Kulturys īsacejumi nedeļai: sasatikt, pīraksteit i apsavērt
Rokstu sagataveja: portals lakuga.lv
Itūnedeļ kulturys īsacejumi ir gruomotu i raksteibys zeimē, par tim pasaryupiejuse Rēzeknis Centraluos bibliotekys vadeituoja Ruta Suseja, kura īsoka byut sabīdryski aktivim i īsasaisteit vītejuos kūpīnys nūtikšonuos.
Sasatikt ar autoru
Augstvierteigys literaturys cīneituojim itamā nedeļā – 24. janvarī 15.00 stuņdēs – Rēzeknis Centralajā bibliotekā īsoku apmeklēt sasatikšonu ar rakstnīku, vairuoku romanu autoru, Latvejis Literaturys goda bolvys laureatu Svenu Kuzminu. Kai īrosts, sarunu interesantu i cīši satureigu dareis literaturys eksperte i žurnaliste Liega Piešiņa. Ka ir interese, vari merkavuot bibliotekā pajimt kaidu Svena Kuzmina gruomotu i puorskaitet vēļ da pasuokuma!
Pīroksti kū sirds grib
Itamā nedeļā i vēļ da janvara mieneša beigu pīsadoli Rēzeknis Pīlāguotuos literaturys bibliotekys-informacejis centra aktivitatē “Ļauņ rūkai pasaceit, kū sirds grib!”. 23. janvars – Rūkroksta dīna. Itamā dīnā ir breineiga tradiceja: raksteit eisu viestuli meilam cylvākam, bet tys nūteikti juodora ar rūku. Naredzeigi cylvāki aicynuoti izmontuot bibliotekys pīlāguojumus – raksteit ar rūku (tāfeli i grifeli) Braila rokstā. Muns aicynuojums – roksti ar rūku LATGALISKI!
Apsaver foto muokslys izstuodi
Itamā nedeļā i da februara mieneša vyda Latgolys Kulturviesturis muzejā raugi apmeklēt fotografu Eduarda Utāna i Ivara Dauguļa fotoizstuodi “Diveji fotografi – dažaidi fokusi”. Fotografu kūpeigais fokuss – obeji ir riezeknīši. Eduarda Utāna objektivs itūreiz tviers sīvīti. Fotografejos attālotys vaira nakai 80 sīvītes. Varbyut tī esi ari tu? Ivara Dauguļa fotografejuos skatīņs pavārsts dobā i tuos breineigajā atkluosmē.
