Rokstu sagataveja: portals lakuga.lv

Rēzeknis nūvoda Nautrānu apvīneibys puorvaļde i latgalīšu kulturys kusteiba “Volūda” izsludynoj kasgadejū dzejnīkam Pīteram Jurciņam veļteitū literatu konkursu. Šūgod konkursā kai jauni, tai pīredziejuši literati aicynuoti īsnēgt dorbus humoreskys, dzejis i bārnu literaturys žanrūs. Dorbus var īsnēgt da 8. juņa, bet uzvarātuojs kotrā nu treju kategoreju tiks paziņuots tradicionalajā Pīterdīnys pasuokumā Rogovkā 29. junī.

Literarais konkurss, lai gūdynuotu dzejnīka, izcyluo nūvodnīka Pītera Jurciņa pīmiņu, aizasuoce 2004. godā i niu palics par īrostu kulturys nūtikšonu goda daļu, Pīterdīnys pasuokumā Rogovkā, izceļūt ari myusu dīnu literatu dorbus. Pīters Jurciņš (1932–2004) beja labi pazeistams kai dzejnīks, tai i jaunūs literatu atbaļsteituojs. Ka pārnejā godā pyrmū reizi konkursā reikuotuoji aicynuoja pīsadaleit ar dramaturgejis dorbim, tod itūgod sūpluok dzejai i bārnu literaturai konkursa dalinīki aicynuoti paraudzeit humoresku žanru latgaliski. Konkursa dorbim nav kaida vīna temata, bet dreikst īsadvasmuot nu Jurciņa dzejūļa “Sirds i aste” fragmenta i ituo gods konkursa moto: “Dzeive vysim suoteiga, bet nav vysim pruoteiga”.

Pīteram Jurciņam veļteitais literatu konkurss ir daļa nu literaruos jaunradis latgaliski veicynuošonys pasuokumu programys, kurei par aktivitatem 2024. godā sajēme ari Latgalīšu kulturys goda bolvu “Boņuks 2024”. Programā, kuru atbolsta Vaļsts kulturkapitala fonds i kurys mierkis ir veicynuot jaunu literarūs dorbu latgaliski radeišonu, 2025. godā paradzāti treis literarī konkursi – niu izsludynuotais P. Jurciņam veļteitais konkurss, dzejis slams “Rogovkys dzejis voga”, kai i sadarbeibā ar Latvejis Rakstnīku savīneibu i festivalu “Prozas lasījumi” par tradiceju palykušais konkurss “Latgolys prozys skaitejumi”.

“Pīters Jurciņš raksteja dzeju, kuruos vydā ari dzejūli bārnim, spēlēja teatri, muzicēja i dzīduoja, deļtuo ituo gods konkursā aicynojam jaunus i pīredzejušus literatus pīsadaleit itamuos vysuos Jurciņa izpausmēs – raksteit dzeju, dorbus bārnim, kai i paraudzeit humoresku žanru, simboliski dūmojūt par humoru, kas beja naiztryukstūša literata dzeivis daļa,” par P. Jurciņam veļteituo konkursa vierzīni itūgod soka Nautrānu pogosta kulturys pasuokumu organizatore Inga Vigule.

Konkursam jaunus, da ituo napublicātus dorbus voi jūs fragmentus kaidā nu treju kategoreju – dzeja, humoreska voi literatura bārnim – literati aicynuoti īsyuteit da 8. juņa elektroniski latgalīšu kulturys kusteibai “Volūda” iz e-postu: literatura@voluda.lv ar nūruodi “Literatu konkurss 2025”. Dorbus vērtēs vysmoz treis eksperti, bet uzvarātuoju kotrā nu kategoreju paziņuos Pīterdīnys pasuokumā Rogovkā 29. junī, kod tiks gūdynuoti Nautrānu pogosta Pīteri, kurūs vydā ari Pīters Jurciņš. Lobuokūs dorbu autori kotrys sajims premejis 100,00 eiro apmārā nu Nautrānu apvīneibys puorvaļdis, kai ari atleidzeibu par dorba (voi juo fragmenta) publikaceju nu latgalīšu kulturys ziņu portala lakuga.lv 200,00 eiro apmārā.

Ar pylnu Pīteram Jurciņam veļteituo literatu konkursa nūlykumu var īpasazeit ITE.