Rokstu sagataveja: portals lakuga.lv

Nu 24. da 27. marta Rēzeknis SPA centrā nūtiks storptautyskys muokslys forums “Crossroads X Krustceļi”, kurs puļcēs muokslinīkus, kuratorus, sabīdryskūs aktivistus, uzjiemiejus i rodūšūs industreju puorstuovus, kab kūpeigi dūmuot par muokslys i kulturys jūmu regionalajā atteisteibā, sabīdreibys salīdiešonā i inovaceju veicynuošonā. Forums pīduovuos rodūšuos darbneicys, lekcejis, paneļdiskusejis, taipoš ari Latvejis Muokslys akademejis (LMA) Latgolys filialis studentu i pasnīdzieju dorbu izstuodi “Plunkšķis”, viestej organizatoru sagataveituo informaceja. Forumu aicynuots apmeklēt sevkurs interesents, ari tī ļauds, kurūs kasdīna nav saisteita ar muokslu. Svareigi pastreipuot, ka īīšona vysuos treis foruma dīnuos, kai jau SPA centrā, byus ar baseina čībeņom.

Latgola ir regions ar spieceigu kulturys identitati, tok tei ir ari izaicynuojumim boguota vide, kur sova ceļa īšona prosa spāku, speitu i naatlaideibu. Kab atteisteit rodūšu darbeibu, vajadzeiga drūsme vērtīs plotuok, apvīnojūt vītejuos sovpateibys ar globalom tendencem, taišni deļtuo forums “Crossroads X Krustceļi” ir veiduots kai platforma pīredzis apmaiņai i sadarbeibys veiduošonai muokslinīku, kulturys nūzaris profesionaļu i rodūšūs industreju puorstuovu vydā. Tei ir vareiba izceļt muokslys i kulturys nūzeimi regiona atteisteibā, radeit jaunys inovacejis i styprynuot Latgolys muokslinīku byušonu kluotyn kai vītejā, tai ari storptautyskā kontekstā, viestej organizatori.

Ite eipaša lūma ir LMA Latgolys filialei – nūzeimeigam augstuokuos izgleiteibys centram regionā, kas snādz jaunajim muokslinīkim i dizainerim vareibu atsateisteit tepat, Latgolā. Forums ir vīns nu veidu, kai skaļuok paruodeit filialis nūzeimi na tik muokslu izgleiteibā, tok ari regiona atteisteibā, taipoš ari īzeimejūt tū kartē kai vītu, kas rūsynoj rodūšumu, inovacejis i kūpīnu sadarbeibu. Kai pastreipoj LMA Latgolys filialis vadeituoja asistents Raimonds Platacis, itys forums sovā ziņā ir veids, kai apguozt baili i baumys par Latgolys filialis potencialū sliegšonu, pastreipojūt, ka filialis spākūs ir nūdrūsynuot augsta leimiņa pasuokumus, runuot par muokslu i byut par centru, kas iniciej taida veida saīšonys. Jis ari dasoka, ka forums ir kai platforma, kura apvīnoj i ļaun diskutēt par muokslys nūzeimeibu piļsātā, nūvodā i vysā regionā.

“Ar itū nūtikšonu mes kai filiale eistyn varim sevi īzeimēt kai svareigus kulturys i muokslys iniciatorus. Pats forums sastuov nu vairuoku bloku. Suokumā par muokslu tiks runuots vyspuoreigai, pastreipojūt sadarbeibu ar organizaceju “Follow.art”, kas deļ foruma nūdrūsynuos lektorus nu Londonys i Berlinis, kurī stuosteis par tū, kai teik uzrunuoti muokslinīki nu regionu. Latgolys kontekstā varēs dasadūrt pi vaicuojumu par tū, voi mums ir talanti, īspiejis i vareiba tūs atteisteit, kai jī myus radz nu molys. Taipoš pyrmajā daļā runuosim par kuratorim i muokslys pasauli kai taidu aba kai tymā vyss funkcionej. Ūtrajā satura blokā mes runuosim kokreti par latgalīšim, te byus Rotko muzeja Daugovpilī puorstuovs Aivars Baranovskis, taipoš ari nu Latgolys īmūši muokslinīki, kurī ir sevi pīruodejuši plotuokā mārūgā, jī pastuosteis par sovu muokslys kasdīnu i tū kai vierzej procesus. Te ari kotram lektoram tyka dūts aizdavums izdūmuot, kas ir juo latgaliskais aspekts, kas jam paleidz radeit muokslu. Trešais satura bloks byus leluo paneļdiskuseja, kurā plotuokā leiminī raudzeisim runuot, par tū kaida ir sadarbeiba dažaidu instituceju vydā, i raudzeisim atrast, voi ir vēļ kaidi krystceli, kas da šam nav realizāti i mes nimoz naasam īsadūmuojuši, ka taidi varātu byut. Paneļdiskuseju vadeis riezeknīts muokslinīks i literats Svens Kuzmins, kuram byus truopeigi i osi vaicuojumi. Turim nūceju, ka diskuseja saīs eista, par svareigim vaicuojumim, kuri da šam varbyut nav tik daudz cyluoti,” stuosta Raimonds Platacis.

Foruma rodūšuos darbneicys nūtiks treis dīnys, i tuos eistynuos cylvāki, kuri ir cīši saisteiti ar Latgolu. Leidza dorbuotīs aicynuoti vysi Rēzeknis dzeivuotuoji i piļsātys gosti, naatkareigi nu tuo, voi jūs kasdīna ir saisteita ar muokslu. Foruma darbneicys byus atvārtys sevkuram, kurs gribēs īsasaisteit, īsadvasmuot i paplašynuot redzīni.

Sevkuram interesentam vēļ da 23. marta ir vareiba dasasaceit daleibai rodūšajuos darbneicuos, tū var izdareit ITE. Daleiba forumā ir bez moksys, tok juojam vārā, ka dalinīku skaits ir īrūbežuots. Svareigi atzeimēt, ka īīšona vysuos treis foruma dīnuos, kai jau SPA centrā, paradzāta ar baseina čībeņom. Nūtikšonys byus latvyski, angliski, nūdrūsynojūt sinhronū tulkuošonu. 27. martā forums tiks translāts ari tīšsaistē portalā LSM.lv. Pylnu nūtikšonu programu meklej ITE.

Forumu “Crossroads X Krustceļi” organizej LMA Latgolys filiale sadarbeibā ar “British Council” puorstuovnīceibys Latvejā atbolstu, sovpus Rēzeknis pošvaļdeiba i Latgolys viestnīceiba “Gors” snādz byutysku īguļdejumu foruma tapšonā, nūdrūsynojūt telpys i tehniskū apreikuojumu.