Rokstu sagataveja: portals lakuga.lv

Lai ari itei ir naparosta nedeļa, kam lelai daļai ļaužu pyrmūdīne bejuse breivdīna, bet sastdiņ juostruodoj, vysaiduoku pasuokumu natryukst ari nedeļgolā, kurā svieteisim Muotis dīnu. Portals lakuga.lv īsoka pīcys latgaliskys nūtikšonys dažaiduos Latgolys moluos.

Arņa Slobožanina koncerts Daugovpilī

Lai ari beidzamajā laikā par muziki Arni Slobožaninu vaira dzierdāts kai Daugovpiļs tymsi zyluo kora vadeituoju, kas kūpā ar televizejis šova “Koru kari” laikā izveiduotū kolektivu īroksta dzīsmis i plānoj vosorys koncertturi, nikur nav pagaisuse ari juo dorbuošonuos kai solomuokslinīkam. Jau reit, 9. majā, Daugovpilī, vīsneicys “Park Hotel Latgola” restoranā “Plaza” gaidoms Arņa akustiskais koncerts kūpā ar pianistu Vladimiru Šuvalovu. Programā – slovoni latvīšu i pasauļa muzykys hiti maigā akustiskā skaniejumā, autoru interpretacejis, kas roda jaunys sajiutys nu pazeistamu melodeju, kai ari, prūtams, grupys “Dabasu Durovys” popularuokī skaņdorbi.

Kapela “Bumburneicys” pogolma svātkūs Kubulūs

10. majā Bolvu nūvoda Kubulu pogostā byus pogolma svātki. Tūs laikā atkluos Dzintara Putniņa fotoizstuodi “36 kadri”, kai ari nūtiks vysaidys aktivitatis, tymā skaitā vītys nūsaukumam atbylstūšuo kubulu veļšona. Vokorā gaidoms ari Viļānu kulturys noma kapelys “Bumburneicys” koncerts, kam sekuos balle.

Pavasara večerinka Saļņovā

Vairuokuos Latgolys vītuos par tradiceju palykuse kasgadeja večerinkys reikuošona. Ari Ludzys nūvoda Saļņovā večerinkys nūteik pat divejis reizis godā – pavasarī i rudinī. Sastdiņ, 10. majā, byus pavasara večerinka, kurā pīsadaleis tautys muzykys vacmeistari i puornūvodu kapelys.

“Ļukade zyna vysu” Stabuļnīkūs

Īrostai Muotis dīnā teik reikuoti koncerti, tok īspiejamys ari cytaiduokys nūtikšonys. Preiļu nūvoda Stabuļnīku kulturys nomā itūs svātkus itūreiz svieteis ar sābru pogosta – Gaļānu – teatra kūpys “Punculīši” izruodi “Ļukade zyna vysu”.

Viļānu “Mada pūds” Nagļūs

Ari Rēzeknis nūvoda Nagļu pogostā Muotis dīna tiks svieteita ar gostu teatra izruodi – Viļānu kulturys noma amaterteatra “Kas ir, tas ir” īstudātū Annys Dančys komedeju “Mada pūds”. Tamā skateituoji varēs izzynuot, kai eista draudzeiba paleidz tikt uorā nu vysaidu naveiklu situaceju.