Rokstu sagataveja: Laura Spundere, portals lakuga.lv

24. majā Daugovpiļs kulturvītā “V–13” ar pylnu zāli skateituoju folkmetala grupa “Varang Nord” pyrmū reizi atskaņuoja koncertprogramu “Veļi”, sovpus poša kulturvīta ar itū nūtikšonu nūslēdze sovu pyrmū darbeibys sezonu.

“V–13” ir saleidzynūši jauna kulturvīta Daugovpilī, kas atsarūn Daugovpiļs Universitatis centralajā aba vacajā ākā, Vīneibys īlā 13, i sovys durovys apmaklātuojim attaisejuse pārņ septembrī. Kulturtelpa ir vīglai sasnādzama, tamā ir 200 sādvītys. “V–13” atsarūn catūrtajā stuovā, tok svareigi, ka tei daīmama ari cylvākim ar kusteibu trauciejumim, ākā ir lifts.

Par “V–13” ryupejās SIA “13. stāvs” aba pasuokumu organizatori ar vaira nakai 20 godu pīredzi. Piec koncerta iz eisu šaļti izadeve nūgiut uzjāmuma puorstuovi Hariju Vucinu, kurs pastuosteja, ka Daugovpiļs Universitate jau pyrma loba laika beja uzrunuojuši uzjāmumu, aicynojūt apsvērt vareibys organizēt pasuokumus itymā aba vacajā ākā, taipoš ari universitatis jaunajā korpusā.

“Mes ilgu laiku struoduojom ar pošvaļdeibu, tok niu sadarbeibu ar tū asam puortraukuši, i atsaroda drupeit breiva laika dasagiut cytim projektim. Ir divejis zālis, vīna ite, ūtra – jaunajā korpusā. Itei vīta ir taida, kur nader mainstream komercialī pasuokumi, tai mes raugom pa druskai tausteit tū, kū cyti apleik nadora. Laikmeteiguo kultura, muzyka i deja, elektroniskuo muzyka, taidi eksperimenti, kas Daugovpilī cytur nav daīmami. Iz itim pasuokumim īt vysaiduoki cylvāki, ari na tik nu Daugovpiļs, ir cylvāki braukuši nu Rēzeknis, Leivuona, Kruoslovys. “V–13” ir vīta naformatam i alternativajai muzykai, tok profesionalā kvalitatē. Niu sezonu asam nūslāguši, tok septembrī suoksim jaunu i atkluosim tū ar modernuo teatra festivalu “Homo Novus”, paradzāta ari nūtikšona ar laikmeteiguos dejis pyrmizruodi, Zanis Daudzinis gasteišona i cyti pasuokumi. Mes naraugom sovu repertuaru veiduot, sadolūt vīnmiereigai – džezs, pops, roks i tamleidzeigi. Dreižuok veromēs iz vysaidom interesantom nūtikšonom, grupom voi programom, kurūs mums pošim redzīs, ka ir vārts paruodeit, i ka cyti Daugovpilī jūs naruoda.”

Grupa “Varang Nord” ir 2014. godā Daugovpilī izveiduota folkmetala grupa, kas uzastuojuse daudzvīt Latvejā i pasaulī. Tei ir ari vīneiguo grupa nu Baļtejis, kas 2019. godā 30 vaļstu puorstuovu konkurencē uzvarēja pasauļa mārūga smoguos metalmuzykys festivalā “Wacken Metal Battle” Vuocejā. 24. majā “Varang Nord” kulturtelpā “V–13” prezentēja sovu jaunuokū koncertprogramu “Veļi”, kas suokumā tyka pozicionāts kai akustiskais koncerts. Vys, kai apmaklātuojam, nu suoku palyka naskaidrys, parkū koncerts teik saukts par akustiskū, ka byuteibā ir piļneibā apskaņuots i bez dzīšmu vuordu, tik ar muzykalū pavadejumu. Harijs Vucins skaidroj, ka metalmuzyka tradicionalā izpratnē byutu ar skaļom gitarom i tai sauktū growling (paplašynuota vokaluo tehnika, kū izmontoj smoguos muzykys izpiļdeituoji – L.S.). “Itamā programā “Varang Nord” nav tūs gitaru, nav dzīduošonys. Jūs parostuo programa byutu tik smoga i skaļa, ka vysys lustrys i grīstus ite nūnastu. Es uzrunuoju “Varang Nord”, voi jī nagrybātu pi myusu nūspēlēt koncertu, jī suokumā beja gona skeptiski – kai byus taidā sādūšā zālē, tok izaver, ka koncerts saguoja i vysim patyka,” tai kulturvītys “V–13” pasuokumu organizators Harijs Vucins. Ituo koncerts pamatsastuovā beja “Varang Nord” dalinīki: Maksims Popovs (gitara), Jelena Kaļniša (akordeons), Nikita Kobcevs (sytamī instrumenti), Vjačeslavs Janens (bungys), Valērijs Solovjevs (gitara). Taipoš ari plots gostu saroksts: Nadežda Orlovska (blokflauta, saksofons), Glebs Beļjaevs (klavīris), Jurijs Borins (klavīris), Ernests Petrovs (čells), Daniels Šumskis (vejūle).

Juopīkreit Harija Vucina saceitajam, ka rokeri i metalmuzykys fani ir vyslojaluokuo auditoreja, kuri vysod apmeklēs sovu meiluokūs grupu koncertus, tū pīzeist ari ituo koncerta apmaklātuojs Vladimirs nu Rēzeknis, kurs atzyna, ka, pazeistūt “Varang Nord” muzyku, beja cīši interesanti dzierdēt jūs skaniejumā jaunus instrumentus. Koncerta auditoreja beja dyžan raiba, suocūt nu bārnu i pusaudžu godu jaunīšu, leidz pat ļaudim ar leluoku godu pīredzi i jaunīšim, kuri piec vizualuo skota puorstuov dažaidys subkulturys. Daudzim apmaklātuojim, jau īsarūnūt iz koncertu, beja “Varang Nord” zeimyna apgierbs. Juopīzeist, ka koncerta programa eistyn “īt uorā” nu “Varang Nord” tradicionaluo skaniejuma, tok nimoz nav kaidā mārā švakuoka verseja, vys taišni atsvaidzynūši nu jau zynomys grupys pasaklauseit, kū drupeit sovaižuoku. Nadaudz apbādynuoja, komunikacejis tryukums ar auditoreju, byutu vierteiguok, ka grupa, izīmūt iz skotivis, īpazeistynuotu ar sevi, taipoš ari drupeit pasarunuotu ar skateituojim koncerta laikā, kam taišni deļtuo kluotīnis byušona pasuokumūs ir eipaša i naaizstuojama.

Vystik beja prīca redzēt, ka poša grupa, tai ari apmaklātuoji eistyn izbauda koncertu i kūpejuo atmosfera izadeve. Taipoš prīcynoj, ka Daugovpilī niu byus par vīnu kulturvītu vaira, kur vaicuot piec cytaižuokys programys, kas izīt uorpus plotai popularu nūtikšonu ramu.

Foto galerejis autors Rokas Macikas.