Saleimāti kūpā ar sovu produktu. Saruna ar zeimyna “KUUP Coffee” saiminīkim Oskaru i Jolantu Maculevičim

Rokstu sagataveja: Laura Spundere, portals lakuga.lv
Sevkurys vītys voi regiona vierzeituojspāks ir uzjiemieji, kuri roda produktus i pakolpuojumus, tok reizē ari papyldu pīvīnuotū vierteibu konkretajam golamierkam. Īspiejams, “KUUP Coffee” ir vīns nu pādejūs godu zynomuokūs Latgolys zeimynu, i tuo atpazeistameiba turpynoj pīaugt. Kai stuosta poši saiminīki – gondreiž sešu uzjiemiejdarbeibys godu laikā topuši treis “K” – KUUP kai grauzdātova, KUUP kai konceptveikals i trešais “K” – dizaina veikals “Kabata”. “KUUP Coffe” na tik grauzdej kopeju, tok ir ari vīns nu ceļuotuoju īmesļu dastuot Rēzeknē, partū pārņ konceptveikals i kulturvīta sajēme Latgolys Turysma asociacejis goda bolvu kai “Goda turysma uzjiemiejs”. Saruna ar Oskaru i Jolantu Maculevičim par uzjiemiejdarbeibys izaicynuojumim i naīsadūšonom, latgaliskū vidi i konceptim.
Ambicejis i plani
Atsaverūt iz “KUUP Coffee” aizsuokumim – kaidys jums tūlaik beja ambicejis i sajiutys, kas varātu nūtikt nuokušajā pīcgadē? Obeji “KUUP Coffee” saiminīki Oskars i Jolanta pīzeist, ka tūlaik niulejais iznuokums nabeja pat sapynūs, tod pruotā beja tik sajiusma par nazynomū, par jaunom lītom, kuruos obeji da tuo nabeja raudzejuši dareit. “Ir paguojuši gondreiž seši godi, kai attaisejom sovu grauzdātovu, i vysu itū laiku var nūsaceiti daleit trejūs nūgrīžņūs – “KUUP” kai grauzdātova, “KUUP” kai konceptveikals i nu jau kluot īt trešais “K” – dizaina veikals “Kabata”,” stuosta Oskars. Jis ari pīzeist, ka tūlaik tys nazynomais beja leluokais dziniejspāks: “Mes bejom div cylvāki bez nikaidys pīredzis uzjiemiejdarbeibā, kuri sapynuoja, ka byus nazkas foršs. Laiks ir paguojs i tī nūgrīžni voi torta goboli, saucit kai gribit, saguojuši taidi pamateigi.”
Uzjiemiejdarbeibys izaicynuojumi
Oskars i Jolanta pīzeist, ka kasdīnā leluokais gryutums vystik ir nūdūkļu politika, kura vys prosa daudz laika dokumentu apstruodē i, prūtams, ari finanšu ziņā. “Kod mes suocem, nūdūkli galeigi nabeja myusu vaicuojumu vydā, vaira dūmuojom, kai tys izavērs, kai tys garšuos, kaidūs plauktūs stuovēs, kas byus lītuotuoji i kai izaceļt, kab napagaist cytu kopeja paceņu vydā. Godā, kod roduos “KUUP”, Latvejā beja pīci grauzdātuoji, mes byutu sastī, tūlaik sasatraucem, kai tod mes taidi mozeni pa vydu lelim spālātuojim,” atmiņuos doluos Jolanta. “KUUP” saiminīki stuosta, ka pa itim godim konkurēt palics smoguok, kam ļauds saprūt, ka pats izstruodis process nav tik sarežgeits, bet gryušuokuo daļa ir spēt produktu realizēt. Kopeja grauzdātuoju vydā ir i ari nav konkurencis, Oskars stuosta, ka vairums kopeja patārātuoju izavielej vīgli daīmamus lelveikalu kopeju veidus, sovpus tamā šaļtī, kod jī parauga kaidu nu specializātūs kopeju i nūgiun garšys atškireibys, jī naapsastuoj pi vīna ražuotuoja, tok turpynoj vaicuot ari piec cytu i izzynuot vysmoz Latvejis mārūga tiergu. “Mums ir klienti, kuri atsagrīž atpakaļ, ir ari taidi, kuri ar mums palykuši nu pyrmuos dīnys i ari niu reizi mienesī pasyuta kopeju, cytreiz brauc ari gostūs iz Rēzekni. Mums beja forša pīredze Zīmyssvātku tiergā Reigā, Kīpsolys hallē, kur kluot guoja piļneigi napazeistami cylvāki i vaicuoja piec myusu soldonumu. Jī atpazeist nūsaukumu i, koč ari nav bejuši pi myusu, zyna, ka ir ar soldonumi,” smaidūt stuosta Jolanta. “Tys rikteigi uzluodej, kod tu sateic napazeistamu cylvāku, bet jis zyna tovu produktu – tu ar sovu produktu asi saleimāts kūpā,” tai Oskars.
