Rokstu sagataveja: portals lakuga.lv

Ar namaineigū Valentina Lukaševiča dzejūļa ailis “Kruot var na tikai naudu” devizi festivals “Muzykys skrytuļs” 19. i 20. julī jau deveitū reizi izskanēs Augšdaugovys nūvoda Leiksnā. Pyrmuo festivala dīna tradicionali nūtiks Leiksnys muižys parkā, cikom ūtrajā dīnā Leiksnys Vysusvātuos Jezus Sirds Romys katuoļu bazneicā gaidoms goreiguos muzykys koncerts. Festivala apmekliejums ir bez moksys.

Kai stuosta festivala reikuotuoja i bīdreibys “Mūsu Līksnai” puorstuove Gunta Mežule, vysus godus namaineiga palykuse festivala devize – Valentina Lukaševiča dzejūļa aile “Kruot var na tikai naudu”, saglobojūt festivala nakomercialū dobu, ari itamā vosorā “Muzykys skrytuļs” kotram grybātuojam byus bez moksys. 

Paradzāts, ka festivala nūtikšonys aizasuoks jau agri nu reita – 19. julī 10 stuņdēs varēs izavyngruot Leiksnys volejbola turnirā. Sovpus piečuok festivala atmosferu īryucynuos moto klubs ”Old School Mc Dinaburg”, i nu 16 stuņdem da reita gailim Leiksnys muižys parka teritorejā “Muzykys skrytuli” īgrīzs vaira nakai 20 dažaidi muziki, tūs vydā byus: Sovvaļnīks, Ūga, Bruolāns, Jezups i Muosys, Staiguļi, Gandreiž 10nīkā, Fuck’n’turīs, Arņs Slobožanins i Daugovpiļs tymsi zylais kors, Lūznovys kadriļs, Vinsents Kūkojs, Stage One, Skonai, Dedze un Co, Dyrbyni, Amanda Lapa, VPDK “Daugaveņa”, Trio Bille, Vysu voi nadaudz, Marysana, Bruoli i Muosys, Reibums, projekts ”Vuordi” i cyti muokslinīki, viestej organizatoru sagataveituo informaceja.

Paraleli koncertim nūtiks ari pleners “Muokslys skrytuļs”, kurā eipašys performancis veiduos Terēze Juškus, Guna Soma, Inese Minova, Glebs Vronskis, Oksana Vronska, Dāvis Vaivads, Reina Semule. 

Festivala organizatori ari stuosta, ka na mozuok svareiga ir bārnu piļsieteņa, kas dorbuosīs festivalā. Tei byus izvītuota gona tuoli no skotivis, kab byutu bārnim draudzeiga i skaļums natraucātu, tok ari gona tyvai, kab varātu redzēt, kas nūteik iz skotivis. Taipoš byus Leiksnys lobumu tierdzeņš i kaļva Edgara Vronska darbneica, kurā varēs izkaļt eipašū “skrytuļa” monetu, kas gataveita taišni itai nūtikšonai. Festivala apmaklātuojim byus vareiba izmontuot ari telšu piļsieteņu.

Festivala reikuotuoja i bīdreibys “Mūsu Līksnai” puorstuove Gunta Mežule doluos prīcā, ka itūreiz daleibai festivalā ir bejs tik lels dasacejumu skaits, ka festivalu varātu organizēt pat iz treis nūtikšonu dīnom. “Kod 2005. godā suocem organizēt festivalu, ar kotru godu pīauga tūs muziķu skaits, kas spieļoj latgaliski. Te svareigi darunuot, ka itūgod vysus dalinīkus mes pajimt navariejom, aiz tuo, ka sevkura laika nūbeide ir ari papyldu tehniskuos izmoksys, deļtam kūpā ar vodūšū režisoru Māri Korsieti raudzejom salikt taidu piec vareibys dzeivu i interesantu programu, kab apmaklātuojim byutu vareiba dzierdēt dažaidus izpiļdeituojus.” Gunta ari darunoj, ka festivala koncepceja nu tuo aizsuokumim 2005. godā nav stypri puorsamejuse.

“Mums ir svareigi saglobuot sovus “pamatus” – skrytuļs kai festivala simbols, latgalīšu volūda, ari vysaiduoka veida aktivitatis. Itūreiz byus ari eipaša performance ar traktoru, tok tuos saturs lai pagaidom palīk nūslāpumā,” saglobojūt nalelu intrigu, doluos Gunta.  

Svātdiņ, 20. julī 10.20 stuņdēs Leiksnys bazneicā byus Augšdaugovys nūvoda kulturys centra “Vārpa” jauktuo kora “Latgale” koncerts. Sovpus piec koncerta nu 13 da 16 stuņdem Leiksnys muižys parkā byus sātys kopejneica “Pie saules takas”.

Par festivalu

Festivals “Muzykys skrytuļs” ir nakomercials divu dīnu kulturys nūtykums, kura centrā ir latgaliskuo identitate, volūda i muzyka. Tys aizasuoka 2005. godā Leiksnā i ir klivs par vīnu nu atpazeistamuokim latgaliskuo muzykys i muokslys katalizatorim. Festivals na tik veicynoj latgalīšu volūdys i kulturys saglobuošonu, tok ari atteisteibu car myusu dīnu muzyku i muokslinīcyskom izpausmem. Itūgod festivalam aprit deveņu godu jubilejs. Festivals ir nūtics 2005., 2006., 2007., 2011., 2014., 2016., 2018. godā Leiksnā i 2020. godā – digitali. Kotrā festivalā ir pīsadalejuši aptyvai 30 muziki i tūs apvīneibys, kūpā ap 300 muzykantu. Festivalu organizej bīdreiba “Mūsu Līksna”, Augšdaugovys nūvoda pošvaļdeiba ar Vaļsts kulturkapitala fonda mierkprogramys “Latviešu vēsturisko zemju attīstības programma” daškiertū atbolstu.