Latgaliskuo identitate kai “kičeigs” efekts. Saruna ar Lāsmu Noviku

Latgaliskuo identitate kai “kičeigs” efekts. Saruna ar Lāsmu Noviku

Rokstu sagataveja: Marta Puzāka, portals lakuga.lv

“Selfmade latgalita” – tai par sevi soka atraktivuo i vysod smaideiguo Lāsma Novika. Jei ir satura veiduotuoja i influencere, kas aktivi dorbojās sociālūs medeju platformuos, par pīmāru, TikTok, kur jai ir vaira nakai 42 tyukstūšys sekuotuoju i 2 miļjoni atzeimu “pateik”. Lāsma aktivi pīsadalejuse vysaidūs projektūs i niu, 22 godu vacumā, sevi ir pylnveiduojuse par pošpuorlīcynuotu personeibu, kas kasdīnā īdvasmoj i prīcynoj sovus sekuotuojus ar humoru, dažaidom sadarbeibom, dorbu Eiropys Hitu Radejā (EHR) i daudzi kū cytu.

Lāsma apmeklej ari sasatikšonys ar Latgolys jaunīšim, kab daleitūs sovā pīredzis stuostā, duovuotu īdviesmi i vierteigys atzinis.  Vīna nu taidu reižu ir pi Viļānu jaunīšim, kur Lāsma pastuosta vaira par sova dorba kasdīnu i mierku sasnīgšonu.

“Tei meitine, kas beju īprīšk, nav tei Lāsma, kas niu siež ite”

Tai sarunu īsuoc Lāsma, pastuostūt par sovu dzeivis ceļu nu Rēzeknis iz Reigu. Lāsma Novika ir absolvējuse Rēzeknis Vaļsts 1. gimanzeju, piec tuo jai beja juopījam atbiļdeigs lāmums par sovys dzeivis i karjerys gaitom iz prīšku.

“Pabeidzūt 12. klasi, es nazynuoju, kū dareit. Tok tys ir tik normalai. Vosorā vēļ pastruoduoju par oficianti. Tymā laikā maņ vēļ beja sovs YouTube kanals – koč kū fiļmieju, taiseju, tok tys vyspuor nabeja nūpītnai.  Maņ golva šaudejuos iz tīni i tīni, vysu gribiejuos paraudzeit, tok vīnu konkretu lītu izdūmuot ir cīši gryuši.  Mama mani baksteja, paļdis Dīvam, i saprotu, ka tei varātu byut zūbuorstnīceiba. Tok par zūbuorsti vuiceitīs ir cīši duorgi, maņ tys nabeja pa spākam i zynuoju, ka vacuoki ari nanūmoksuos. Es naīmu nu superboguotys saimis. Muna saime ir vīnkuorša i forša, tok jī namoksuos 15 tyukstūšys godā, kab es tyktu par zūbuorstu.

Es atrodu Latvejis Universitatis Reigys 1. medicinys koledžu, kur īsnīdžu dokumentus, kab vuiceitūs par zūbuorsta asistentu. Maņ pošai beja baist nu zūbuorstu, tok gribieju struoduot tamā industrejā, jimtīs pa muti i redzēt, kas teirej i kas nateirej zūbus. Īsnīdžu dokumentus i tyku!

Maņ nabeja žāļ, ka pamatu Rēzekni. Vaira beju prīceiga, kam zynuoju, ka Rēzekne ir muna komforta sajiuta. Kod ir komforta sajiuta i nav ni par kū juodūmoj, tod vaira nav izaugsmis. Tū es jutu Rēzeknē. Nabeja, kur tuoļuok tīktīs, deļtuo sevi īsvīžu Reigā, kur maņ nav ni sātys, ni draugu, nikuo. Gaideju, kū maņ dzeive pīspielēs, kam ir juoatbreivoj lauks, kab ītu jaunys īspiejis.