“Mes kaidu šaļti nabejom braukuši uorā nu sova “burbuļa”, i es eistyn beju puorsteigta, cik daudzi Reigā par mums zyna i ir bejuši gostūs. Beja daudz sarunu apmāram: “Voi jius zynit par myusu kopeji?” – “Nui, es pi jums beju,” stuosta Jolanta. Sovpus Oskars smaidūt papyldynoj: “Jā, vari nikuo nastuosteit, dūd maņ Jezupu, Brazileju i Ontonu (kopeju nūsaukumi – L.S.).”
Latgaliskuo kulturvīta “Rancāna pogolms”
Oskars stuosta, ka idejis par “Rancāna pogolmu” rasšonuos jau ir gona senejs stuosts, deļtuo nivīns vaira napīmiņ, kurs ir tuos aizsuociejs. “Iz itū vītu myus paaicynuoja “Ausmeņa kebabs” saiminīks Valters Murāns, tod paguoja kaida šaļts, cikom mes īsastruoduojom. Valters vys myus dzyna iz prīšku mudruok, sovpus mes kai “zali ogūrči” raudzejom jū bremzēt, kam vēļ nasaprotom, kai tys byus, ka mes niu cepsim gordumus i da myusu kasdīnā īs ļauds. Tod mes nazkai saruovem i suocem struoduot. Sovpus maņ nu Reigys dzeivis beja palykuši atmiņā Kolncīma kvartala kulturys vokori, maņ gribiejuos, kab ari Rēzeknē byutu taida leidzeiga vīta,” doluos Jolanta.
Ideja saukt par “pogolmu” rodusēs aiz tuo, ka “kvartals” byutu puoruoks lels nūsaukums, kam realuo vīta ir mozuoka. Nu suoku, prūtams, bejuse dūma apspielēt Leņdžu pogosta nūsaukumu (kai “KUUP”, tai “Ausmeņa kebabs” saiminīki īt nu Rēzeknis nūvoda Leņdžu pogosta, – L.S.), tok tai kai obejis vītys – “Ausmeņa kebabs” i “KUUP Coffee” – atsarūn Nikodema Rancāna īlā, nūsaukums palyka “Rancāna pogolms”.
Nūsaukums i uzroksts dzyma, izmontojūt viņ īškejūs resursus: “Mes palyudzem myusu tuo laika kolegei Katrīnai ar rūku pīraksteit nūsaukumu “Rancāna pogolms”, sovpus Valters atdeve uzjāmumam, kurs sataiseja neona zeimi,” pīmiņ Jolanta.
“Rancāna pogolma” pasuokumu saturs tūp, struodojūt komandā. Cytreiz pi pasuokumu vaira dasaslādz Oskars ar Jolantu, cytreiz Valters, tok vysi temati i aizdavumi teik apsprīsti i sadaleiti kūpā. “Pādejā sezonā mes jau protom vuiceitīs nu pārnejūs klaidu. 2023. gods beiguos nivīns navarēja saviļkt kūpā golus – kaidi gosti beja pa sezonu, kaidys beja izmoksys, kam nivīns nikuo napīraksteja, sovpus tagad jau mums ir tabulenis, kur vyss šmuki pīsaroksta,” stuosta Jolanta. “Eistineibā kotrys pasuokums prosa cīši daudz resursu, i na jau tik finansialā ziņā – ari rodūšajā dūmuošonā, idejuos i vysa veida tehniskajā sasagataveišonā,” skaidroj Oskars.
Vīns lobs pīmārs ir par mauduošonu soltumā. “Itei beja Valtera ideja, i mes kaidu šaļti jū kacynuojom, partū ka kubula pīpiļdeišonai beja vajadzeigs cīši lels lada apjūms, mēs dūmuojom, ka nasaīs. Tok tyka īsaisteitys vairuokys Rēzeknis kopejneicys, kuruom beja lada mašynys, i jim eistyn izadeve eistynuot ideju,” stuosta Jolanta. Oskars darunoj: “Tī beja lobs kolorits moments, kod nu preteimā asūšuos sātys izīt mauduošonuos kostimā apsavylkuse sīvīte i vīnkuorši īlein kubulā. Tys vyss tepat – “Rancāna pogolmā”.”

Latgaliskais koncepts
Obeji pīzeist, ka uzroksti latgaliski kai “KUUP Coffee” skotlūgu, tai i “Rancāna pogolma” gadīņūs bejuši tik pošsaprūtami. “Vīneigi ir praseiba, kab vyss, kas teik puordūts piercejim, byutu daīmams latvyski,” stuosta Jolanta, bet Oskars darunoj, ka Latvejā ir instaņcis, kas gona ryupeigai sekoj leidza tam, kab lykums tyktu īvāruots.
