Rokstu sagataveja: portals lakuga.lv

Itamā nedeļā Daugovpilī nūteik Latgolys dzīšmu svātki, kas simboliski īzeimej 100 godu nu pyrmūs Latgolys nūvoda dzīšmu svātku. Svātku gaideituokuo šaļts – 1. juņa lelkoncerts “Dod man spēku!”, kurā vīns nu solistu byus dzīduotuojs Andris Baltacis. Jis stuosta, ka pats itūšaļt ir vaira dasagrīzs dokumentalūs kinu taiseišonai – vīna taida (“Atgriežamies Latgolā. Post scriptum”) pīdzeivuos pyrmizruodi Latvejis Televizejā Juoņa dīnā, taipat gondreiž pabeigts dorbs pi kinys “Dundurpolka”, kas viesteis par sovulaik aktivū Daugovpiļs lauku kapelu “Dunduri”, kurā Andris duorbuojīs kūpā ar akteri Arti Ruobežnieku, muziki Ati Auzānu i cytim. Koncertu i dokumentalūs filmu taiseišonys vydā Andris pīduovoj treis īsacejumus pīdzeivuošonai šūnedeļ Latgolā.

Napalaist garum pādejūs Varakļuonu nūvoda svātkus

Šaļti pyrma dzīšmu svātku Daugovpilī aicynoju sasatikt Varakļuonu nūvoda svātkūs, kas byus nu pīktdīnis, 30. maja, da svātdīnis, 1. juņa. Svātki saīt vīnreizeji aiz tuo, ka šūgod Varakļuonu nūvods pagaiss. Trejuos svātku dīnuos byus daudzi nūtikšonu i dalinīku, bet svātku golvonajā dīnā (sastdiņ, 31. majā) varakļuonīšus i vysus gostus gaida aktivitatis jau nu poša reita, taipat byus svātku dalinīku guojīņs i lelais koncerts parka estradē ar dzīduotuojim, doncuotuojim i cytim dalinīkim, piec kuruo zaļumbale ar grupom “Pienvedēja piedzīvojumi”, “Yūt”, “Rīmdari” i jaunīšu grupa “Ziedonis”. Maņ pošam koncertā byus kai vadeituoja, tai dzīduotuoja lūma, byus vareiba paraudzeit ari sev naīrostys lītys. Niu maņ reizi nu reizis ļauds lyudz dareit, dzīduot sev kū naīrostu i es ļaunūs.

Latgolys dzīšmu svātku spāks

Piec Varakļuonu nūvoda svātku celi vess iz Daugovpili, kur 1. junī Stropu estradē gaidoma Latgolys dzīšmu svātku kulminaceja ar Latgolys i cytu nūvodu korim, cyldynojūt latvīši i eipaši latgalīšu dzīsmis lelkoncertā “Dod man spēku!”. Byus kori, doncuotuoju ansambli, akordeonisti i pyušamūs instrumentu orkestri – vaira nakai 3600 dalinīku. Sasagatavejuši byusim pamateigi! Lelkoncertā pats byušu vīns nu solistu kūpā ar Ilonu Bageli, Aigaru Runči, Aleksandru Špicbergu, Daini Skuteli i cytim. Skanēs “Skaidra volūda”, “Saule, pērkons, Daugava”, “Lobs bej’ puika myusu Jezups”, “Aiz azara augsti kolni” i cytys meilys dzīsmis, taipat izskanēs Jura Kulakova i Normunda Beļska dzīsme “Dod man spēku, dod man laiku”. Koncerts byus cīši, cīši spieceigs!

Ībraukt Aglyunā

Braucūt nu Varakļuonu iz Daugovpili īsoku izmest mozu leikumu i ībraukt Aglyunā. Tei maņ ir meila vīta i nav obligati vysim skrīt tik iz 15. augustu, var tai vīnkuorši pi Dīvamuotis ībraukt i pa ceļam. Tys, kū eistyn īsoku, daudzi grāku Aglyunā napamest, padaleit i pa cytom vītom. Saīt, ka vysi 15. augustā sabrauc, pamat sovus grākus i vītejī tod jūs sovā vydā “školda”. Aglyunys ļauds bīži tai soka, deļtuo vysu par reizi “naizlejit”, pametit i kaidai cytai bazneiceņai! Ka na iz Aglyunu, tod drūsai var kaidā cytā skaistā vītā ībraukt, Latgolā taidu daudzi – ir kū redzēt, ir kur byut.