Rokstu sagataveja: portals lakuga.lv

Latgolys regionaluo televizeja (LRT) turpynoj raidejumu cyklu “Skolām (ne)būt!”. Televizejis ekranūs nu jau sastū raidejumu par divejom slāgtajom pamatškolom Ludzys nūvoda Mežavydu pogostā kanalā TV24 i Re:TV vierszemis apraidē varēs redzēt jau 8. i 10. martā.

Raidejumu cykla “Skolām (ne)būt!” sastajā raidejumā Latgolys regionaluo televizeja apmeklēs divejis pamatškolys Mežavydu pogostā – Mežavydu 1. pamatškolu, kas slāgta 2023. godā, i Mežavydu 2. pamatškolu, kas slāgta 2009. godā. Obejis izgleiteibys īstuodis atsarūn tik puora kilometru attuolumā, tok niu tūs telpys gaida jaunu darbeibu. Raidejumā varēs īpazeit slāgtūs školu viesturi, darbeibys gaitu i situaceju piec sliegšonys, par kū stuosteis bejušī audziekni i darbinīki. Taipat tiks uzrunuoti ari obeju cīmu vītejī dzeivuotuoji, kab nūskaidruotu tū, kai izgleiteibys īstuožu reorganizaceja ītekmej dzeivis ritiejumu cīmā. Komentarus par beidzamajūs godūs slāgtajom školom snēgs ari Ludzys nūvoda pošvaļdeiba i Izgleiteibys i zynuotnis ministreja.

Projekts “Skolām (ne)būt!” viestej par septeņom dažaidom izgleiteibys īstuodem Latgolā i tūs liktini kai laukūs i piļsātvidē, tai Latgolys regiona vidīnē i pīrūbeža teritorejuos. Raidejuma veiduotuoji brauc iz školom, kas ir jau slāgtys īprīšk i niu tūs telpys ir tukšys voi ari turpynoj darbeibu cytā veidūlā, kai ari apmeklej tuos vuiceibu īstuodis, kam optimizacejis planu deļ itūšaļt draud sliegšona voi izgleiteibys pakuopis samazynuošona. Piļsātu školuos raidejums analizej tūs gataveibu uzjimt vēļ leluoku školānu skaitu klasēs, īsaver, kai atsateista puorīšona iz vuiceibom latvīšu volūdā vītuos, kur da šam beja ari krīvvolūdeigūs plyusma.

Raidejumu cykla “Skolām (ne)būt!” vysi septeni raidejumi, suocūt ar 1. februari, da 15. marta tiks puorraideiti kotru sastdīni 16.00 stuņdēs kanalā TV24 i pyrmūdīnēs 17.30 stuņdēs kanala Re:TV vierszemis apraidē Latgolys regionalajā televizejā. Taipat kotram raidejumam sekuos atkuortuojumi kanalā TV24 svātdīnēs 14.30 stuņdēs i ūtardīnēs kanala Re:TV vierszemis apraidē Latgolys regionalajā televizejā 7.00 stuņdēs.

Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Skolām (ne)būt!” saturu atbiļd SIA “Latgales reģionālā televīzija”. #SIF_MAF2024

Galerejā biļdis nu Mežavydu pogosta slāgtajom školom. Foto: Latgolys regionaluo televizeja

Publikaceju apmoksoj Latgolys regionaluo televizeja