Rokstu sagataveja: portals lakuga.lv

Jau septeitū reizi Latgalīšu kulturys goda bolvā “Boņuks” tyka nūskaidruoti ari publikys simpateju bolvys “Žyks” uzvarātuoji. Jūs bolsuošonā, kū organizej latgalīšu kulturys ziņu portals lakuga.lv i Latvejis Sabīdryskuo medeja portals LSM.lv, nūsoka sabīdreiba. Itūgod iz vysa leluokū bolsu skaitu sajēme i “Žyka” statueti svineigajā ceremonejā 1. martā Latgolys viestnīceibā “Gors” dabuoja Ričarda Benislavska i Edija Strušela taiseitais raidejumu cyklys “Pazudušū pādu retrospekceja”.

Raidejumu cyklys “Pazudušū pādu retrospekceja” beja vīns nu 30 Latgalīšu kulturys goda bolvys “Boņuks 2024” nominantu i atbaļsteit sovu simpateju kotrys grybātuojs portalā LSM.lv varēja nu 17. da 27. februara. “Žyka” bolvys sajiemiejs – sešu raidejumu cyklys “Pazudušū pādu retrospekceja”, kura autori ir Ričards Benislavskis i Edijs Strušels –, dokumentej Latgolys pīrūbežu nu entuziastisku ceļuotuoju skotu punktu maršruta pūsmūs Leidumnīki–Zylupe–Ezernīki–Indra–Pīdruja – īpazeistynoj skateituojus ar kulturviesturis faktim, intervej vītejūs ļauds i snādz koncertus. Taipat leidza ar raidejumim izdūts ari Edija Strušela muzykys albums ar nūsaukumu “(Pi)Rūbeža”, kurā ir desmit dzīšmu, kurys rauga paruodeit daudzšķautnainū emoceju gammu, kas rodusēs nūītajā maršrutā. Sarunu ar raidejuma cykla autorim portalā lakuga.lv var puorskaiteit ITE.

Bolsuojuma uzvarātuojs tyka pi keramikis Vēsmys Ušpelis taiseituos muola statuetis “Žyka”, kurā radzams Boņuka suņs Žyks, kurs ari sovulaik plotuok tyka īpazeits car režisora Juoņa Streiča kinu “Cilvāka bērns”, kas baļsteita taida poša nūsaukuma rakstnīka Juoņa Klīdzieja romanā. Statueti i eipašu sveicīni nu latgalīšu kulturys kusteibys “Volūda” i latgalīšu kulturys ziņu portala lakuga.lv – latgalīšu literaturys i Latgolā taiseitūs lobumu kasti – bolvys ceremonejā raidejumu cykla autorim pasnēdze portala lakuga.lv puorstuovis – portala vadeituoja Amanda Anusāne i redaktore Laura Melne.

Sajemūt bolvu, raidejumu cykla autori pasateica atbaļseituojim saceja: ““Žyks” ir bolva, kas simbolizej draudzeibu – lels paļdis vysim myusu draugim: vysim, kuri bolsuoja, kuri īsasaisteja projektā koč ar nalelu daleņu, kai ari vysim pīrūbeža ļaudim, kuri paruodeja, ka ar kotru mozumeņu var daleitīs i lela sirds ir īspiejama jebkur.” Bolvys padūšonys šaļti video formatā var nūsavērt ITE.

Fotogalerejā: publikys bolsuojuma bolvys “Žyks” sajiemieji, foto Dagnija Bernāne/Latgolys viestnīceiba “Gors”.

Publikys bolsuojuma bolvys “Žyks” mierkis ir dagrīzt vēļ leluoku sabīdreibys viereibu pārnejā godā latgalīšu kulturā padareitajam i “Boņuka” nominantim. Ka latgalīšu kulturys goda bolvys “Boņuks” laureatus nūsoka žurejis bolsuojums, tod “Žyka” uzvarātuoju gūds ir publikys aktivitatis rūkuos.

Publikys simpateju bolvu “Žyks” da ituo sajāmuši Baļtinovys amaterteatris “Palādas”, treis reizis rūkdarbneica, tautystārpu entuziaste i “Latgolys etnografiskuos viestnīceibys” vadeituoja Iveta Seimanova, taipat bolva tykuse ari folklorys kūpys “Upīte” i īrokstu studejis “Bigmaar’s Records” rūkuos.

Latgalīšu kulturys goda bolvys “Boņuks 2024” ceremoneju vēļreiz var nūsavērt ITE.