Rokstu sagataveja: portals lakuga.lv

Latgolys Fotografu bīdreiba Latgolys nūvoda fotoamaterus da ituo gods 30. apreļa aicynoj dasasaceit konkursam “Es mīlu savu foto”. Fotokonkursā drukuotā i elektroniskā formatā juoīsnādz na vaira kai treis Latgolā uzjimtys fotografejis.

Latgolys Fotografu bīdreiba sadarbeibā ar Preiļu piļsātys Golvonū biblioteku organizej Latgolys nūvodu rodūšūs fotografu fotokonkursu “Es mīlu sovu foto”. Konkursa mierks ir veicynuot Latgolys fotografu darbeibu i atbaļsteit rodūšū izaugsmi, apzynuot fotografus, kai ari izceļt i apbolvuot lobuokūs. Konkursā var pīsadaleit sevkurs fotoamaters nu Latgolys bez vacuma īrūbežuojuma. Konkursa rezultatā tiks sataiseita izstuode i drukuots katalogs. Vysi dalinīki augustā byus aicynuoti iz kūpeigu sasatikšonu izstuodis atkluošonā i apbolvuošonā.

“Ar itaidu pat nūsaukumu nazkod seņ jau organizieju fotokonkursus, tok niu jau paaudzis ir nūsamainejušys i golvonais mierkis ir izkristalizēt, atkluot i izceļt jaunūs Latgolys talantus rodūšajā fotografejā bez vacuma īrūbežuojuma, kam ari seniors var byut jauns talants. Golvonais, lai fotografs byutu nu Latgolys. Niu jau daudzi biļdej kai ar kameru, tai telefonu, tys nav svareigi, golvonais ir ceļš iz muokslu caur rodūšumu. Pīteik vysim feisbukuotīs i izškierdēt talantu. Izlosit sovus treis lobuokūs dorbus i īsniedzit konkursam. Tei ir breineiga vareiba īpazeistynuot ar sevi i turpynuot rodūšū ceļu ar leidzeigim cylvākim,” tai Igors Pličs nu Latgolys Fotografu bīdreibys par dasasaceišonu konkursam.

Nūsacejumi fotografeju syuteišonai i īsnēgšonai:

• Konkursants var īsnēgt na vaira kai treis fotografejis;
• Biļdem juobyut uzjimtom Latgolā pādejūs treju godu laikā;
• Konkursants var breivi izalaseit fotokompoziceju piec sovu īskotu;
• Fotografejuos var attāluot cylvāku portretus, ainovys, sātys tradicejis, kulturu, sporta i cytu žanru tālus;
• Vīna i tei poša fotografeja juoīsnādz divejūs veidūs – drukuota i elektroniska.

Praseibys drukuotajom biļdem:

• Biļdei juobyut kruosainai voi malnboltai A4 formatā, vysulobuok iz matāta papeira;
• kotrai drukuotajai fotografejai aizmugurē ir juonūruoda: fotografejis nūsaukums, fotografejis vīta (nūvoda voi pogosta nūsaukums), autora vuords, pavuorde, telefona numurs, e-posta voi posta adrese.

Praseibys digitalajom fotografejom:

• Fails JPG formatā, izmārā na mozuoks par 2 Mb.
• Fotografejis faila nūsaukumā voi atseviškā dalykumā juopīroksta fotografeju nūsaukums, autora vuords, pavuorde, telefona numers, fotografejis vīta (nūvoda voi pogosta nūsaukums).

Fotografejis juoīsnādz personeigi Latgolys fotografu bīdreibai da 2025. gods 30. apreļa (Raiņa bulvars 9, Preili, Preiļu nūv., LV-5301) voi syutūt tuos pa postu (posts zeimūgs: 25. apreļs) i elektroniski iz lauraplus@inbox.lv ar nūruodi: Konkursam “Es mīlu savu foto”.

Konkursa nūlykums ITE.