Rokstu sagataveja: portals lakuga.lv

Piec gavieņa, kod Latgolys kulturys dzeive vys vēļ tradicionali drupeit pīklususe, Leldīne atīt ari ar ļustiešonu i sasatikšonu vysaiduokūs pasuokumūs. Ari itūgod piļsātuos i pogostūs natryukst koncertu, izruožu i cytu aktivitašu Leldīnis svieteišonai. Portals lakuga.lv īsoka pīcys latgaliskys nūtikšonys pīcūs dažaidūs Latgolys nūvodūs.

Leldīne Juosmuižā vysai saimei

Preiļu nūvodā leluo Leldīnis svieteišona gaidoma Juosmuižys parkā, Aizkaļnis pogostā. Tī byus kai vysaiduoku amatermuokslys kolektivu (folklorys kūpa “Turki”, deju kolektivs “Dancari”, folklorys kūpa “Rūtoj”, Rūžkolnu teatris “Kō ir, tō ir”) koncerts, tai piečuok ari postfolklorys grupys “Rikši” uzastuošona. Paraleli tam nūtiks ari sporta aktivitatis, kaušonuos ar ūlom i tūs kruošona, byus ari amatnīku i mozūs ražuotuoju tierdzeņš.

“Mozuo tradiceju škola mozajim” Ondrupinē

Ondrupinis lauku sātā, Kruoslovys nūvodā, ari itūgod kotru mienesi nūteik “Mozuos tradiceju školys mozajim” aktivitatis. Taida byus ari Pyrmajā Leldīnē – ar Leldīnis dzīsmem, spēlem, rūtaļom, šyupuošonūs, kaušonūs ar ūlom, tūs rypynuošonu i dancynuošonu.

Etnografiskuo ansambļa jubileja

Ludzys nūvoda Pušmucovys pogostā Leldīnē byus dubultsvātki – 45 godu jubileju ar koncertu “Skaņu baļsteni palaižu pavasara vokorā!” svieteis Pušmucovys etnografiskais ansamblis “Olūti”.

“Palādu” izruode Baļtinovā

Vysi Baļtinovys amaterteatra “Palādas” cīneituoji Leldīnē var drūsai dūtīs iz Bolvu nūvoda Baļtinovu – tī “Palādas” itūreiz ruodeis izruodi “Ontana tragedeja”. Piec tuos varēs izaļustēt ari ballē.

Tradicionaluo Leldīne Dekšuorēs

Rēzeknis nūvoda Dekšuoru pogosta estradē gaidoma Leldīnis svieteišona, kurā varēs kruosuot ūlys, pīsadaleit tūs rypynuošonā, kautīs ar ūlom, puškuot leigačys, viļkt viervi, kai ari pīdzeivuot guņs ritualu. Pasuokums teik organizāts, sasadorbojūt ar Latgolys tradicionalū kulturys centru “Latgaļu sāta”.