Rokstu sagataveja: portals lakuga.lv

Itūnedeļ ar kulturys īsacejumim pasadola Dekšuoru pogosta dzeivuotuoju padūmis vadeituojs i kulturys organizators, kai ari cīši aktivs jaunīts Sandis Mesters. Valentina dīnys svātku nedelā jis īsoka ar dzīsmem i nūskaņuojumu aicynuot pavasari, prīcuotīs par sovejūs sasnāgumim i ļautīs aktivai atpyutai.

Dzīdūšuos Tihovsku saimis koncerts

Apleik nūteik vysaidi pasuokumi, kas veļteiti Valentindīnai, tok naaizmierssim, ka februars ir ari mieness, kas viestej par pavasara tyvuošonūs. Deļtuo Tihovsku saimis koncertā Dekšuoru tautys nomā ar izdzīduotajom dzīsmem atsavasaluosim nu zīmys i aicynuosim pavasari, kas ness syltumu, gaismu i energeju! Byusit meili gaideiti!

Atbolsts i prīca par “Tautumeitom”

Klausomēs, prīcojamēs, lapnojamēs i popularizejam myusu grupu “Tautumeitas”, kas uzvarēja Latvejis Televizejis dzīšmu konkursā “Supernovā” ar dzīsmi “Bur man laimi” i puorstuovēs Latveju Eirovizejā. “Tautumeitys” sajāmušys latgalīšu atzineibu, dabojūt “Boņuka” bolvu, izdavušys dzīsmis latgaliski, spieceigi sevi pīruodejušys na tik Latvejā, bet ari cytur pasaulī. Vīnā nu leluokūs televizejis šovu pasaulī skanēs myusu latvīšu volūda, tyks paruodeita myusu kultura i tradicejis. Atbaļsteisim, lapnuosimēs, ticēsim i byusim kūpā, kam juos puorstuov myusu vaļsti. Ari mes kotrys teiši voi nateiši veidojam Latvejis tālu pasaulī. Izbūrsim laimi vysā Eiropā!

“Zeit” rodūšais kvartals Leigatnē

Braucit iz “Zeit” rodūšū kvartalu Leigatnē! Breineiga vīta, kur pavadeit laiku kūpā ar saimi. Bārni var izaskrīt pa kūku viersyunem teiklu parkā, vacuoki baudeit gordus iedīņus. Sekojit leidza “Zeit” aktivitatem, tī nūteik vysaidys kulturys nūtikšonys vysaidom interešu grupom. Vīta, kur var apvīnuot muokslu ar aktivu atpyutu.