Rokstu sagataveja: portals lakuga.lv

Jaunīši vacumā nu 18 da 30 godu teik aicynuoti pīsadaleit “2×2” seminarā “Steiga”, kas nūtiks nu 3. da 9. augusta Aglyunā, informej seminara vadeituojs Ēriks Zeps. Seminaru organizej kusteiba “2×2”, i tuos mierkis ir radeit vidi, kurā sevkuram jaunam latvīšam ir vareiba pylnveiduot sevi Latvejis sabīdreibā i justīs pīdareigam sovai vaļstei.

Seminars “Steiga” pīduovuos daudzveideigu programu. Lekcejuos aba īvierzēs reita pusē tiks apsavārtys taidys temys kai volūda, lobsajiuta, folklora, biškūpeiba, dezinformaceja i politika. Pīredzē daleisīs volūdneica Aiga Veckalne, literate Arlita Laine Fedotova, dzejneica i pietneica Ilze Sperga, folkloriste Ginta Pērle-Sīle, biškūps Uģis Mālnieks i cyti sabīdreibā zynomi lektori.

Piecpušdīnis byus veļteitys rodūšim projektim, dalinīki varēs īstudēt improvizacejis teatra ainys kūpā ar režisori Lauru Čaupali, izgataveit sovu muzykys instrumentu pi meistara Aleksandra Maijera i pīsadaleit cytūs rodūšūs projektūs. Kotra dīna nūsaslēgs ar īmeiļuotom “2×2” tradicejom: “Talantu bez talanta” vokoru, daudzynuojumu, daņčim i kūpeigu sasadzīduošonu, kai ari sasatikšonu ar uzjiemeigim i īdvasmojūšim latvīšim. Seminars byus vareiba lauzt stereotipus par Latgolu, īpazeit tuos kulturu, viesturi i cylvākus. Dalinīki sajuss latgaliskū vīnkuoršeibu, sirsneibu i ciļvieciskumu.

“Kod 2019. godā Latgolā nūtyka pyrmais “2×2” seminars, tys beja kai ceļuojums cytā pasaulī – sasatikšona ar leidzeigai dūmojūšim i aizrauteigim jaunīšim nu vysa pasauļa i vīta, kur vari byut lapnys, ka esi latvīts. Itūgod eipaši aicynojam dasasaceit Latgolys jaunīšus, kam itei byus breineiga vareiba satikt cytam cytu – pīmāram, baļvinīšam satikt kruoslavīti, dorbuotīs kūpā i īpazeit Latgolu vēļ vaira,” par sovu “2×2” pīredzi stuosta seminara “Steiga” vadeituojs Ēriks Zeps.

Aglyuna kai seminara nūtikšonys vīta nav izalaseita najaušai. Seminars nūtiks Aglyunys Katuoļu gimnazejis apleicīnē – ākā, kas atguodynoj pili. Aglyuna ir cīši saisteita ari ar prīsteri, gimnazejis direktoru i cylvāku gluobieju Ūtruo pasauļa kara laikā Aloiziju Broku. Jis beja seminara vadeituoja Ērika Zepa vactāva muotis bruoļs.

Seminara programu veidoj Latvejis Uorlītu ministrejis civiluo eksperte Ukrainā Lolita Čigāne i zemissorgs i uzjiemiejs Nils Students. Latgolys jaunīši, kuri pīsadaleis “2×2” seminarā, var dasasaceit stipendejai.

Pyrmuos “2×2” nūmetnis nūtyka 20. godu symta 60. godūs Zīmeļamerikā, kab styprynuotu latvīteibu jaunīšu vydā, kuri dzymuši i auguši uorpus Latvejis. Nu 2015. gods vosorys “2×2” nūteik ari Latvejā, apvīnojūt Latvejā i uorpus tuos dzymušūs latvīšu jaunīšus. Pyrmais “2×2” seminars Latgolā nūtyka 2019. godā Augšdaugovys nūvoda atpyutys bāzē “Virogna”, bet 2024. godā nūtyka seminars piļsātvidē “Īspaids” Daugovpilī. Var par seminaru var izzynuot ITE.