Rokstu sagataveja: portals lakuga.lv

Bolvu nūvoda Baļtinovys pogosta amaterteatris “Palādas” pārņ svieteja 25 godu jubileju. Par prīcu pošim i sovim skateituojim “Palādas” ar režisori Anitu Ločmeli prīškgolā sataisejuši jaunu izruodi – “Kū ļauds sacies!”

Pārnejuo gods golā pīdzeivuota jaunuos izruodis “Kū ļauds sacies!” pyrmizruode, tok jau 24. janvarī 19.00 stuņdēs Baļtinovys kulturys nomā sevkuram interesentam byus vareiba apmeklēt atkuortuotu izruodi. Īīšonys moksa – 3 eiro.

Luga viestej par kaidys sīvītis dzeivis stuostu nu 1960. da 2020. goda, par dažaidim liktinim i tūs nagaideitajim pagrīzīnim. Taipoš ari par sabīdreibā asūšajim stereotipim, ka sīvītei 24 godūs juobyut pracātai, a 25 godūs jau jei palīk par vacmeitu. Anita Ločmele aba Danskovīte stuosta, ka ideja par taidu lugu rodusēs jau paseņ, vystik teksta pīraksteišona prosa laiku.

“Lugā ir 5 % taisneibys i 95 % munys fantazejis”, i tei ir saisteita ar munu dzymtū pusi – Baļtinovu. Suokumā lugai beja drupeit biedeigs tāluojums, vystik poša deļ seve saprotu, ka navar jau dzeivuot tik ar osorom, deļtam puortaiseju, kab byutu vaira smīklu i prīcys,” tai režisore Anita Ločmele.

Par amaterteatri “Palādas”

Darbeiba aizasuoce 1999. godā kai dramatiskajam kolektivam, sovpus nu 2000. goda dorbojās ar nūsaukumu “Palādas”. Teatris pīsadola pasuokumūs vysā Latvejā, reizi godā nūteik ari kaidys lugys pyrmizruode. Teatrī dorbojās 18-20 akteru, teik īsaisteiti ari bārni. Slovanuokuos teatra izruodis ir saisteitys ar Ontana i Annis pīdzeivuojumim (“Ontans izaklaidej”, “Ontana tragedeja”, “Ontans i plāšnīki” i cytys), 2010. godā izruodi Valda Lūriņa režejā adaptēja Latvejis Nacionalais teatris ar nūsaukumu “Latgola.lv”, piečuok sekuoja ari “Latgola.lv-2”.