Rokstu sagataveja: portals lakuga.lv

Latvejis Nacionalais kulturys centrys taisa latvīšu viesturyskūs zemu i lībīšu vierteibu sarokstus, kas piečuok tiks publicāti vysaiduos škārsteikla platformuos i integrāti pasuokumūs, kab caur vītejūs dzeivuotuoju skotu paruodeitu sabīdreibai kotrys latvīšu viesturyskuos zemis unikalitati, informej Latgolys vierteibu kanona sataiseišonys koordinatore Inga Vigule.

Latvīšu viesturyskuos zemis – Vydzeme, Latgola, Kūrzeme, Zemgale i Sieleja – ir viesturyskys Latvejis dalis, kuruos raksturoj unikala kulturviesturyskuo vide i tuos dzeivuotuoju kūpejuo identitate. Latvīšu viesturyskajuos zemēs iz kuršu, latgaļu, sieļu i zemgaļu senejūs tautu, kai ari senejūs pyrmadzeivuotuoju – lībīšu – kulturys i volūdys bāzis veiduojusēs latvīšu naceja.

Kotrā latvīšu viesturyskajā zemē ir sovys unikalys i atškireigys latvīteibys īzeimis, tradicejis, volūdys paveidi, kai ari sovpateiga kulturviesturyskuo vide. Latvīteibys īzeimu daudzveideiba, divejis latvīšu rokstu volūdys tradicejis, latvīšu viesturyskūs zemu kulturviesturyskuo vide i tuos ilgtspieju veicynūšuos vītejūs kūpīnu uzturātuos kulturtelpys ir latvīšu nacejis kūpeja boguoteiba.

Kab sataiseitu Latgolys kulturys vierteibu sarokstu, teik aicynuots dasaceit vierteibys, kuruos poši latgalīši skaita par Latgolys kulturys styurakminim kaidā nu nūzaru – tautys tradicejuos, arhitekturā i dizainā, skotivis muokslā, vizualajā muokslā, literaturā, muzykā, kinā i ainovā, kas ir svareigys Latgolai, veidoj tuos sovpateibu voi atškir tū nu cytu Latvejis nūvodu. Vierteibu sarokstā dreikst īsaceit ari Namaterialuo kulturys montuojuma sarokstā īkļautuos vierteibys, kai ari vierteibys var byut vyspuorynuotys voi ari taišni ūtraiž – konkretizātys. Vierteibys var dasaceit i fiziska, i juridiska persona.

Vierteibu īsacejumi tiks apkūpuoti da ituo gods vosorys beigu, piečuok tūs izviertēs speciali veiduota komiseja, kab tyktu pi vīnuota, izstruoduota vierteibu saroksta kotrai viesturyskajai zemei, kai ari lībīšim.

Dasaceit Latgolys vierteibys var anketā ITE.