Niu “KUUP Coffee” konceptveikals tics pi Vaļsts Volūdys centra (VVC) atzineibys “Latviešu valodai draudzīga vide”. Jolanta stuosta, ka pārņ vosorā ūtrū godu piec kuortys VVC beja atguojuši puorbaudē, tod tyka sajimta gara, oficiala viestule, nu kuruos suokumā Jolanta pat sasabeiduse, dūmojūt, ka gaidoma kaida struope, tok viestulis beiguos beja “sliedzīņs”, ka konceptveikals teik nomināts bolvai “Latviešu valodai draudzīga vide”.
Sevkurā uzjiemiejdarbeibā juosariekinoj ar naīsadūšonom
Sevkurā uzjiemiejdarbeibā goduos vysaiduokys klaidys, kas ir cīši normala ituos nūzaris daļa, vysubīžuok klaidys rūnās deļ pīredzis tryukuma. Ari Oskars ar Jolantu doluos sovys darbeibys suokuma naveiksmu stuostā. Kai “KUUP Coffee” obeji dasasaceja daleibai sovā pyrmajā godatiergā Valmīrmuižā. “Organizatori atsyuteja pārnejūs pasuokumu foto, sovpus nūlykumu mes, prūtams, napuorskaitejom. Aizbraucem iz tiergu ar kopeja automatu i kopeja paceņom. Uorā leist, mums nav ni golda, ni teļts voi pagarynuotuoju. Organizatoru biļdēs izavēre, ka vysim ir vīnaidys teļts, partū ari naīspryngom, tok izaruodeja, ka vīnaiduos teļts ir tik suokuma zonā,” pīmiņ Jolanta.
“Mes tī stuovam, ar zuolē nūsvīstu kopeja automatu, maiseņā stuov kopeja pacenis, saprūtom, ka juobrauc pierkt vysu, kuo nav, tok drusku prīcynoj, ka mes nabejom taidi vīneigī, tūreiz mes “Depo” ar cytim, kam vysa nabeja leidza, labi izpierkom. Tūreiz īguoduotū telti aizpyute i salauze cytā pasuokumā, sovpus goldu lītojom da itai dīnai,” smaidūt stuosta Oskars.

Dizaina veikals “Kabata”
Jolanta stuosta, ka gona bīži jim iz e-postu atīt pīprasejumi nu cytu Latvejis uzjāmumu, ka jī grybātu “KUUP Coffe” konceptveikalā izvītuot i puordūt sovus produktus. “Mes zynuojom, ka piļsātā ir vīns amatnīku preču veikals, kurs laiku pa laikam teik izlykts pošvaļdeibys izsūlē. Dūmuojom, ka mož piec godu treju atsabreivuos telpys, tod mes varātu nazkū paraudzeit, tok mums atbiļdēja, ka nuokušuo izsūle gaidoma piec diveju mienešu. Tys reali beja kai snīgs iz golvys, munā pruotā beja tik pamata ideja, vēļ nabeja skaidrys, voi mes tū vyspuor gribim i voi vajag. Tai mums cīši mudri beja juopījam lāmums, ka dorom voi nu itūgod voi eistyn vēļ piec 2-3 godu,” doluos Jolanta.
Oskars pīzeist, ka termiņš ir tys, kas dzan iz prīšku – kod ir zynoms konkrets datums, tev vaira nav atsakuopšonys ceļa, tu ej, i dori. Obeji ari pīzeist, ka jim pateik dasaturēt pi koncepta – ka “KUUP Coffee” ir kopeja konceptveikals, tod ari veikala pamata prece ir kopejs i vyss, kas saisteits ar tuo pagataveišonu aba bryuvreiki.
“Jaunuo “Kabata” topa ari aiz tuo, ka pošim beja problema – Rēzeknē nabeja vītys, kur varātu nūpierkt kaidys eipašys duovonys, kuruos varbyut navar atrast lelajūs veikalūs. Prūtams, var pasyuteit škārsteiklā, tok cytreiz tuos duovonys vajag iz reizis. Niu turysma sezona ir taida mīreiguoka, tok tim ļaudim, kas jau ir bejuši nu Pūlejis voi Grīkejis, myusu adeituos zečis ir “wow”, dūdit pīcus puorus,” stuosta Jolanta.
