Rokstu sagataveja: portals lakuga.lv

31. majā Ondrupinis lauku sātys muzejā jau ūtrū reizi nūtiks “Omotu tolka”, kuruos laikā tradicionalūs ols dareišonys prašmu meistari, muocekli, tradiceju pietnīki i interesenti varēs kūpeigi pīdzeivuot akmiņa ols dareišonu breivā dobā. Itūreiz “Omotu tolkā” tiks gūdynuots ari vēļ vīns omots – tautys muzykants. Piec akmiņa ols dareišonys meistarklasis muzejā nūtiks lauku kapelu saīts i koncerts “Sanākam un sadziedzam!”, viestej muzeja snāgtuo informaceja.

Ondrupinis lauku sātys teritorejā 31. majā nu 12 da 16 stuņžu nūtiks ols dareišonys meistarklase, kur ols gataveišonys procesā iudiņa temperaturys uzturiešonai zlauktā (kūka traukā, kurā teik gataveits ols) vydā mat gunkurā vairuokys stuņdis karsātus, nūkaitātus akmiņus. Piec mysys nūtacynuošonys zlauktā nu jauna teik līts korsts iudiņs i svīsti akmini. Tod ols teik dzasāts, raudzāts i piļdeits bucuos, kas īrosts nūteik trešajā dīnā piec ols vuoreišonys.

Akmiņa ols dareituoju i muocekļu saīta mierkis ir na tik aktualizēt i plotuokai sabīdreibai popularizēt akmiņa ols dareišonys tradiceju, tok ari gūdynuot muzeja autentiskūs kuormu īprīškejū saiminīku Ignatu Podnieku (1914–2000), kurs seņuok beja atpazeistams ols dareituojs i nu kuruo ituos prasmis puorjāmuši daži vītejī akmiņa ols meistari. Saīta laikā varēs ari apsavērt ar ols dareišonu saisteitus muzeja prīškmatus. Zynūšuokī i prasmeiguokī meistari, kas plānoj daleibu saītā, aicynuoti pasadaleit sovā pīredzē i degustacejai voi puordūšonai jimt leidza sovu darynuojumu. Saītā plānoj pīsadaleit ari puorstuovi nu Leitovys, Norvegejis i Suomejis.

“Pārnejuo omotu tolka paguoja cīši pateikamā i dabyskā atmosferā. Tys nabeja na koncerts, na demonstriejums, na lekceja, vys taida kūpeiga dorbuošonuos pi ols dareišonys i cepļa izjimšonys. Piec dalinīku atsaukšmu mes saprotom, ka itei tolkys ideja i tradiceja juoturpynoj, eipaši akmiņa ols dareituoju deļ, kam myusu pusē taidu nav daudz, cikom poša tradiceja ir unikala pat storptautyskā mārūgā,” stuosta Ondrupinis lauku sātys nūvodpietneica Evija Maļkeviča-Grundele.

Nu 13 stuņžu muzeja pogolmā byus ari vītejūs amatnīku i muojražuotuoju tierdzeņš. Tam aicynoj dasaceit daleibu, sasazynojūt pa telefonu 26458876.

Nu 18 stuņžu muzeja pogolmā rūseiba turpynuosīs – muzeja gostus prīcynuos lauku kapelu saīta koncerts “Sanākam un sadziedam”, kurā tautys muzykanti nu Ondrupinis, Maltys, Zviergzdinis, Ambeļu, Saldus, Daugovpiļs i Visaginys (Leitova) spielēs vysaiduokys tautu melodejis, dzīduos i aicynuos ari sadoncuot kaidu daņci. Vaira informacejis par kapelu saītu pa telefonu 29254747.