Zynomi Latgalīšu kulturys goda bolvys “Boņuks 2024” nominanti

Zynomi Latgalīšu kulturys goda bolvys “Boņuks 2024” nominanti

Rokstu sagataveja: portals lakuga.lv

Žurejis dorbs pi Latgalīšu kulturys goda bolvys “Boņuks 2024” pretendentu dasacejumu izviertiešonys ir nūsasliedzs, paziņojūt treisdesmit lobuokūs i spūdruokūs nominantus, kab jau 1. martā 18.00 stuņdēs aizvadeitu kasgadejū bolvys padūšonys ceremoneju, gūdynojūt desmit 2024. gods nūzeimeiguokuos nūtikšonys, aktivitatis i cylvākus latgaliskajā kulturā, kai ari padūtu bolvu par myuža īguļdejumu latgalīšu kulturys atteisteibā, informej pasuokuma organizatori. Itūgod bolvys padūšonys ceremoneja nūtiks kai ar skateituoju byušonu kluotynē Latgolys viestnīceibā “Gors”, tai tū varēs vērtīs tīšraidē LTV1.

Itūgod bolvys par aktivitatem, dorbu i sasnāgumim latgaliskajā kulturā tiks padūtys jau septeņpadsmytū reizi. Latgalīšu kulturys goda bolvys mierkis vys ir apkūpuot lobuokū, spūdruokū i nūzeimeiguokū padareitū i nūtikšonys pārnajā godā latgaliskajā kulturā, gūdynuot aktivuokūs latgalīšu kulturys puorstuovus, popularizātuojus, kai ari veicynuot jaunradis i kulturys daudzveideibys atteisteibu iz prīšku. “Boņuks 2024“ gūdynuos par snāgumu i padareitū 2024. godā.

Kai pretendentu viertiešonys kritereji ir izvierzeiti kai pretendenta snāguma kvalitate, aktivitate vysa gods laikā, regionā, vaļstī voi plašuokā mārūgā radeituo rezonanse, tai latgaliskums i/voi Latgolys kulturys vierteibu nesšona, pretendenta ilgtspieja – ītekme iz latgaliskuos kulturys procesim iz prīšku. Itūgod tyka īsnāgti 127 pretendentu dasacejumi, kurūs izvērtēja žurejis komiseja. Tuos sastuovā beja īkļauti īprīškejūs godu bolvu sajiemieji, medeju puorstuovi, bolvys reikuotuoju puorstuovi, latgaliskuos kulturys sabīdryskī aktivisti i attīceigūs sferu daaicynuotī eksperti, kurūs kasdīna nav saisteita ar latgaliskū kulturu. Ar pylnu žurejis komisejis sastuovu var īpasazeit Latgalīšu kulturys goda bolvys “Boņuks“ sātyslopā http://bonuks.lv. 

Latgalīšu kulturys goda bolvys “Boņuks 2024” nominanti ir (alfabeta parādā):

  1. Amandys Anusānis i Liānys Merņakys ceļojūšuo izstuode “Baba, kurū škārsteikla bārni vaira napīdzeivuos”
  2. Anitys Mileikys dzejūļu kruojums “ziņas par gadalaikiem”
  3. “Black Rooster Kapelye” debejis albums “Vos Mir Zaynen”
  4. Bronislavys Martuževys fonds “Rakstītāja” i Bronislavys Martuževys symtgadis nūtikšonys – dzīšmu gruomota “Dzimst dziesmas tautā, dzimst…” i koncertizvadums “Topi stipra, sirds”
  5. Daugovpiļs teatra izruode latgaliski “Kaids nūteikti atīs”
  6. Dr.hist. Henrihs Soms
  7. Evija Maļkeviča-Grundele
  8. Festivala “LNSO Vasarnīca” Latgolai veļteituo koncertprograma “Simfo. Etno.
    Džezs”
  9. Folklorys kūpys “Upīte” projekts – kolhoza laiku dzīšmu atjaunuošona
  10. Folklorys kūpys “Dyrbyni” pyrmais muzykys albums “Ontona monts”
  11. “Google Translate” latgaliski
  12. Grupys “Borowa Mc” 20 godu jubilejis koncerts i dzīsme “Prūjam juoīt”
  13. Grupys “Dabasu Durovys” albums “Dīnys i nadīnys”
  14. Inga Vigule
  15. Juoņa Gleizda symtgadei veļteitī pasuokumi – Rēzeknis nūvoda pošvaļdeibys konkurss “Juoņa Gleizda bolva fotografejā” i fotogruomota “Gleizda metode”
  16. Jura Urtāna gruomota “Latgales pilskalni un to folklora”
  17. Komponista Edgara Mākena minialbums “Treis putneņi”
  18. Koncertizvadums “Atīšona” – Ilze Sperga, Ieva Parša i Rihards Plešanovs
  19. Koncertizvaduma “Francis” radejis verseja
  20. Koncertizvadums “FOLK PASIJA: Francis Trasuns”
  21. Latgalīšu volūdys tezaurs (pilotverseja)
  22. Literaruos jaunradis latgaliski veicynuošonys programa
  23. Nikolis Nauys gruomota “Seven hundred Latgalian words”
  24. Pīminis i atkluošmu gruomota “Vitolds Valeiņs: personeiba i dorbi”
  25. Raidejumu cyklys “Pazudušū pādu retrospekceja – pīrūbeža”
  26. Raidejumu cyklys “Latgolys revizeja”
  27. Sandis Zučiks i bīdreiba “Danču krātuve”
  28. Ūgys albums “Čardaukšu rūtaļa”
  29. Valentina Lukaševiča vītu stuostu kruojums “Dīnvydlatgolys stuosti”
  30. Vinilplate Seimaņs Putāns “Caur bolsim as eju” i koncertizruode “Putāns.Toreiz un tagad. “

Bolvys “Par myuža īguļdejumu latgalīšu kulturys atteisteibā“ sajiemiejs tiks publiski paziņuots februara vydā.

Latgalīšu kulturys goda bolvu “Boņuks 2024” vadeis akters Andris Keišs i radejis bolss Juoņs Pampe. Skateituojus kluotīnē i tīšraidē LTV1 prīcynuos grupa “Dabasu durovys”, etnogrupa “Ogas” i etnografiskais ansamblis “Vabaļis”, ansis, Ūga (projekta “Putāns. Toreiz un tagad” muziki), Reigys projektu kors, Jānis Strazdiņš, postfolklorys grupa “Rikši” (koncertizvaduma “Folk pasija. Francis Trasuns” muziki), Normunds Zušs i Agnese Rakovska, trio “Elpo” (Edgars Cīrulis, Jānis Rubiks, Rūdolfs Dankfelds), Liene Skrebinska i etnomuzikis.

“Boņuka 2024” nūtikšonu atbolsta Vaļsts kulturkapitala fonda mierkprograma “Latvīšu viesturyskūs zemu atteisteibys programa” i bīdreiba “Latgales reģiona attīstības aģentūra”, kai ari Leivuona, Ludzys, Preiļu, Kruoslovys, Bolvu, Rēzeknis nūvoda pošvaļdeibys i Rēzeknis piļsātys dūme, z/s “Kotiņi” i “Rekovas
Dzirnavas”.


Kalenders

Feb
19
Tre
11:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Feb 19 @ 11:00 – 12:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]