Rokstu sagataveja: portals lakuga.lv

2018. gods 20. majā pyrmū reizi pasaulī tyka svieteita Bišu dīna. Atzeimuot itū dīnu īrūsynuoja Sloveneja, i ANO itū prīšklykumu apstyprynuoja. Bišu dīnys mierkis ir dagrīzt viereibu tūs svareigajai lūmai i bišu skaitam, kas strauji sasamazynoj. Ituos nedelis īsacejumus vaicuojom jaunajam bitinīkam nu Strūžānu – Iļjam Gruznovam.

Ka jau bitis, tod apiterapejis sieteņa

Byut vīnuotam i mejīdorbuotīs ar dobu, smeļtīs nu tuos vysu, kū tik var pasmeļt. Sasadzīduot ar bitem, relaksētīs i uzlobuot veseleibu. Nūdegustēt i nūpierkt lobuokūs biškūpeibys produktus nu eistu Latgolys lauku. Bez bitem nabyus cylvāku, partū juobyut kūpā ar bitem. Īsoku apmeklēt bišu sātu, kur gostūs gaida draudzeiguo saimineica Daina Bernāne. Kaidu lobumu dūd guliešona bišu gultā, izzynoj ITE.

Pīminēt sovus nūvadnīkus

25. majā Drycānu kulturys nomā nūtiks dzīšmu autora, varganista, dirigenta, koru vadeituoja i školuotuoja Ontona Matvejāna pīminis pasuokums. Itū pasuokumu īsoku apmeklēt na tik drycānīšim, bet vysim, kurim interesej īsavērt slovona cylvāka dzeivis guojumā, padareitajā i īguļdejumā myusu dīnuos. Pasuokuma apmaklātuojim nūteikti byus lapnuma i patriotisma sajiuta par sovu nūvadnīku i nūvodu. Vaira informacejis bīdreibys “Maziča” Facebook lopā.

Piec koncertizruodis iz zaļumballi

31. majā Lūznovys muižā nūtiks koncertizruode “Annas tantes piruetes“, kur sasaveis latvīšu skotiviskuo deja, tradicionaluo dzīduošona i dejis (horeografi Lilija Lipora, Ilmārs Dreļs i Reinis Rešetins), bet piec izruodis byus Leluo Latgolys zaļumballe kūpā ar “Bumburneicom” i grupu “Deficīts”. Īsoku apmeklēt itū pasuokumu, lai īsajustu eistynā muižys dzeivuotuoja lūmā, pavadeitu laiku dzīšmu pavadejumā muižys pogolmā i izadoncuotu eistā Latgolys zaļumballē. Pasuokums ar viesturysku, romantisku i jautru atmosferu.