Rokstu sagataveja: portals lakuga.lv

Dreizumā TV3 atsagrīzs projekts “Koru kari”, kura īprīškejuo – trešuo – sezona beja tuolajā 2013. godā. Itamā sezonā pīsadaleis 10 piļsātu kori, kuri sasaceņss par skaneiguokuo i talanteiguokuo gūdu. Kotrys kors, kurū vadeis pīredziejs i atpazeistams mentors, puorstuovēs sovu piļsātu i ceinēsīs na tik par žurejis viertiejumu, tok ari skateituoju atbolstu. Latgolu puorstuovēs Daugovpiļs tymsi zylais kors, tū vadeis muziks Arņs Slobožanins i kordirigents Jevgenijs Ustinskovs. Kora kruosa izvālāta par gūdu Latgolys karūgam.

“Koru karu” tīšraidis TV ekranūs suoksīs nu marta, pyrmais raidejums byus par tū, kai paguoja projekta atlasis. Sovpus marta ūtrajā nedeļā paradzāta pyrmuo tīšraide (precizs tuos datums i laiks vēļ tiks izziņuots). Daugovpiļs kora vadeituojs i grupys “Dabasu Durovys” liders Arņs Slobožanins stuosta, ka projekta fiļmiešonys asūt bejušys nadaudzys – tyka sagataveitys dalinīku vizitkartis, fiļmātys dalinīku atlasis i cyti mozuoki saturyski seikumi, sovpus puorejī raidejumi byus tīšraidis.

“Ir saguojs drupeit jūceigi – cytim nūvodim byus diveji voi pat treis kori, cikom Latgolai tik vīns. Nu organizatoru pusis par reizi tyka ari pasaceits, ka Latgolai byus vīns kors, tyka pīduovuoti piļsātu varianti – Rēzekne, Leivuons i Daugovpiļs. Tai kai teiri emocionali Daugovpiļs maņ ir tyvuoka piļsāta, es izavielieju tū. Izvēle saisteita ari ar tū, ka mieginuojumi nūtiks Daugovpilī, i leluokuo daļa kora dalinīku īt nu Daugovpiļs i tuos apleicīnis aba Dīnavydlatgolys pusis. Tok kūpumā kora dalinīki ir na tik nu Daugovpiļs, tok ari Preiļu i Leivuona, nu Rēzeknis i Baļtinovys, taipoš, puorsteidzūšā kuortā, vīna meitine Daugovpiļs korī ir ari nu Līpuojis.

Mieginuojumi suoksīs februarī i nūtiks Augšdaugovys kulturys centrā “Vārpa” pīktdīnēs i sastdīnēs, sevkurs interesents drūsai varēs īt gostūs,” stuosta Arņs Slobožanins. Jis ari atkluoj, ka kora atlasē konkurence naasūt bejuse lela, nu suokūtnejūs grybātuoju aiz streipis palykuši tik kaidi četri voi pīci. Daugovpiļs korī byus 16 dalinīki – devenis meitinis i septeni puiši, plus vadeituojs i kordirigents. Arņs stuosta, ka atlasē asūt guojs labi, jis ir prīceigs par kora dalinīku vokalajom prasmem.

“Es sova kora dalinīkim saceju – golvonais, lai tys ir breineigs pīdzeivuojums, naīspryngstam i izbaudom, tok ari struodojam,” tai Arņs Slobožanins.

Arņs ari pastreipoj, ka niu teik dūmuots tik par pyrmajim div raidejumim, partū ka, īspiejams, ka piec tūs Daugovpiļs kora darbeiba “Koru karūs” beigsīs, ka skateituoji nabyus gona aktivi bolsuošonā. “Mes, prūtams, ceram, ka paliksim projektā ilguok nakai divejis nedelis, tok ari apsazynojam, ka var byut vysaiži. Pagaidom naatkluošu, kaidu taišni dzīsmi izpiļdeisim kai pyrmū, tok tei byus ļusteiga latgalīšu dzīsme. Sovpus projekta nūsacejumi paradz, ka ūtrajai juobyut sovai dzīsmei, asu vīnu jau izavieliejs, tok pagaidom deļ intrygys ari naatkluošu, vys ari ūtrei dzīsme byus latgaliski,” doluos Arņs.

Vīns nu Daugovpiļs tymsi zyluo kora dalinīku byus ari Preiļu nūvoda kulturys i turysma puorvaļdis pasuokumu producents i kapelys “Augusti” vadeituojs Oskars Bierzeņš. Jis pīmiņ, ka laikūs, kod īprīškejuos sezonys ruodeja TV, tys beja juo meiluokais raidejums, tok tymā laikā Oskaram vēļ nabeja ostoņpadsmit godu i deļtam ari navarēja pīsadaleit. Tok jau tūlaik ar draugu Matīsu Lojānu tyka nūrunuots – ka vēļ byus taida vareiba, tod obeji dasasaceis. Tai ari saguoja, ka niulejā sezonā Daugovpiļs korī byus diveji kapelys “Augusti” puorstuovi – Oskars i Matīss. “Vīna līta, kū es pavysam nūteikti grybu itymā projektā vēļreiz pīruodeit – ka Latgola var uzvarēt,” entuziastiski soka Oskars. Vaicuots, kai jis plānoj īspēt vysus dorbus, Oskars pīzeist, ka koč ari jam ir gona nūslūguots grafiks, loba laika plānuošona ir vysa atslāgs. Tai ari daleibai “Koru karūs” jis pīkryta deļtuo, ka mieginuojumi plānuoti breivdīnuos, cikom fiļmiešonys – svātdīnēs. “Muna vīneiguo breivdīna – svātdīne – tiks veļteita tam, kab Latgola šmuki izskanātu vysā Latvejā,” tai Oskars.