Rokstu sagataveja: portals lakuga.lv

Rēzeknis nūvoda Ūzulainis tautys nomā 21. februarī nūtiks trešais “Čangaļu saīts ci latgalīšu olimpiade”, aicynojūt iz prīceigu i gordu laika pavadeišonu latgaliskā atmosferā, viestej organizatoru sagataveituo informaceja.

Gods ir paskriejs i Rēzeknis nūvoda Ūzulainis tautys noms jau otkon aicynoj latgaliski dūmojūšūs ļauds sasalaseit, kab humora pylnā, draudzeigā i jaukā atmosferā ļautūs Latgolys muokslai, muzykai i kūpeigom ļustem, aizraunūši pavodūt laiku pasuokumā ar nūsaukumu “Trešais čangaļu saīts ci latgalīšu olimpiade”.

Komandys, kas dasasaceis daleibai, sagaida vysaiduoki aizdavumi ap latgaliskū, tok organizatori pastreipoj, ka nav juosabeist i nu golvys juosavuica vysi latgalīšu volūdys gramatikys lykumi, partū ka aizdavumi byušūt cīši dažaidi, īkļaunūt ari taidus, kur byus vareiba sevi ospruoteigai pasnēgt i humoristiski izapaust. Golvonais pasuokuma mierkis asūt ļautīs kūpā byušonys prīcai i labi pavadeit laiku.

Tok aktivuokī dalinīki sajims ari gūdolgys, cikom apmaklātuoju rynduos aicynuots byut sevkurs interesents. Tautys nomā byus sagataveitys sādvītys, i byus vareiba vīnkuorši pasaprīcuot par cytu snāgumim, taipoš ari individuali aizpiļdeit aizdavumus.

Kai stuosta Ūzulainis tautys noma vadeituoja Santa Ostaša – vuords “čangali” asūt juouztver ar mīreigu pruotu, partū ka kurs gon cyts, ka ni mes poši spēsim par sevi pasasmīt. “Mes drupeit koketejom ar itū pasuokuma nūsaukumu, pasmaidom poši par sevi, kam zynim, ka eistyns latgalīts ir lobā nūzeimē troks i ļusteigs cylvāks,” tai Santa. Jei darunoj, ka ari ituo gods pasuokums sūluos byut aizraunūšs – byus vuordu kaitys, kab atsaukt atmiņā senejūs i dazynuot par jaunvuordim, byus vareiba atguoduot tradicejis, kaidys nazkod īvāruoja babenis laukūs, i atpazeit vysaiduokys zynomys personeibys. “Tycu, ka pasuokuma gaitā atsakluos na vīns viņ talants kai runuošonā, tai aktermuokslā i atjauteibā, taipoš myus prīcynuos latgalīšu muzyka, itūgod eipašais gosts ir Jurs Ostrovskis, i na mozuok svareigi, ka varēs baudeit gastiņci ar Latgolys kulinaruo montuojuma lobumim, kam mes jau zynim, ka paieds cylvāks ir lobs cylvāks,” stuosta Santa Ostaša.

Komandys, ar dalinīku skaitu da 10 cylvāku, var dasaceit daleibu da 18. februara, zvonūt 25127340. Daleiba ir bez moksys. Pyrma nūtikšonys komandom ir sātys dorbs – izdūmuot komandys nūsaukumu i piec vareibys tematiski sasapucēt. Taipoš kotrai komandai iz pasuokumu juoīsarūn ar vīnu iedīni, kū tei komanda skaita par latgalīšu kulinarejis “noglu” voi tradicionalū iedīni. Kotrai komandai byus eisi juopastuosta par sevi i sovu nūsaukumu i juopastuosta par kaidom “zīpem”, kū poša komanda, kaids nu tūs dalinīku voi cyts jim zynoms cylvāks da šam ir “savuorejs”.