Rokstu sagataveja: portals lakuga.lv

Volūdu sāta izdavuse dzejneicys Ligijis Purinašys trešū gruomotu – dzejprozys kruojumu “Magnificat”. Kai viestej izdevieju sagataveituo informaceja, autore jaunajā kruojumā īsasnādz feminuos byuteibys dzilīnēs ar vēļ nabejušu spāku. Jau ar īprīškejim dzejis kruojumim – “Sīvīte” i “pierobežas” – Ligija Purinaša sevi dasacejuse kai dzejniecu ar osu skotu i mēli, kura nasabeist saceit patīseibu tī, kur tei juosoka, i pajūkuot, ka tys vajadzeigs, reflektādama kai par Latgolai, tai vysai Latvejai aktualim problemvaicuojumim. Tok dzejprozys kruojumā “Magnificat” autore ir guojuse vēļ tuoļuok, atplāsdama varmūceibys traumys krevi i caur tū vārdamuos iz sīvītis poziceju Latgolā, Latvejā i vysā pasaulī. 

Kruojumu veidoj pīcys dalis, kuruos apsavārtys sīvītis attīceibys ar buozšonuos viersā pīredzi, ar dzymtū vītu, ar dzymdynuotuojim i cylvākim sūpluok, ar romantiskū partneri i gols golā ar sevi eistyn eksistencialā leiminī, apsazynojūt i pījamūt tū, ka “es” var tyvuotīs “cytam/cytim” tik da nūteikta rūbeža, kurū škārsojūt “es” vystik palīk vīns. Daudzus itaida apsazynuošona bīdynuotu i lyktu raudzeit saisteitīs ar cytim piec vareibys vaira, tok Ligija Purinaša pījam itū patīseibu ar pošapzineigu i pošironisku stoicismu, aplīcynojūt dzejis sīvītis spāku, kod jei palīk vīnatnē ar sevi, i taidā veidā attaisa telpu traumatiskūs vaicuojumu aktualiziešonai. Idejiskū kruojuma dziļumu i dzejis volūdys īdarbeibu pastyprynoj dzejprozys forma, kū īdvasmuojuse lyugšonu stilistika, kai ari smolkais, unikalais poetismys, kaids rakstureigs Ligijai Purinašai.

Nūsaukums “Magnificat” īt nu latiņu volūdā puorcalta slavynuojuma Jaunovai Marijai, atsasaucūt iz tekstūs izmontuotū lyugšonu stilistiku, kas saplyudynuota ar aktualom temom i kū spūdrai atainoj kruojumā īkļautuos muokslinīka Raivja Nikolajeva originalilustracejis. Kruojumu veidoj dzejproza latvīšu literarajā i latgalīšu rokstu volūdā.

Ligija Purinaša 2019. godā debitēja ar dzejūļu kruojumu “Sīvīte”, līceibu par sīvīti myusu dīnu Latgolā. Kruojums sajiems Latgalīšu kulturys goda bolvu “Boņuks 2019”, sovutīs 2020. godā nomināts Latvejis Literaturys goda bolvai kategorejā “Spūdruokuo debeja literaturā”. 2022. godā izguojs autoris ūtrais dzejūļu kruojums “pierobežas”. Ligija Purinaša roksta latgalīšu rokstu i latvīšu literarajā volūdā, sovutīs juos dzeja tulkuota angļu, vuocu i čehu volūdā.

Gruomota izdūta ar Vaļsts kulturkapitala fonda finansialu paleigu. Tuos redaktore ir Elīna Kokareviča, latgalīšu volūdys literaruo redaktore i korektore – portala lakuga.lv redaktore Laura Melne, muokslinīks – Raivis Nikolajevs, dizainers – Arcioms Savucins (Arciom Savucin). Gruomota pierciejim daīmama kai Volūdu sātā, tai leluokajūs gruomotu veikalūs vysā Latvejā.

Gruomotys atkluošonys pasuokums byus 12. majā 19.00 stuņdēs Volūdu sātā, Olūtu īlā 33, Reigā. Īīšona par breivu.