Maņ daguoja dzeivuot kojuos. Daguoja sasamīrēt ar tū, ka tev juodola ustoba ar kaidu i nav vītys, kur izaplest, tok dzeivē ir juosasamīrej ar kaidim apstuoklim, kab byutu lobuok. Vacuoki skaiteja 30 eiro nedeļā. Nazynu, kai es ar taidu kuldys naudu izdzeivuoju. Studieju, īpazynu Reigu, koč kū suoču taiseit TikTokā, kam TikToks maņ ir jau nu Musically laikim, kur es kū dareju tikai just for fun (izklaidei – M.P.). Pyrmū pusgodu nikas taids eipašs nanūtyka, tok ūtrajā vuiceibu semestrī maņ daguoja meklēt praksis vītu. Atrodu, suoču struoduot, īmynu sovu dzeivis stidzeņu,” stuosta influencere Lāsma.

Lāsma Novika, foto Amanda Anusāne/portals lakuga.lv

Saceit “nui!” jaunom vareibom

Nūdzeivojūt Reigā aptyvai godu, Lāsmai beja izaveiduojuse kasdīnys rutina, kas ruodejuos vysai garlaiceiga. Tok kaidu dīnu Lāsma TikTok platformā pamaneja dasasaceišonu jaunam projektam – vītejam realitatis šovam “The B Team TikTok māja”. Šova mierkis beja īsaisteit 10 drūsmeigus jaunīšus, kuri ceineitūs, kab palyktu par ītekmeigim influencerim. Šova vadeituoja beja Elīna Pakalne, niu Elīna Zute – Latvejā plaši pazeistama digitaluo satura veiduotuoja i socialūs teiklu personeiba ar boguotom zynuošonom. Koč i suokumā beja švuorbys, Lāsma vystik sasprīde paraudzeit, i tys beja lāmums, kas īvierzeja dzeivi cytuos slīdēs.

“Maņ beja taids: “Nu kurs mani jims? Kurs jims itū latgalitu, kura īt nu Rēzeknis?” Tod es suoču dūmuot – nu, voi maņ gobols atkriss, ka es dasasaceišu? Nā! Aizpiļdeju tū dasacejumu dīzgon vīnaldzeigai, nūsyuteju i aizmiersu. Paguoja kaids laiks, i maņ atguoja ziņa, ka ir juoīt iz kastingu. Maņ ruodejuos – kas tys par kastingu? Maņ ir baist, es naīšu! Es palikšu zūbuorstnīceibā, studejuos. Bet tod suoču dūmuot, ka juoizmontoj vareiba, deļkuo nā?

Tei ir muna atziņa – juosoka “nui”! Nasaglobojit nu vareibu, kuruos jums dzeive pīspielej, kam taidys byus, i tys, ka jius paraudzeisit, eistyn var maineit dzeivi. “The B Team” izmaineja munu dzeivi. Tys ir kai pagrīzīņs piļneigi iz pretejū pusi.

Aizguoju iz kastingu. Tei beja pyrmuo fiļmiešonuos munā myužā pret taidom miļzeigom kamerom, nūpītnim cylvākim. Mums saceja sagataveit kaidu hobeju. Es muocieju špagatu. Špagats mani vysod izgluob (smejās). Es beju vyspuor napuorlīcynuota sevī. Kab jius zynuotu, es vyspuor asu introverts. Es vīnkuoršu asu īsavuiciejuse kuopt puori sovom bailem. Sevkurs introverts var byut ari ekstraverts, ka jis struoduoj ar sevi i stuojās preteimā sovom leluokajom bailem.

Man prīškā siež Elīna, Kristaps Zutis – žostkijs boksers, cylvāks ar lelū C burtu, i Edgars Bāliņš (komiks – M.P.). Tī ir nūpītni cylvāki, es navarieju nikuo normalai pasceit, tryuka elpys. Leluokuo izaguozšona munā dzeivē… Tok! Tys vyss aizguoja! Puorguoja bailis, paruodeju špagatu, vysim tys patyka. Tod paguoja kaids laiks i maņ atguoja viests, ka asu pajimta šovā!

Tai suocēs interesants periods munā dzeivē. Šova fiļmiešona ilga nedeļu. Tod es ari izavieru piļneigi cytaižuok – cyts runuošonys styls, cyta puorlīceiba. Beja izaicynuojumi, vuiceja par TikToku. Izturieju da beigu, tyku pi cīšys draudzeibys ar Elīnu i tiktokeri Alekseju Stepanovu. Jī obeji beja šova autori. Vāluok, kod ar jim puorrunuojom tū šovu, jī saceja, ka es asu tei, kas principā ari uzvarēja, kam puorejī dalinīki vaira nasadorboj itamā sferā. Jī saprota, ka tys nav jūs. Zynuošonys, par TikTok saturu, kū īdeve Elīna, golvonī atslāga punkti, kai struodoj socialī medeji – puorejī izsprīde naizmontuot ituos vareibys. Es vīneiguo attaiseju ituos durovys. Šovs īdeve maņ iz paplatis reikus, kurūs es vīnkuorši pajiemu i izmontuoju pareizi.

