Rokstu sagataveja: portals lakuga.lv

Paruodūt sovu nūstuoju i izsokūt vīnuoteibu Ukrainys atbolstam ceiņā pret Krīvejis agreseju, jau trešū godu šudiņ, 24. februarī, 12.00 stuņdēs Ukrainys himnu atskaņuos vaira nakai 50 Latvejis medeju. Itūgod, apstyprynojūt Baļtejis solidaritati i atbolstu Ukrainai, akcejai pīsavīnoj ari Leitovys Sabīdryskais medejs LRT.lt i Igaunejis Sabīdryskais medejs ERR.ee.

Jau trešū godu ar Ukrainys vaļsts himnys vīnlaiceigu atskaņuošonu vysā Latvejis medeju telpā Latvejis elektroniskī medeji paruodeis sovu nūstuoju, kūpeibu i vīnuotū atbolstu Ukrainai ceiņā pret Krīvejis pylna mārūga ībrukumu. Itūgod akceja īt uorpus Latvejis rūbežu, i Latvejis medejim pīsavīnoj Baļtejis vaļstu sabīdryskī medeji, pīruodūt kūpeigys vierteibys i naapšaubamu atbolstu Ukrainai. Kars nav beidzīs, i mes nadreikstam ni aizmierst, ni pīrast pi juo radeitūs šausmu. Aicynojam ari tevi 24. februarī 12.00 stuņdēs atskaņuot Ukrainys himnu

“Itei Ukrainys himnys atskaņuošonys akceja roda pretruneigys sajiutys. Nu vīnys pusis, labi, ka Latvejis medeji var vīnuotīs kūpeigai lītai i paust skaidru atbolstu Ukrainai. Nu ūtrys pusis, ir tragiski, ka itai akcejai ir juonūteik jau trešū godu. Ir paguojuši treis brutali godi, kurūs laikā asam ziņuojuši par okupantu armejis izdareitajom zviereibom i ukraiņu tautys cīsšonom. Mes ari iz prīšku byusim kluotasūši Ukrainā i atbaļsteisim ukraiņus, koč ari nu sirds ceru, ka cytugod itaida veida atbolsta akceja vaira nabyus vajadzeiga,” stuosta Latvijas Radejis golvonuo redaktore Anita Brauna.

Daleibu Ukrainys himys atskaņuošonā apstyprynuojuši vaira kai 50 medeji Latvejā, kai arī sabīdryskī medeji Leitovā i Igaunejā. Akcejā pīsadola ari portals lakuga.lv kūpā ar itaidim medejim: Latvijas Radio 1, Latvijas Radio 2, Latvijas Radio 3 – Klasika, Latvijas Radio 4 – Doma laukums, Latvijas Radio 5, Latvijas Radio 6 NABA, LTV1, LTV7, LSM.lv, LSM+, Skonto, Skonto +, Radio Tev, LoungeFM, RADIO 9, Relax FM, Autoradio Latvija, Radio Roks, SWH, SWH +, SWH Rock, SWH Spin, SWH LV, Eiropas Hitu radio, EHR SuperHiti, Latviešu Hiti, EHR Krievu Hiti , RetroFM, Kurzemes radio, Divu krastu radio, Radio “EF-EI”, Latvijas Kristīgais radio, ReTV, TV3, TV3 Life, TV6, TV3 PLUS, Star FM, MIX FM, Baltkom radio, Radio 1, Alise Plus, Radio Marija, Radio Rēzekne, 360 TV, STV Pirmā, 8TV, Riga TV 24, TV 4, TVNET.lv, Apollo.lv, RUSTVNET.lv, LTV 1, LTV7, lsm.lv, rus.lsm.lv, BNN, AS Cits medijs, NRA.lv, Latvijas Vēstnesis, Bauskas Dzīve, TV Jūrmala, Vidusdaugavas TV. Taipat aicynuojumam atsasaukuse Reigys storptautyskuo autoūsta. Akcejā pīsadola ari Igaunejis Sabīdryskuo medeja radejis stacejis – Raadio 2, Klassikaraadio, Raadio 4 i vysuvaira klauseituokuo radejis staceja Igaunejā – Vikerraadio. Himnu atskaņuos ari divejis igauņu komercialuos radejis stacejis – Kuku Raadio i Narodnoe Radio. Taipat Ukrainys himnu atskaņuos ari Leitovys Sabīdryskuo medeja radejis stacejis – LRT Radijas, LRT Klasika i LRT Opus, kai ari komercialī medeji Delfi TV i Power Hit Radio.