Rokstu sagataveja: portals lakuga.lv

Portals lakuga.lv jau viesteja, ka Latveju apceļoj izruode “Mazpiļsāta”, kuruos pamatā ir slovonuokuos myusu dīnu Latgolys lugu autoris Danskovītis komedeja “Naudas celi”. Pyrmizruodi īstudiejums pīdzeivuoja aizguojušuo gods 25. septembrī Bolūžu kulturys nomā. Izruode jau ruodeita Muorupē, Līpuojā, Jiurmolā, Ciesīs, Kuldeigā, Preiļūs i cytur. Tok 7. junī muokslinīki pādejū reizi gasteis Latgolā – Bolvu estradē.

7. junī 18.00 stuņdēs Bolvu estradē ar Danskovītis lugys īstudiejumu “Mazpiļsāta” gasteis “Pannas Teātris”. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei i Jānim Skanim runuot ari latgaliski i īsajust mozpiļsātys dzeivē ar sirsneibu i humoru.

Izruodē Eiropys ceļus izstaiguojuse mārga Eva atsagrīzs sovā dzymtajā pusē, lai suoktu dzeivuot nu jauna. Juos vizeite pi muoseicys sagrīzs kuojom gaisā vysu īrostū dzeivis ritiejumu i suoks nūtikt naparostys lītys – piļsātys policists sasarūseis i suoks pletēt jiuzys, vītejī krišnaiti tierguos apreibynūšus kekseņus, bejušajam deputatam nakts striptizs atgrīzs veiriškū spāku i, prūtams, Eva satiks sovu Odumu, kurū jei atmūdynuos nu vacpuiša letargiskuo mīga.

Danskovīte aba Anita Ločmele izruodi “Pannas Teātra” izpiļdejumā jau ir redziejuse i par tū soka tai: “Breineigs tāluojums. Es prīcojūs par kotru dorbu, kurū kaids teatris īstudej, nivīnu nakritizeju. Kotram teatram ir cytaižuoka pīeja, kotram sovi knifi. Maņ cīši patyka. Klausejūs kai Siliņš runuoja, daudzys frazis beja ari maineitys voi dalyktys, tys tik suleigi i kolosali izaklauseja. Itei izruode nu “Naudas ceļu”, kū ruoda Baļtinovys amaterteatris “Palādas”, atsaškir ar nūsaukumu i akteru sastuovu – mums spielej septeni akteri, a jī – četratā.”

Izruožu apvīneibys “Pannas Teātris” producente Antra Rijniece stuosta, ka jī sovim skateituojim grib radeit prīcu i vairuot optimismu. “Myusu izruožu skateituoji zyna, ka, apmeklejūt tuos, byus vareiba uzluodēt energeju i vairuot lobū kai sevī, tai apleicejūs. Taišni taida sovūs dorbūs ir Latgolys īvārojamuokuo myusu dīnu dramaturge Anita Ločmele aba Danskovīte – pozitiva, ospruoteiga, laikmeteiga.” Taipat Antra pīzeist, ka pyrmū reizi izruode tiks ruodeita breivdobā. Taida ideja rodusēs, kod zālēs sādvītys tyka izpierktys i cylvāki žāluojušīs, ka nateik iz īstudiejumu. “Tai mes izdūmuojom, ka brauksim vosorā i formatu pīlāguojom tai, lai izruodi var ruodeit ari breivdobys estradēs. Bolvūs itymā datumā atkluoj vosorys sezonu, itei byus taida lela nūtikšona. Piec izruodis byus ari zaļumballe. Vēļ ar izruodem uorā i īšktelpuos mes plānojam braukt iz Saldu, Saulkrostim, Līpuoju, Ulbroku, Ikškili, Diklim, Roju, Solyspili, Modūni i Jelgovā nūslēgt itū sezonu,” tai Antra Rijniece. Taipat producente atkluoj, ka itūšaļt Danskovīte struodoj pi “Mozpiļsātys” ūtruos dalis: “Mes saprūtam, ka tys scenarejs ir cīši smīkleigs i ir interesanti, kas ar varūnim varātu nūtikt tuoļuok. Kod Danskovīte mums pačukstēja, kaida varātu byut sižeta darbeiba, bejom puorsasmiejuši.”

 

 

 

 

 

View this post on Instagram

 

 

 

 

 

 

 

 

 

 

 

 

A post shared by Pannas Teātris (@pannasteatris)

Lugys autore ir Danskovīte (Anita Ločmele), režisors – Juris Rijnieks, scenografs – Ivars Noviks, kostimu muokslineica – Una Bērziņa, sovutīs muzykalais nūformiejums ir Vinsenta Kūkuoja i Artūra Uškāna puorziņā. Lūmuos: Zane Daudziņa, Aldis Siliņš, Elīna Vāne, Jānis Skanis.

Beletus iz izruodi var nūpierkt ITE.

Galerejā biļdis nu “Mazpiļsātys” pyrmizruodis. Foto: Ieva Makare