Rokstu sagataveja: portals lakuga.lv

Folklorys kūpa “Upīte” viestej, ka piec nedeļgolā sajimtuos “Boņuka” bolvys nanūstuoj pi jau sasnāgtuo, bet suokuse jaunu projektu, īrokstūt jaunys dzīsmis nuokušajam albumam. Tymā tiks īraksteitys vysa gods dzīsmis, suocūt nu pavasara i Leldīnis bolsim, turpynojūt ar gonu dzīsmem, vosorys saulgrīžu i saulis bolsim, rudiņa bolsim i zīmys saulgrīžu dzīsmem. Tai tiks apzynuotys dzīsmis, kū pyrma symtu i vaira godu Upītis kulturtelpā i tuos apleicīnē dzīduojuši seņči vysa gods garumā.

Folklorys kūpa “Upīte” turpynoj apzynuot i izpieteit nūvodpietnīka, folklorista i dzejnīka Ontona Slišāna 20. godu symta 70. godūs veiktūs īrokstus, kai ari, gastejūt pi Upītis etnografiskuo ansambļa i Medņovys etnografiskuo ansambļa teicieju, izceļ mozuok dzierdātuos melodejis, kuruos vuicuos, atjaunoj i īroksta, tai izveidojūt jaunu albumu, kurā tiks īkļautys dzīsmis, suocūt ar pavasara melodejom i beidzūt ar zīmys saulgrīžu dzīsmem.

Jaunuos dzīsmis “Atīt Leldīna” prezentiešonys datums nav najauši izalaseits. Dzīsme teik prezentāta 5. martā, kam taišni itymā datumā Zīmeļlatgolys laikroksts “Vaduguns” svietej 75 godu jubileju. Pavasars ir laiks, kod vysa doba pasamūst, Leldīnē saule suoc puorsteigt mienesi i dīnys palīk garuokys, tai ari folklorys kūpa “Upīte” gazetai vielej iztureibu i gaismys nesšonu Zīmeļlatgolā.

Īroksts veikts studejā “Bigmaar’s Records”, ari dzīsmis video verseja radeita studejis telpuos. Kadrys vysu laiku leigojās, kai tys nūteik ar leigačom Leldīnē.

Bolvu nūvoda Namaterialuos kulturys montuojuma centra “Upīte” direktors i folklorys kūpys “Upīte” vadeituojs Andris Slišāns lapnojās i soka: “Lels gondarejums, ka folklorys kūpa ar sovu kolhoza laikūs dzīduotūs dzīšmu projektu ir nūvārtāta, sajamūt Latgalīšu kulturys goda bolvu “Boņuks 2024”, tok vēļ leluoka prīca, ka kūpa nanūstuoj pi sasnāgtuo i jau ir īlākuse jaunā projektā. Dūmoju, ka jaunuos dzīsmis byus kai kalendars, kotra dzīsme sovam godalaikam, saulgrīžim i nūtikšonom dobā.”