Rokstu sagataveja: portals lakuga.lv

Itymā nedeļgolā vysi eipaši gaideiti ir muzejūs i bazneicuos – itūgod vīnā dīnā, 17. majā, byus kai Muzeju, tai Bazneicu nakts. Ituos nūtikšonys nalaist garum aicynoj ari Rotko muzeja Kruojuma departamenta vadeituoja Zane Melāne. Taipat jei atguodynoj, cik vierteigi īsaklauseit sovūs saimis stuostūs i izzynuot dzymtys viesturi.

Izdzeivoj Muzeju nakti Rotko muzejā!

Ar kūpejū vodmotivu “Myusu vierteibu stuosti” vysā Latvejā 17. majā nūtiks storptautyskuo akceja “Muzeju nakts 2025”. Rotko muzejs itūgod ir guoduojs par eipašu programu “es… māksla… mēs…”.  Apmaklātuojus puorsteigs na tik rodūšuos darbneicys, izcyli muokslys izstuožu projekti (tymā skaitā Latgolys regiona muokslinīku konkursa izstuode “Vēlēšanās”), tok ari Latvejis lapnuma, animacejis kinys “Straume” kinoseansa demonstraceja muzeja pogolmā i kinys prestižūs apbolvuojumu – “Zelta globuss” i Kinoakademejis bolvys “Oskars” – apsavieršona Rotko muzeja ākā. Vaira par tū var izzynuot ITE.

Īpazeisti sakralū montuojumu!

Sūpluok Muzeju naktei 17. majā byus ari goreiguos kulturys nūtikšona “Bazneicu nakts” i Attaiseitūs bazneicu dīna, kas dūd breineigu vareibu īpazeit Latgolys boguoteigū sakralū montuojumu, tikt pi jaunys pīredzis dīvnomūs i pabyut ar sevi dūmuos myusu dīnu intensivajā i nūtikšonom pīpiļdeitajā pasaulī. Vaira informacejis var pasuokumu ITE.

Veidoj sovu viesturi!

Sevkurs muzejs voi kolekceja suocās ar cylvāku, partū aicynoju itamā nedeļā pabyut kūpā ar saimi, īsaklauseit vacuoku pīredzē, uzklauseit i īraksteit vacvacuoku dzeivis stuostus, sakūpt radinīku atdusys vītys, sakuortuot saimis fotoalbumu voi laistīs jaunūs pīdzeivuojumūs, teikūt pi da šam nabejušys pīredzis voi prasmis, kū kruot sovā atmiņu skreineitē.