Vakar, 18. martā, piec smogys slimeibys myužeibā nūguojs muokslinīks, Latvejis Muokslys akademejis (LMA) Latgolys filialis asociātais profesors Vjačeslavs Fomins. Slavikam, voi kai jū daudzi pazyna – Bitty, beja spāks i maigums, lela mīlesteiba i racionals pruots, jautreiba i dzili mekliejumi piec patīsuo. Jis beja tyvs draugs i atbolsts daudzim gryutā šaļtī, viestej juo kolegi.

Vjačeslavs Fomins ir dzims i audzs Ludzā. Piec Ludzys 2. vydsškolys beigšonys Rēzeknis Muokslys tehnikumā vuicejuos kūktieļnīceibu. 2006. godā dabuojs LMA magistra gradu grafikā.

Jis dzili nūviertēja sovu seņču, eipaši vactāva, zynuošonys i dareja vysu, lai sovys prasmis nūdūtu tuoļuok. Vjačeslavs struoduojs ar jaunim talantim vysūs muokslys izgleiteibys pūsmūs: ar bārnim Jura Soikāna Ludzys muokslys školā, ar jaunīšim MIKC Latgolys Muzykys i muokslys vydsškolā i ar grafikys studentim LMA Latgolys filialē. Jis atroda kūpeigu volūdu ar vysim i eipaši prīcuojuos, sovu audziekņu acīs radzūt interesi i dzierksti.

Slaviks cīši struoduoja, dareidams sovu kasdīnys dorbu, bet sirdī ilguojuos piec gora breiveibys i vīnatnis. Taiduos šaļtīs jis guoja dobā – pi kaida azara giut zivs.

Kai fotografs Vjačeslavs beja vairuoku muokslys gruomotu leidzautors. Jis beja breineigs klasiskūs grafikys tehniku meistars, itū prasmi eistynojūt sovūs muokslys dorbūs. Bitty radeja breineigys šaržys, atkluojūt kotra cylvāka raksturu caur humoru.

Ar Vjačeslavu i juo daiļradi vari īsapazeit vīnā nu Sandrys Poplavskys aba muokslineicys Sanri raidejumu cykla “As asmu muokslinīks” serejom.

Portals lakuga.lv izsoka dziļu leidzjiuteibu Vjačeslava saimei, dorba bīdrim i tyvajim cylvākim itamā sāru šaļtī.

Seikuoka informaceja par izvadeišonu tyvuokajā laikā tiks publicāta LMA Latgolys filialis Facebook lopā ITE.