Dizaina veikala vizualū stuostu taiseja Rēzeknis Tehnologeju akademejis studenti, vysvaira īsasaisteja Liāna Merņaka. Oskars stuosta, ka da šam jim bejuse pīredze ari ar lelim zeimynu izstruodis uzjāmumim, tok niulejuo sadarbeiba ar jaunīšim asūt pamatuse vyspozitivuokū īspaidu. “Pošim jaunīšim beja interesanti īīt telpā, kas ir piļneigi “tukša”, kur var byut breivs dūmu liduojums. Es nabeja gaidejuse, ka augstškola tik daudz īsasaisteis. Studentim beja lela degsme, pošim interesanti – kai tod izavērs tei sīna, ka nūkruosuos itaidā tūnī,” stuosta Jolanta.
Sovpus Oskars ari darunoj, ka “KUUP Coffee” konceptveikalā iz sīnys asūšais lelais uzroksts “KUUP” suokumā beja paredzāts sīnys centrā i stypri mozuoka izmāra. “Tok tūlaik sasadorbuojom ar muokslineicu Grietu Butjankovu i juos breineigū komandu. Kaidu reizi jei atbrauce i soka – nā, itys nader, vajag leluoku. Tai topa uzroksts pa vysu sīnu, i mums daudzi lāmumi tyka pījimti procesā, kas redzīs dīzgon forši,” pīmiņ Jolanta.
“Maņ redzīs, ka pa itim godim asam īsavuicejuši vairuok ļautīs i riskēt, varbyut tys ari īt ar pīredzi,” tai Oskars. “Veidojūt “Kabatu”, leluokais izaicynuojums beja naatkuortuot konceptveikala dizainu i saturu, kab nasataiseit div vīnaidus pīduovuojumus. Beja aizdavums, kab, īīmūt telpā, nasarostu sajiuta, ka tu esi kopeja veikalā, tok gribiejuos, lai ari pošim byutu vīgļuok,” doluos Jolanta.
“Mes ari turpynojam meklēt vysaiduokys precis, veromēs, kuo tryukst, kas ir tys, piec kuo ļauds vaicoj, raugom ari papyldynuot sortimentu, kab tys byutu interesants jaunīšim,” darunoj Jolanta.
Mozā piļsātā konkurence na vysod ir moza
Oskars pīzeist, ka koč ari Rēzekne nav lela piļsāta, vystik konkurence pastuov – pīduovuojums ir plots, cikom dzeivuotuoju skaits nav tys leluokais. “Maņ redzīs – ka tev ir kaida unikala ideja, tod suokt sovu lītu nav nimoz tik sarežgeitai. Golvonais ir naatkuortuot tū, kas jau ir, dareit pa sovam, pīduovuot nazkū cytu,” apsadūmojūt soka Jolanta. Oskars doluos, ka suokums vysod byus izaicynūšs, byus gryuši nagaist i nūsaturēt tiergā – cikom pīduovuotais produkts voi pakolpuojums ir vēļ moz zynoms, īkaruot tiergu byus gryuši.
“Vajag napasadūt i nūsaturēt, kai uzjiemiejam tev juosaprūt, ka cylvākim vajadzeigs laiks, kab tevi īpazeit,” darunoj Jolanta.
Vaicuoti voi da šam ir izmontuojuši kaidys uzjiemiejdarbeibys atbolsta programys, Oskars smaidūt soka: “Kū varim pajimt i izmontuot, tū jemom. Sevkura jaunuo uzjiemieja sātys dorbs ir izpieteit, kas var byut tovys atbolsta programys, tai var dabuot na tik finansialus grantus, tok ari uzkruot zynuošonys. Tev kai uzjiemiejam ir juopastruodoj, par veļti nabyus nikuo,” tai Oskars.
“Ituos programys mums ari paleidzēja padūmuot par lītom, kuruos mes poši sovā sajiusmā par jaunū produktu byutu palaiduši garum. Ir juosagatavej biznesa plans, juoroksta sovi mierki, juoizpietej, kas byus tovi konkurenti, kaidi byus tovi puordūšonys kanali, tys suokuma sajiusmu drusku nūmīrej i līk kuorteiguok apdūmuot,” tai Jolanta. Jei ari pīzeist, ka projektu uzraudzeiba ir loba. Ka nu suoku redzīs – ah, otkon īs i puorbaudeis, byus problemys, tok eistyneibā tys asūt īmeslis sakuortuot i strukturēt, tai ari pošam realuo situaceja tūp skaidruoka. Jei ari pastreipoj, ka, pīmāram, biznesa inkubators beja kai sova kūpīna, kur varēja puorrunuot vysaiduokus aktualus vaicuojumus, i smaidūt soka, ka tys beja kai “Anonimūs uzjiemieju klubeņš”.
Tim, kuri suoc sovu uzjiemiejdarbeibys ceļu, Oskars i Jolanta vielej drūsmi, energeju, īškeju mīru i paraudzeit kotram deļ seve sataiseit “mehanismu”, kas paleidzēs restartētīs, kod saguojušys kaidys gryuteibys.

Komentari