Rokstu sagataveja: portals lakuga.lv

Folkmetala grupa “Varang Nord” turpynoj radeit muzyku latgaliski. Itūreiz topuse jauna dzīsme ar nūsaukumu “Ašņa ausma”, taipoš grupa izsludynuojuse akustiskū koncertu 24. majā, Daugovpiļs Universitatis koncertzālē aba kulturvītā “V–13”, viestej grupys socialajūs medejūs izplateituo informaceja.

Sasazynojūt rakstiski, grupys “Varang Nord” puorstuovi stuosta, ka jaunuo dzīsme “Ašņa ausma” ir jauna nūdaļa grupys viesturē: “Mes palīkam arviņ smoguoki, tok sasagloboj myusu melodiskums.”

“Jaunuo dzīsme ir spieceigs i sirdeigs skaņdorbs, kas paruoda myusu styngrū grybu īkaruot metala pasauli i pataiseit durovys iz jaunu godu i plotuokom īspiejom. Dzīsme viestej par ausmu, kas apspeid kuovis aba kaujis lauku, reita dabasu molys sorkonī tūni atsaspīgeļoj ar ašni nūplyudušajā zemē. Iz zemis guļ symtim karaveiru ar acim pavārtom iz augšu, apleik jau riņčoj pyrmī kraukli. Sastynguši piersti īsagivuši salauztūs škāpu spolūs, drāgnys viejs plivinej korūgu skrandys. Vēļ vakar reita ausma nese jaunu dīnu i cereibys, tok tādiņ atkluoj tik nuovi i pūstu,” tai dzīsmi aproksta grupys puorstuovi.

Dzīsmis “Ašņa ausma” teksta autori ir Artjoms Kuricins i Maksims Popovs, muzykys autori – Maksims Popovs i Jeļena Kaļniša.

Sovpus 24. majā Daugovpiļs Universitatis koncertzālē aba kulturvītā “V–13” sevkurs teik gaideits iz eipašu akustiskū koncertu, kur grupys dzīsmis varēs dzierdēt pavysam jaunā skaniejumā – bez distorsejis, tok ar sirdi i dvēseli. “Pādejūs godu laikā asam spielejuši daudz spieceigu setu festivalūs i iz lelu skotivu, tok niu gribim pasadaleit ar klauseituojim cytā “Varang Nord” veidūlā – klusuokā, syltuokā i tyvuokā. Mes niu gatavejam eipašys versejis sovom jau zynomajom dzīsmem, taipoš ari izpiļdeisim kompozicejis nu myusu akustiskuo mini albuma “Veļi”. Tys byus pyrmais akustiskais koncerts, kas pataiseis vuortus iz jaunu myusu pasauli,” stuosta grupys dalinīki. Jī ari darunoj, ka grybātu itaidu programu īvīst ari darbeibā iz prīšku.

Koncertā kai gosti byus muzyki, kas spieļoj tausteņinstrumentus, vejūli i pyušaminstrumentus, tok cikom kas vēļ teik maklāts idealais skaniejums i sadarbeibys formys, deļtam sevkurs byus gaideits iz pošu koncertu, kab pasaklauseit “Varang Nord” jaunā skaniejumā. Beletus var nūpierkt ITE.

Folkmetala grupa “Varang Nord” ir dybynuota 2014. godā. Jī poši sevi sauc par Latgolys soltūs mežu grupu. “Varang Nord” apvīnoj skorbūs death metala rifus ar episkom akordeona dzīsmem, rodūt unikalu zīmeļu poguonu/folk metala sajaukumu. Jūs dzīsmis slavej varonu kauju, ašņainu uperi vacajim dīvim i prīceigu zīmeļu mīlasti ar nabeidzamim ols žbanim.