Šova “The B Team TikTok māja” komanda i dalinīki, foto Juris Rozenbergs/ izdevnīceiba “Rīgas Viļņi”

Izmontuot zynuošonys sovai izaugsmei

Piec šova Lāsma suoce vaira viereibys veļteit sovam saturam, sovam profilam. Ar laiku Lāsmu vys vaira suoce pamaneit atpazeistami cylvāki, pasaruodeja pyrmī sadarbeibys pīduovuojumi. Tymā laikā jai beja aptyvai sešys tyukstūšys sekuotuoju.

“Absolvieju studejis. Maņ beja izvēle, kū dareit tuoļuok. Beja dūma īt studēt tuoļuok par higienistu, tok beja švuorbys, kam tī otkon juomoksoj baiguos tyukstūšys. Nabeja taidys naudys, kaidu laiku vēļ turpynuoju dzeivuot ari kojuos. Piec satura, kurū es lyku, vyspuor navarēja pasceit, ka dzeivoju kojuos. Tū apspielieju vysaiž, pīmāram, jamūt kaidu sadarbeibu, nūīrieju vīsneicu par vysu pādejū naudu, kab safiļmēt sadarbeibu. Nu sevkurys bezizejis ir izeja, i es spieju tū saskateit.

Pyrmais muziks, kurs mani pamaneja, beja repers Deniss Stepanovs. Īsasaisteju juo video fiļmiešonā. Kotrys pīduovuojums maņ ruodejuos kai baiguo īspieja. Tai es tyku pi kontaktu. Tod vīnu dīnu maņ pīraksteja “Eiropys Hitu Radeja” aba EHR, kas ir tendāta iz jaunīšim, ar pīduovuojumu, voi es nagrybu ar jim dorbuotīs festivalu vosorā? Tei ir kampaņa, kur jī brauc iz festivalim i taisa saturu. Jim vajadzēja papyldspākus, i muna energeja jūs nanormali cepeja. Tymā laikā maņ beja 20 godu, es nikod dzeivē vēļ nabeju bejuse festivalā. Nikod! Vyspuor nabeja nūjausmys, kas ir festivals. Tok es pīkrytu, vyss beja veiksmeigai, jim nanormali patyka. Tod jī pīduovuoja dīzgon nūpītnu pīduovuojumu – dorbu radejā. Es naasu nikaids muzykys spečuks. Školā muzykys prīkšmetā es špikuoju (smejās). Guoju korī, tok nikuo nazynuoju par žanrim, beju nulle. Tys ir atguodynuojums, ka školā kotram prīškmatam ir juopīvierš viereiba, kam tu nikod nazyni, kod jums kaida īspieja var pasavērst. Tūlaik, prūtams, es nasceju, ka nikuo nazynu, bet, ka vyss ir forši, vysu var īsavuiceit. Tod, kod pīduovuoj īspieju, kas piļneibā izškaida tovu vizeju par nuokūtni, ir dīzgon baileiga sajiuta. Vysu laiku stresuoju i tod izdūmuoju, ka davai!

Suokums beja gryuts, tok ar sovu personeibu es vīgli integriejūs, kam beju es poša. Nikod naizalīcit par tū, kas jius naasat, lai voi kaidi minusi jums byutu. Tī cylvāki, kas jius gribēs pījimt i saskateit kaidu perspektivu, tū ari izdareis,” puordūmuos i pīredzē doluos influencere.

Lāsma Novika, foto Amanda Anusāne/portals lakuga.lv

Profeseja – digitaluo satura specialists

Itūšaļt Lāsma EHR stroduoj kai digitaluo satura specialists. Veidoj saturu kūpā ar latvīšu muzikim, kai ari eistynoj vysaidys kampanis, paleidz veiduot saturu ari cytim.

