Rokstu sagataveja: portals lakuga.lv

13. junī Latgolys viestnīceibā “Gors” Rēzeknē gaidoms dzejis i muzykys vokors, kurā sasatiks muokslinīki ar sovpateigim skaniejumim i dažaidom pīredzem – latgalīšu literaruo andergraunda puorstuovs i multimuokslinīks Raibīs, myusu dīnu tautys muzykys grupa “Nielslens Lielsliens” i latvīšu komponiste i perkusioniste Vija Moore, viestej pasuokuma organizatori.

Pasuokumā fragmentus nu sovys gaidomuos gruomotys “Vysi vuordi” skaiteis latgalīšu literaruo andergraunda puorstuovs i multimuokslinīks Raibīs, cikom dzīsmis nu albuma “Negaidīti varoņi” atskaņuos myusu dīnu tautys muzykys grupa “Nielslens Lielsliens”, kurys sastuovā dorbojās Mareks Kaminskis (bungys, perkusejis, kilimandžaro i bolss) i Klāvs Kalnačs aba Siensliens (bolss, gitara, gembri, perkusejis, tausteņinstrumenti). “Nielslens Lielsliens” grupys koncerti izaceļ ar sirsneibu i draudzeigu ospruoteibu, nu vysaiduoku varūņu i oculīcinīku citatu veiduotī teksti izskaņ afrikaniski gaišuos i doncojamuos dzīsmēs, viesteits “Gora” nūtikšonys aprokstā.

Latgolys viestnīceibys “Gors” puorstuove i vīna nu pasuokuma idejis autorem Ilona Rupaine pasadola, kai roduos ituos nūtikšonys idejis aizmetni. “Grupa “Nielslens Lielsliens” ir cīši interesanta paruodeiba, kas iz Latvejis muzykys skotivis dorbojās jau nu 2009. gods. Grupys muziks Klāvs Kalnačs paraleli dorbojās ari grupā “Židrūns”, kura sovpus ir sasadorbuojuse i rakstejuse dzīsmis ar Raibuo tekstim, ari uzastuojuse 2021. gods Latgalīšu kulturys goda bolvā “Boņuks”, deļtam Klāvu Kalnaču mes zynim jau seņ. Pārņ grupai “Nielslens Lielsliens” izguoja catūrtais albums ar nūsaukumu ”Negaidīti varoņi”, albumā apkūpuotys interesantys dzīsmis, i mums roduos dūma, ka byutu labi grupu redzēt ari iz “Gora” skotivis.
Tod pārņ aprelī mes ari īpasazynom ar perkusionisti i komponisti Viju Moori, kura “Gorā” uzastuoja i ari beja muzykys autore dirigentis Andys Lipskys koncertizvadumam “Dziedināšana”. Sovpus Oskaru Orlovu aba Raibū mes zynim jau nu koncertzālis atkluošonys laiku.”

“Interesanti, ka Klāvam ar Oskaru jau da myusu īsajaukšonys beja vīnuošonuos sovā vydā, ka jī varātu nazkū kūpā sataiseit. Respektivi, saguoja, ka jī nu sovys pusis dūmuoja, ka varātu sasadorbuot, i mes sovpus gribiejom “Gorā” grupys koncertu. Tod es nazkai dazynuoju nu Oskara, ka jam itei grupa ir sirdei tyva i beigu golā topa ideja, ka varātu vysys ituos komponentis apvīnuot vīnā koncertizvadumā.” Ilona ari atkluoj, ka koncerta nūsaukums “Vysi vuordi negaidīti” ir salykums nu Raibuo gaidomuos gruomotys “Vysi vuordi” i grupys “Nielslens Lielsliens” jaunuokuo albuma “Negaidīti varoņi”.

“Raibīs i grupa “Nielslens Lielsliens” ir cīši sapaseigi, Raibīs puorstuov andergraunda stilu, sovpus grupa ir kai andergraunda tai ari indie styla puorstuovi. Tamā pat šaļtī jī ir par prīcu, drupeit par kaidu provokaceju i par tū, ka muzykai vajag runuot ar cylvākim, par jim zynomom i saprūtamom lītom, sovpus Vija Moore puorvolda perkusejis, interesanti, ka jei ari iz vītys var improvizēt i radeit. Jai ari da šam ir bejuse loba sadarbeiba ar grupu, deļtam radzu, ka itys sastuovs kūpā saguojs taids jaudeigs,” tai Ilona Rupaine. Jei ari darunoj, ka itys pavysam nūteikti nabyus koncerts tradicionaluos skaņuos, deļtam sevkuram interesentam byutu svieteigai drupeit īpasazeit ar vysu muokslinīku dailradi da ituo.

Sovpus Oskars Orlovs aba Raibīs stuosta, ka juo draudzeiba ar “Nielslens Lielsliens” aizasuoce vēļ 2019. godā, kod grupys puiši Mareks ar Klāvu koncertēja Latvejis mozuokajuos bibliotekuos i iz divejim koncertim beja paaicynuojuši ari jū pošu paskaiteit puors ailis. “Tai tei sadraudzeiba turpynuojās ari cytā leiminī, kod Klāvs ar grupu “Židrūns” saraksteja i sataiseja dzīsmi “Ai jezu” ar munu dzeju. Tok 13. juņa koncertā Raibīs skaiteis dzeju nu jaunuokuos dzejis gruomotys “Vysi vuordi”, sovpus lasejumus papyldynuos “Nielslens Lielsliens” muziki ar vysaidim akustiskim trūkšnim,” tai Oskars Orlovs.

Beleti iz pasuokumu daīmami ITE.