Roksta autore: Amanda Anusāne/portals lakuga.lv

Sastdiņ, 24. majā, Rēzeknis nūvoda Rogovkā nūtyka jau 14. tautys myzykantu saīts aba večerinka “O, bļaka!”. Itūreiz pasuokumā tyka gūdynuots Andryvs Jūrdžs (1845–1925), kuram itūgod svietejam 180 godu jubileju. Muzicēt iz Nautrānu kulturys centru beja sabraukuši muokslinīki nu tyvuokys i tuoļuokys apleicīnis, kai ari nu Reigys.

Bīdreiba “Rogovkīši” turpynoj realizēt projektu “Andryvam Jūrdžam – 180”, kurā digitalizej Andryva Jūrdža rūkrokstus i organizej vysaidus pasuokumus. Vīns nu itūs pasuokumu beja večerinka “O, bļaka”, kas aizvadeitajā sastdīnē nūtyka Rogovkā. Nūtikšonu vadeja Dekteru amaterteatra dalinīki Ērika i Aivars Bozoviči. Scenareja caurveju motivs beja nūvadnīks A. Jūrdžs i “Myužeygays kalinders”, taipat dalinīki beja aicynuoti dzīduot Jūrdža sacarātuos dzīsmis. A. Jūrdžs dzims Nautrānu pogosta Kuorklinīkūs, pats bejs tautys muzykants i spieliejs kūkli, kai ari bejs izcyls tautys dzīšmu zynuotuojs, taipat ari jaundarynuotuojs, īdybynojūt sova veida folklorisma tradiceju, kurā nav styngri nūvalkams rūbežs storp tradicionali dzīduotom i pošsacarātom dzīsmem. Dažys nu Jūrdža dzīšmu vēļ sasaglobuojušs vītejā repertuarā, sovutīs dažys pagaisušys pavysam.

Vuords “bļaka” latgaliski nūzeimoj “skuorda lūksne”, pa kurū izsytūt, skaņa ir tuoli dzieržama. Izsaucīņs “O, bļaka!” rodīs kūpeigys muziciešonys laikā Ontona Kūkuoja dzymtajā sātā, kur bļaka tyka izmontuota kai muzykys instruments, pa tū izsytūt ar pagali. Piec Ontona Kūkuoja aizīšonys myužeibā Nautrānu pogosta puorvaļde īdybynuoja tradiceju reikuot tautys muzykantu saītu aba večerinku ar Ontona Kūkuoja dūtū nūsaukumu “O, bļaka!””.

Rogovkys etnografiskais ansamblis par večerinku soka tai: “Večerinkā pīsadolom jau vairuokys reizis. Varbyut kaidys desmit. Pādejūs godūs kotru godu dzīdim. Itūreiz mes izpiļdejom Jūrdža dzīsmis, tok parosti dzīdim piec vieliešonuos – i šlāgeri, i tautys muzyku. Emocejis itymā pasuokumā vysod ir cīši pozitivys. Mes nūdzīdim, aizejam iz sātu puorsaviļkt i tod ballejam da poša reita. Mes vysys personeigi zynuojom Ontonu Kūkuoju i juo saimi, partū kotru godu gaidom i atbolstom itū pasuokumu.”

Pasuokumā pīsadaleja taidi muzykanti i kapelys kai Pīters Belinskis, Saļnovys kapela “Sveicynojam, vielejam”, Nikolajs Zaharovs, Juoņs i Pāvels Mukāni, Baļtinovys kapela, Ontons Savickis, Ontons Butkāns, Vinsents Kūkuojs, Malnovys kapela, Eventijs i Silvija Zelči, Vitālijs Plešs, Pīters Jermacāns, Jāzeps Zaremba, Andris Jurāns, Irēna Znūteņa, Aleksandrs Boginskis, Juoņs Gipters i cyti. 

“Tauta cīši īmeiļuojuse itū pasuokumu. Navaru īsadūmuot, ka vaira naorganizātu. Nūtikšona dabuojuse lelu popularitati i tauta prosa taiseit itū pasuokumu. Itūgod mes konkurejam ar Līpuojis kapelu saītu, partū puora kapelys naatbrauce, bet apjiemeiguokī palyka. Itys gods atsaškir nu cytu ar tū, ka popularizejam A. Jūrdža atstuotū montuojumu,” tai pasuokuma organizatore Terēze Kūkuoja.

Iz pasuokumu beja saguojuši kai vītejī gosti, tai ari ļauds nu tuoļuokys apleicīnis, kas nūviertēja. Zāle beja tik pylna, ka cylvākim vajadzēja stuovēt kuojuos. “Itys ir tautys muzykantu saīts, kur spielej vysi, kuri dasasacejuši, taipat te var spēlēt ari tī, kuri nav dasasacejuši. Leidza ar tū te ir absoluti breiva atmosfera, kur mes dzierdim na tik Latgolys, bet ari Latvejis muzykantus. Fenomenals pasuokums, kas nūteik jau nazkurū godu i tam juonūteik ari iz prīšku. Itys pasuokums vīnoj na tik tautys muzykantus, bet ari cylvākus, kurim pateik klauseitīs tautys daiļradi,” tai pasuokuma apmaklātuoji.

Galerejā biļdis nu tautys myzykantu saīta “O, bļaka!” 2025. Foto: Amanda Anusāne/portals lakuga.lv