“Maņ nav diploma, vyss ir dabuots caur sovu pīredzi. Pyrmais nu muzyku, kurū es īraudzeju, beja Dons. Maņ treisēja rūkys, es kuopu uorā nu komforta zonys. Es ar Donu nikod dzeivē nauzfiļmātu tiktoku, bet man daguoja tū dareit, kam tys jau beja muns dorbs. Safiļmiejom smīkleigu tiktoku, vyss beja labi. Dons, taipoš kai i vysys cytys zvaigznis, ir taids pats kai mes.

Muna veiksmeiguokuo EHR kampaņa ir “Uzrauj hitu” – es īmu pi cylvāku i prosu, kas jim skaņ austeņuos. Kod cylvāks atbiļd, jis var sajimt 101 eiro. Itys projekts ir aizguojs miljonūs skatejumu. Tys ir muns mozais bebeits, ar kurū es jamūs, asu tuo seja,” ar lelu prīcu doluos influencere.

@latviesuhiti

Replying to @Lasma Novika #37 UZRAUJ HITU brauc ciemos pie JUMS! 💙 Turpinām svinēt Latvijas svētkus kopā!❤️ Sveicieni Siguldai! 🇱🇻 🎧Ja Tavās austiņās skanēs tikai latviešu mūzika, tad saņemsi 101 eiro – jo Rīgā Latviešu Hiti raida 101 FM frekvencē! 🎧TURKLĀT, ja klausīsies tieši EHR Latviešu Hiti radio staciju, saņemsi DUBULTĀ – 202 eiro! Un svētkos neiztikt bez gardumiem, tāpēc katrs dalībnieks tiks pie garda pārsteiguma no mūsu sponsora – vietējā veikala @Vietējais top! !😋 #KlausiesSavējos un tiec pie naudas!💙

♬ original sound – Radio Latviešu Hiti

Process da tuo, kū redzim socialajūs medejūs

Lāsma nūruoda, ka influencera profeseja nav vīgla i prosa cīši daudzi laika, rodūšuos energejis i pacīteibys. Pīmāram, eisa video rulleiša montaža jai videji var aizjimt pīcys stuņdis, poša fiļmiešona – treis stuņdis, tok da vysa tuo ir juogenerej idejis i juomeklej materiali, kas nav vīgli i prosa resursus.

“Ir juodūmoj uorpus kastis. Reizem var just, kod ir rodūšais deficits, izseikums nu tuo, ka vysu laiku, mums, infuencerim, struodoj golva. Smedzini ir poši svareiguokī. Golvā nūteik vysi scenareji, montažys i tt. Reizem ruodīs, ka cylvāki vyspuor nasaprūt, cik laika aizjam montaža. Kas tī – salepēt div video i vyss ir gotovs. Tai nav! Itūšaļt cīši atsateista montaža, cylvāki palīk slynkuoki. Jim vajag vysu laiku dinamisku video,” stuosta Lāsma Novika.

Taipoš Lāsma pastreipoj, ka na vyss, kū redzim škārsteiklā, ir patīss. Eipaši tys juozyna jaunīšu auditorejai, kam myusu dīnuos jaunīti var vīgli ītekmēt ar socialajim medejim. Ari Lāsma tū ir jutuse.

“Tys, kū jius redzit internetā, ir 1 % nu cylvāka dzeivis. 15 sekuņdis nu 24 stuņžu. Nikod naveidojit redzīni par cylvākim piec socialūs teiklu. Jis līk tū, kū jis grib likt. Naliks tū, ka jis dzeivoj kojuos. Nu varbyut kaids ari lyktu, bet es nagribieju, lai kaids zyna, i piec munu publikaceju tū vyspuor navar pasceit.

