleiteibys īstuožu jaunīši: nu Aglyunys, Baļtinovys, Kuorsovys, Rekovys, Ruguoju, Varakļuonu vydsškolys, J. Eglīša Preiļu i Kruoslovys Vaļsts gimnazejis. Tuos beja izgleiteibys īstuodis, kuruos ir latgalīšu volūdys puļceni.

Večerinkā vaļdeja sirsneiba i jautreiba, kū veicinuoja sasadraudziešona, rūtalis, daņči i vysaidi konkursi, kas beja saisteiti ar Latgolys viesturi, tradicejom i kulturu. Kotram daleibnīkam beja īspieja izapaust, atkluot sovys zynuošonys i pīsadaleit vysuos aktivitatēs.

Eipaši pateikami beja redzēt, kai jaunīši sasadraudzej, īpazeist i izbauda latgaliskuos tradicejis. Večerinkā jaunīši izjuta kūpeibys sajiutu, īpazyna Rogovku. Pyrmuo  gostu nūstuošonys vīta beja cīma centrys, kur 12. klasis školāni Anete, Madara, Līga i Juoņs kūpā ar školuotuoju Viju Miščenko i Ilonu Punāni izruodeja i leluos rogovys, pastuosteidami, kai radīs Rogovkys nūsaukums, i vītvuordu karti (taida ir vīneiguo Latgolā), i apgleznuotū sīnu ar Andryva Jūrdža, Pītera Miglinīka, Ontona Kūkuoja portretim, teicīnim i Smotra tiergu, pastreipuodami kai itūs personeibu nūzeimi Latgolys kulturviesturē, tai Smotra tierga tradiceju, kas tagad nateik turpynuota. Saistūšs beja stuostejums par bazneicys lelū zvonu Ontonu, kurū 2. pasauļa kara laikā draudze, lai zvons natyktu puorkausāts, nūglobuoja Gailumu azarā. Piec kara jis otkon atsagrīze zvanineicā.

Pasuokumu vadeja 12. klasis jaunīši Rūta, Edgars, Renārs i Rolands. Jī laseja Pītera Jurciņa, Ontona Kūkuoja, Annys Rancānis dzeju, kas veļteita Rogovkai i volūdai, aicynuoja nūdzīduot Rogovkys himnu – P. Jurciņa “Vuolyudzeiti”. Izgleiteibys īstuožu jaunīši īpazeistynuoja ar sovu školu, dzīduoja, repuoja. Vokora gaitā vysus prīcynuoja atraktivais jaunīšu deju kolektivs “Sprigači”, kū voda Ingūna Ludborža, kura ar Annu Garanču īvuiceja rūtalis i latgaliskūs masu daņčus. Vysim patika Rūtys sagataveitais latgalīšu dzīšmu konkurss, kurā vajadzēja uzminēt dzīsmi piec zeimiejuma, piec pīduovuotūs vuordu. Kur nu vēļ meikļu miniešona, vītu atpazeišona, kas atsarūn attīceiguos školys tyvumā.

Nautrānu vydsškolys 12. klasis školāni sajēme i atgrīzeniskū saiti nu gostu: izveiduotuos aptaujis rezultatus, kas līcynuoja, ka Večerinka beja izadavuse, ka itei tradiceja, kū aizsuoce rogovkīši, juoturpynoj. Jī sacynuoja, ka agruok beja vaira taidu pasuokumu i balleišu jaunīšim.

Galerejā: Večerinka Rogovkā. Kartenis nu Nautrānu vydsškolys arhiva