Rokstu sagataveja: portals lakuga.lv

23. martā pieški myužeibā nūguojs Kruoslovys Viesturis i muokslys muzeja dybynuotuojs i ilggadejs direktors Valdemārs Gekišs (1953-2025), viestej informaceja Kruoslovys nūvoda muzeja socialajūs medejūs. Jis beja izcyla personeiba muzeju nūzarē, veļtejs tai gondreiž 50 godu nu sovys dzeivis.

Valdemārs Gekišs dorbu muzeju jūmā suoce 1977. godā, kod īsasaisteja jaunuos Daugovpiļs Nūvodpietnīceibys i muokslys muzeja Kruoslovys filialis dorbā. Ar sovu degsmi i naatlaideibu jis dreiži viņ tyka par eistu nūzaris profesionali. 1983. gods 1. janvarī, puorveidojūt filiali par patstuoveigu Kruoslovys Viesturis i muokslys muzeju, Valdemārs tyka īcalts par tuo direktoru, i itymā omotā jis struoduoja leidz 2023. godam.

Muzeja kolektivs nūruoda, ka atzineigai nūviertej Valdemāra Gekiša lelū dorba pīredzi kulturys jūmā, juo organizatoriskuos spiejis i atbiļdeibys sajiutu, kas veicynuojs i poša, i kolegu personeibys izaugsmi i pylnveiduošonūs.

Juo mierktīceiba, zynuošonys i organizatoriskuos prasmis padarejušys muzeju par Kruoslovys kulturys dzeivis naatjemamu daļu. Muzeja kruojums sasnīdzs īspaideigu 26 000 vīneibu apjūmu, kas atspīgeļoj Kruoslovys nūvoda sovpateibu i unikalū viesturi.

Kolegi roksta, ka Valdemārs bejs na tik izcyls vadeituojs, tok ari cylvāks ar lelu sirdi. Juo spieja salīdēt kolektivu i vierzeit tū iz kūpeigu mierku sasnīgšonu ir davuse palīkūšu īguļdejumu Latvejis kulturys montuojuma saglobuošonā. Juo vadeibā muzejs eistynuoja daudzus nūzeimeigus projektus, attaiseja jaunys ekspozicejis, izdeve vierteigus izdavumus i radeja muokslys i tematiskuos izstuodis, kas prīcynuoja i vītejūs dzeivuotuojus, i gostus nu tuolīnis.

26. martā Kruoslovys Meža kopu kapleicā 17.30 stuņdēs nūtiks saļmu dzīduošona par aizguojieju. 27. martā 8 stuņdēs reitā Kruoslovys Sv. Ludvika Romys katuoļu bazneicā nūtiks bēru Svātuo Mise. 27. martā 13.00 stuņdēs Meža kopu kapleicā byus atsavadeišona nu Valdemāra Gekiša. Zemis kliepī jis tiks guļdeits sūpluok dzymdynuotuojim vacajūs Kruoslovys katuoļu kopūs Rēzeknis īlā.

Portals lakuga.lv izsoka leidzjiuteibu Valdemāra Gekiša saimei, kolegim i cytim tyvajim cylvākim.