2021.- 2022. godā maņ dzeivē beja taids zamuokais punkts. Es beju pīsajāmuse svorā, nabeju apmīrynuota ar sovu izskotu. Vyspuor par sevi nasaryupieju kai fiziski, tai mentali. Tod beja vīna dīna, vīns uzjimts tiktoks, kur raksteju, ka grybu nūmiert. Nikod dzeivē napasceisit, bet tys beja smogs periods. Kas maņ beja nūtics? Vīnkuorši napatyka, ka dzeivoju kojuos. Ruodejuos, ka asu naveiksmineica, ka nikas nasaīs, varbyut vēļ kaids puiss nabeja pa vydam atbiļdiejs (smejās). Es beju tik nalaimeiga par vysu, i nivīns nav vaineigs pi tuo. Es beju jaunīte, beju sovā atteisteibys procesā. Taidi zamī punkti ir normali. Bez taidu mes navarim iztikt. Pa munam, kab tevi pacaltu vēļ augšuok, ir juobyut ari kritīņam. Piec tuos reizis es sasajiemu. Es pasceju: “Lāsma, vyss! Ej meklēt sporta zāli, suoc struoduot ar sevi, suoc kustētīs, pamaini parodumus, izslēdz cylvākus, kurī līk justīs voi nūvad tevi da taidu emoceju. Maņ beidzēs daudzys draudzeibys ar draudzinem, kam saprotu, ka myusu draudzeibys periods ir beidzīs. Reizem ir suopeigi kaidu pagaisynuot, kod beidzas draudzeiba, bet ticit maņ – taitod tam ir bejs īmeslis i par tū navajag puordzeivuot. Vysod īs jauni i vēļ foršuoki cylvāki. Ar sevi struoduot ir forši. Tei ir poša leluokuo vierteiba – dorbs ar sevi. Veļtit laiku sev. Jius asat golvonuo līta sovā dzeivē. Ka jius naīsaguļdeisit seve lobuokajā versejā, jius ari nasajussit forši, puorlīcynuoti par jaunom lītom,” stuosta Lāsma Novika.

Mentaluo + fiziskuo veseleiba = laimeigs cylvāks

Apkūpojūt Lāsmys pīredzi, kas vēļ ir tik suokys juos karjerys i dzeivis leiklūčūs, Lāsma ir izkristaliziejuse vairuokys byutyskys atzinis, kas paleidziejušys i ari īdvasmuos i padareis dzeivu lobuoku cytim.

“Filtrej, kam tu mīdz “sekuot” i nasaleidzynoj sevi ar cytim. Myusu dīnuos tam ir lela ītekme. Es ari poša jiutu, ka kaidys munys izvēlis ītekmej ari cytus cylvākus, kas maņ sekoj. Pi tuo maņ ir cīši juopīdūmoj, deļtuo izrevidejit tūs cylvākus, kuri jums dora nagativys emocejis. Sekojit tim, kas jius īdvasmoj. Socialī teikli ir izklaide. Cylvāki tī īt, kab dabuotu pozitivys emocejis. Izmontojit tū vysmoz lītdereigi, kab cylvāki jius īdvasmoj, īvuica koč kū.

Dorit tū, kas izstruodoj laimis hormonu. Kod ir bejuse švaka dīna, es aizeju iz zāli, tī izaluodeju i jiutūs kai septeitajūs dabasūs. Dejis – tei ari ir muna terapeja jau nu bierneibys. Nūsadorboju ar muokslys vyngruošonu. Tys maņ dūd mīru i varu atsaslēgt. Tys īvuica komunicēt, īsavuiceit kū jaunu, atkluot talantus.

Komforts nav izaugsme. Cikom jiusu dzeivē ir komforts, jums nabyus izaugsmis. Nikuo nasagribēs, i dzeive ari nikuo napīduovuos, kam nabyusit tam gotovi. Dorbs ar pruotu i dūmuošonu.

Defekts par efektu – muns defekts ir tys, ka navaru izrunuot burtu “ķ”, bet es tū pavieršu par efektu. Tys ir forši i daudzim tys suoce cepeit. Es ari izdūmuoju nūsaukumu “latgalita” i nasliepu tū, ka īmu nu Latgolys. Baigi kičeigi! I dzieržu, ka suoc izmontuot itū vuordu. Lītys vajag puorvērst par efektim, i tys struodoj.

Dorbs ar sevi – esi pateiceigs i pacīteigs. Lobys lītuos īt ar smogu dorbu, i reizem ir juopīsacīš ituos šaļts apstuokli, leidz jius varēsit skrīt i liduot pa dzeivi. Vyss nūteik ar īmesli, kab vāluok byutu cytaižuok.”


Komentari

Kalenders

Feb
19
Tre
11:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Feb 19 @ 11:00 – 12:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]