Rokstu sagataveja: portals lakuga.lv

Ituos nedelis īsacejumus latgalīšu kulturys ziņu portala lakuga.lv skaiteituojim sagatavejs Silvestrs Solovjevs – latgaliskuo dzejis slama “Rogovkys dzejis voga” pārnejuo gods uzvarātuojs, kurs niu izmontoj nūtikšonā dabuotū bolvu – rodūšuos rezideņcis laiku Lūznovys muižā, kab struoduotu pi sova pyrmuo dzejis kruojuma. Taipat Silvestrs ir ari apreļa vydā publicātuo Latvejis Radejis dokumentaluos žurnalistikys raidīroksta “Dokumentārijs” sereju “Augstspriegums” stuosta varūņs (raidīrokstu var nūsaklauseit i Silvestra stuostu puorskaiteit ITE).

“Napaseitynuots” stypram nedelis suokumam

Stypram nedelis suokumam īsoku nūsaklauseit grupys “Sovvaļnīks” trešū studejis albumu “Napaseitynuots”, kas publicāts 2016. godā diska i digitalā formā, bet piečuok izdūts i kai vinila plate. Īsoku albuma naviņ īslēgt fona, bet eistyn klauseitīs i īsadzilinuot kai muzykā, tai tekstūs. Pa munam, tys ir spylgts pīmārs, kas izjauc banalūs stereotipus par smogū muzyku. Agreseja var byut ari skaista, i aiz juos eistineibā ir lels emocionals dziļums. Bonusa punkti, ka saītu albumu klauseitīs kaidā atmosfereigā vītā Latgolā, par pīmāru, apīmūt apleik Kovšu azaram Rēzeknē. Itū albumu pats navaru klauseitīs ar sausom acim – pyrma mieneša ari iz sovys mīsys iztetovieju alternativū vuoka dizainu, partū niu mes ar itū šedevru asam saisteiti ar vysu myužu. “Napaseitynuots” nūdrūsynuos stypru energetiskū luodeņu, kam byus juoatrūn kaids produktivs pīlītuojums – par tū tiuleņ vēļ vīns īsacejums!

Byušona uorpus komforta zonys

Īsacejums, kū dareit ar energejis spāku, kū davuse stypruo muzyka, ir izkuopt nu sovys īrostuos komforta zonys i dareit kū izaicynojūšu. Tam nav juobyut nikam ekstremam (objektivi nūviertejūt apstuokļus) – pasaļt soltā dušā, aizīt iz sovu pyrmū treneņu voi beidzūt sasajimt drūsmis i paaicynuot TŪ meitini iz raņdeņu. Izslēgt vysys kritiskuos i analitiskuos dūmys i vīnkuorši tū izdareit. Puorvarēt sovu baili i saprast, ka vysi rūbeži pamatā ir pošu izlykti i varamī rezultati myusu pruotūs ir daudzi baileiguoki par realitati. Tai kai nav runys par golvys īlikšonu krokodila mutē voi liekšonu ar salto nu iudiņa krytuma, tod varit byut drūši, ka nanūmiersit – es apsūlu! Viereibu! Gondarejums, kas rūnās nu itūs liecīņu uorpus īrostuo, var paceļt pošviertiejumu i nūvest pi atkareibys nu ituos sajiutys.

Čurļoņa muzyka Lūznovys muižā

Maņ ruodīs, ka veseleigi reizi nu reizis izīt uorpus ari sovys meiluokuos muzykys ramu i padareit plotuoku sovu horizontu muzykys laukā. Kontrasti vysod dzeivi padora interesantuoku, partū piec smoguo metala klauseišonuos pi Kovšu azara aicynoju trešdiņ nūbraukt iz Lūznovys muižu – tī 30. aprelī byus koncerts “Veltījums Čurļonim”. Pasauļa pyrmatskaņuojums ar klavīru i čella saspieli, kas veļteita leitovīšu komponistam i muokslinīkam Mikalojam Konstantinam Čurļoņam. Programu atskaņuos komponista mozmozdāls pianists Roks Zubovs (Rokas Zubovas) i čellists Glebs Pišņaks (Gleb Pyšniak). Kasgods apreļa gols Lūznovys muižā paīt leitovīšu komponista muzykys i dorbu zeimē. Taipat tikū atkluota i da 1. juņa tīpat muižā apsaverama vēļ vīna Čurļoņam veļteita nūtikšona – izstuode “Čurļonis izšuvumos”.