Rokstu sagataveja: portals lakuga.lv

Īsacejumus februara pyrmajai nedeļai īsoka izstuodis “Baba, kurū škārsteikla bārni vaira napīdzeivuos” golvonuo varūne Valentīna Priževoite. Jei īsoka nūbraukt iz sarunu vokoru par babom, nūsavērt kaidu kinu i puorskaiteit gruomotu.

Babys dzeivis nūzeimeiguos šaļts

7. februarī ar unučku braukšu iz Kuorsovys kulturviesturis centru “Līču mājas” klauseitīs sarunys par cytu babu dzeivē nūzeimeigom šaļtim, kai ari pastuosteit par sovejom. Ka tu nateic iz pasuokumu, tod nūbrauc voi pīzvoni sovim vacvacuokim i izvaicoj jūs, kab vaira izzynuotu sovys dzymtys viesturi.

Gruomotys skaiteišona

Es vysuvaira skaitu gazetys, tok pa reizei paskaitu ari kaidu gruomotu nu sova gruomotu plaukta. Aizguojušajā nedeļā puorskaiteju Juoņa Klīdzieja gruomotu “Duovuotuos dvēselis”. Vēļ maņ pateik paskaiteit par tautys medicinu izdavumā “Omītes Zālītes”. Īsoku ari tev paskaiteit kaidu gruomotu, žurnalu voi gazetu. Ka navari pasyuteit voi nūpierkt, tod vari nūīt iz biblioteku voi īsavērt sovu vacvacuoku plauktūs.

Kina

Zīmā ir mozuok dorba, partū var sēdēt pi televizora. Es parosti verūs serialus “Mīlas viesulis” i “Solījums”, kai ari zinis voi kinu, kurū ruoda televizeja. Īsoku ari tev nūsavērt kaidu kinu. Maņ cīši lela prīca par filmu “Straume”, partū tei varātu byut kaida Latvejā taiseita kina, par pīmāru, “Cylvāka bārns”, kurū bez moksys vari nūsavērt ITE.