Rokstu sagataveja: portals lakuga.lv

Sastdiņ, 26. aprelī, nūtiks skotuvis runys konkurss “Vuolyudzāni” i atkluotuo latgalīšu volūdys i kulturviesturis olimpiade. Par tradiceju 25 godu garumā palykušūs latgalīšu volūdys i kulturys populariziešonys pasuokumus organizej Latgalīšu volūdys, literaturys i kulturviesturis školuotuoju asociaceja sadarbeibā ar Rēzeknis Tehnologeju akademeju, Rēzeknis nūvoda pošvaļdeibu i Latgalīšu kulturys bīdreibu, kai ari Rēzeknis Vaļsts 1. gimnazeju.

Latgalīšu volūdys, literaturys i kulturviesturis školuotuoju asociacejis vadeituoja Veronika Dundure pīzeist: “Skotuvis runys konkurss “Vuolyudzāni” i atkluotuo latgalīšu volūdys i kulturviesturis olimpiade veicynuoja jaunīšu interesis atdzimšonu par latgalīšu volūdu, par sovu nūvodu. Latgalīšu volūda ir latvīšu volūdys paveids, tei paleidzēja saglobuot latvyskumu Latgolā puorkrīvuošonys i puorpūļuošonys laikā”.

Eiropys Parlamenta deputate Inese Vaidere itūgod byus ituo pasuokuma patronese. Jei olimpiadis uzvarātuoju komandai, tuos školuotuojam, kai ari runys konkursa uzvarātuojam vydsškolys klašu grupā duovuos braucīņus iz Briseli. Vaidere pastreipoj: “Latgalīšu volūda ir svareiga latvīšu nacionaluos identitatis sastuovdaļa, kas kūpama, sorgojama i nūdūmama paaudzem iz prīšku. Pa munam, ari školā zynomu laiku byutu juoveļtej myusu dialektim, kam tī ir miļzeiga boguoteiba. Aicynoju saimis Latgolā sātuos runuot latgaliski, tod kotrys Latgolys bārns sūpluok latvīšu volūdai labi runuos latgalīšu volūdā”.

Skotuvis runys konkursa mierkis ir styprynuot nacionalū identitati, veidojūt izpratni par latgalīšu autoru vuorda muokslu, latgaliski raksteita teksta vierteibu, izteiksmeibu, i izkūpt latgalīšu volūdu. 26. aprelī skotuvis runys konkursā pīsadaleis 64 školāni nu 35 Latgolys izgleiteibys īstuožu, kai ari nu Tukuma J. Raiņa Vaļsts gimnazejis i Tukuma E. Birznieka–Upīša 1. pamatškolys.

Atkluotuos latgalīšu volūdys i kulturviesturis olimpiadis mierkis ir školu jaunuotnis vydā popularizēt Latgolys kulturys montuojumu i veicynuot kulturys vierteibu i izcyluokūs nūvadnīku apzynuošonu. Itūgod olimpiādē pīsadaleis septenis vydsškolānu komandys nu Baļtinovys vydsškolys, Drycānu vydsškolys, Kruoslovys Vaļsts gimnazejis, Ludzys piļsātys vydsškolys, Nautrānu vydsškolys, Rekovys vydsškolys i Viļānu vydsškolys. Olimpiade nūteik pīcuos kuortuos, kuruos jaunīši atbiļdēs iz 20 vaicuojumim Latgolys kulturtestā, paruodeis latgalīšu rokstu volūdys prasmis i zynuošonys par izcylom Latgolys kulturpersoneibom: Pīteri Miglinīku, Nikodemu Rancānu i Ontonu Kūkuoju.

Jemūt vārā, ka latgalīšu rokstu volūda školā nav kai obligats vuiceibu prīškmats, bet tū vuicuos fakultativa voi interešu puļceņa nūdarbeibuos, itī pasuokumi nūstyprynoj izpratni par latgalīšu rokstu volūdu kai svareigu latvyskuos identitatis daļu, roda školānim interesi par latgalīšu volūdu i kulturviesturi.

Pasuokumu atbolsta latgalīšu kulturys kusteiba “Volūda”, Latgolys Kulturys centra izdevnīceiba, z/s “Kotiņi”, žurnals “A12”, Saeimys deputate Anna Rancāne ar 50 eiro naudys bolvom divejim lobuokajim skotuvis runys konkursa dalinīkim i Latvejis Universitatis profesore Lideja Leikuma ar bolvu uzvarātuoju komandai.