Dzejūļu autore: Līvija Līpdryvīte

Portals lakuga.lv skaiteituojim pīduovoj latgalīšu literatis Līvijis Līpdryvītis jaunuokūs dzejūļus. Autore da šam izdavuse deveņus dzejūļu kruojumus i itūgod tur nūceju izdūt ari dasmytū. Nu tūpūšuo kruojuma ari atlaseiti itī dzejūli.

Kū tymsuoka nakts,
Tū spūdruokys zvaigznis
Dabasūs speid.

***

Nastuovi i naskrīņ iz lada,
Iz pluona lada!
Ej!

***

Ceļš bez ceļa,
Ar pīturom mozom i lelom,
Pa teirumim, pļovom,
Pa lelcelim, stidzeņom,
Solom i piļsātom .
Dzeive.

***

Seņču rokstus losu
Na ar acim,
Caur pādim
Ar sirdi.
Tī muolā,
Tī smiļtī,
Tī akminī cītā.

***

Kristala kūrpeitis kuojis maņ spīž.
Lobuok es bosom ustobā īšu.
Lobuok es bosom iz olūtu skrīšu.
Lobuok es bosom pļaveņā daņci grīžu.

***

Dzīst dabasūs pādējuo zvaigzne
I naspeid vēļ saule.
Reits malnu kopeju padzer.
Šaļteņa siermuo ar gaismu sasatikt cer.
Dobā nikas sadaleits nav.
Ļauds poši rūbežus ceļ.

***

Pa viejam līcās kūki,
Pa viejam lidoj vyss,
Kam sovu sakņu nav.
Stuov ūzuli lapni i stypri.
Jī sorgoj kūku ciļti.
Pīklust vieji jūs zorūs,
Kai bitis sasapyn motūs
I tuoļuok navar tikt.
Kreit zemē zeilis,
Augs ūzuli jauni.

***

Pylni kārmyni vuordu.
Tī jī laimeigi sēd,
Brūkaškys ād.
Tod, kod dvēsele dzīd,
Vuordi rosā mozguotīs īt.

***

Burti, vuordi sabierst
Gruomotu lopuos.
Satynu veikšūs.
Reitā dzeršu ar čaju
Cukra vītā.

***

Dzeive – dīnu rosols.
Te kaids peirāga gobols,
Kluotyn dalīts Juoņu ols.
Guļ mīreigi muorkā karaši,
Salykti goldā suši.
Gunī capti spargeli,
Upē smejās grunduli.
Pogrobā nu bārnu dīnu
Bryukliņu zapts,
Skuobāti kuopusti i ogūrči.
A cīši gribīs līpu zīdu mads.