Rokstu sagataveja: portals lakuga.lv

Rēzeknis nūvoda Lūznovys muiža, sasadorbojūt ar Rēzeknis nūvoda Kulturys i turysma puorvaļdi i latgalīšu kulturys kusteibu “Volūda”, izsludynoj rodūšūs rezideņču literaturā, volūdnīceibā i Latgolys pietnīceibā programu. Jamā četrim autorim voi rodūšajom apvīneibom tiks dūta vareiba izmontuot rezideņci, rodūt dorbus, kas veicynuos latgalīšu volūdys, literaturys i latgalistikys atteisteibu i populariziešonu.

Jaunuo rezideņču programa paradzāta latgaliski rokstūšim literatim, tulkuotuojim, žurnalistim, scenaristim, latgalīšu volūdys, literaturys i Latgolys kulturys pietnīkim, tymā vydā ari uorzemu literatim, kas roksta latgaliski, voi uorzemu literatim i pietnīkim, kas roksta ap Latgolu voi pietej Latgolys kulturu voi tulkoj nu/iz latgalīšu volūdu. Programys mierkis ir veicynuot latgalīšu volūdys, literaturys i latgalistikys atteisteibu i populariziešonu, nūdrūsynojūt platformu augstvierteigu daildorbu latgalīšu volūdā i Latgolai veļteitu pietejumu pīaugumam.

Vīns daleibnīks (voi rodūšuo apvīneiba) rezideņci var izmontuot da 10 dīnu. Paradzāts, ka kalendarajā godā programu varēs izmontuot četri daleibnīki – literati, žurnalisti, scenaristi, pietnīki voi tulkuotuoji. Diveji daleibnīki ir īprīškejuo gods publiskūs latgalīšu literaturai veļteitūs konkursu “Latgolys prozys skaitejumi” i latgaliskais dzejis slams “Rogovkys dzejis voga” uzvarātuoji, kas ituo gods programā ir Inga Kaļva-Minina i Silvestrs Solovjevs, bet diveji daleibnīki tiks nūsaceiti publiski izsludynuotā rezideņču programys konkursā. 2025. gods rezideņcem daleibnīki var pīsasaceit da 24. marta, nūsyutūt eisu motivacejis viestuli i plānuotuo rodūšuo dorba īvierzi (da 2000 zeimu) iz muiza@luznava.lv.

Rezideņču programa latgalīšu literaturā, volūdnīceibā i Latgolys pietnīceibā paradz daleibnīka uzaturiešonys (naktsvīta, iesšona) i rodūšuos darbeibys (stipendeja 200 eiro apmārā) izdavumu segšonai. Rezideņcis daleibnīku aizdavums pusgoda laikā piec rezideņcis nūslāguma ir sagataveit publikaceju (literarū dorbu, juo fragmentu, dzejūļu kūpu, rokstu voi cytu dorbu atbiļstūši sovai puorstuovātajai nūzarei) latgalīšu kulturys ziņu portalam lakuga.lv, veicynojūt rodūšuo darba daīmameibu plotuokai sabīdreibai i latgalīšu rokstu volūdys voi Latgolai veļteitys tematikys populariziešonu. Atbiļstūši rezidenta interesem i gribiešonai, īprīšk sarunojūt, muiža pīduovoj vareibu nūdrūsynuot rodūšuos darbneicys, sasatikšonu ar kūpīnu, autorvokora nūtikšonu, īkļaunūt jū muižys kulturys pasuokumu programā rezideņcis nūslāgumā voi cytā laikā da atteiceiguo kalendaruo gods gola.

Lūznovys muižys kulturys projektu vadeituoja Inga Žirgule, aicynojūt izmontuot jaunū programu, soka: “Lūznovys muižā jau par tradiceju ir palykušys kasgadejuos literarūs sarunu sasatikšonys reizis, kuruos ap literaturu nūteik sarunys ar latgaliski i latvyski rokstūšajim autorim, publicistim, tulkuotuojim. Atsaverūt muižys viesturē, rodūšumu atbolsts i ryupis par kulturys ļaudim ir bejuse muižys saiminīku dziļuokuo puorlīceiba i miseja. Myusu dīnuos Latvejā kasgadejs atbolsts literatim rezideņču veidā ir īdybynuots, par pīmāru, Ventspilī, Dubultūs i cytur, bet Latgolā itaidys vareibys palikt kaidā eipašā vītā i radeit, raksteit, tulkuot nav. Deļtuo ruodejuos, ka Lūznova ar sovu viesturyskū auru, myusu dīnu eleganci i komfortu, ar dobys parka īdvasmojūšū dzeiveibu i klusumu ir eistynuo vīta rezideņcem latgaliski i ap Latgolu rokstūšim autorim. Ar laiku ite gribīs radeit taidu kai latgalīšu volūdys sātu.”

Latgalīšu kulturys kusteibys “Volūda” literaruos jaunradis latgaliski veicynuošonys programys projekta vadeituoja Edeite Laime, turpynojūt dorbu pi vysaidu veidu literaruos jaunradis latgaliski atbolstam, prīcojās par sadarbeibu i jaunū vareibu, sokūt: “Turim nūceju, ka jaunuo rezideņču programa paliks par vēļ vīnu impulsu latgaliskūs dorbu tapšonai. Prīcojamīs, ka itū vareibu varēs izmontuot jau nūteikūšu literarūs konkursu uzvarātuoji, kuri spraigā saceņseibā ir aplīcynuojuši sovu dorbu kvalitati. Gribīs, lai jim ir vēļ vīna vareiba dorbu turpynuot, kab latgaliskuo kulturtelpa palīk boguotuoka!”

Jaunuo rezideņču programa paradz, ka vīnlaiceigi muižā varēs byut diveji rezideņču daleibnīki, par rodūšuo dorba periodu īprīšk vīnojūtīs ar Lūznovys muižu. Rezideņču programu finansiali atbolsta Vaļsts kulturkapitala fonds, Rēzeknis nūvoda pošvaļdeiba i latgalīšu kulturys kusteiba “Volūda”. Plotuoka informaceja par dasasaceišonu i rezideņču nūtikšonu ITE.