Rokstu sagataveja: portals lakuga.lv

Dzīduotuojs, dzīšmu autors Jurs Ostrovskis pavasarī izdevs jaunu solo albumu “Muna zemeite”, bet jau svātdiņ, 15. junī, svietejūt 45 godu jubileju, aicynoj iz sovu da ituo leluokū solo koncertu Rēzeknē, Latgolys viestnīceibā “Gors”.

Jaunajā albumā, kas ir ūtrais Jura Ostrovska autordzīšmu albums, vydā ir 12 dzīsmis, nu kurūs devenis latgaliski. Desmit dzīšmu ir albuma pamata daļā, bet divejis – grupys “Leijerkastnieki” dzīduotuoja i dzīšmu autora Aiņa Šaicāna skaņdorbs “Meža dziesma” (voi kai lobuok pazeistama “Dzīve, mana dzīvīte”), kas īdzīduota kūpā ar Andri Danilenko, Žoržu Siksnu, Juri Hiršu i Arti Ruobežnieku (Robežnieku), “Hej, bruoļ latgalīt” Mart Inc. remiksā –  īkļautys kai papyldu dzīsmis. Albumā var dzierdēt jau zynomūs skaņdorbus “Vacuoku sāta”, “Balāde par čangalim i latgalīšim”, kaverversejis dzīsmem “Aleņš”, “Jau mani vad”, tai i publicātys jaunuokuos autordzīsmis – “Latgalis pierteņa” i “Nauda, naudeņa”.

Kai stuosta Jurs, albuma īraksteišonā i apstruodē lelu dorbu īguļdejs muzykys producents Kaspars Maks (Vašeks), ar kuru sovulaik sasapazynuši dzīsmis “Hej, bruoļ latgalīt” ūtruos versejis īrokstā, bolsu īrokstūs paleidzējs Olegs Timofejevs, instrumentus īspieļuojs i īrakstejs Einārs Lipskis, bet albuma tituldzīsme, kas ir vīna nu solokarjerys pyrmūs gobolu, topuse studejā pi Ata Auzāna. “Īrosts jau ir tai, ka tī pyrmī albumi i dzīsmis ir tī lobuokī. Pi ūtruo albuma ir struoduots cīši ilgi. Jau asu sacejs, ka jauna dzīsme maņ tūp reizi godā, kam gribīs, lai ir īprīšk nadzīduota tema, nazkas cytaižuoks, atsaškir aranžejums, leidza ar tū paīt vaira laika. Niu ari albumā ir jauna “Patrioti.lg” dzīsmis “Aleņš” verseja, taipat deju variants radeits tautā pazeistamajai dzīsmei “Jau mani vad”. Raudzeju ari dalikt kaidu tulkuotu gobolu – itūreiz tulkuojums munā izpiļdejumā ir dzīsme “Vokors kluss”,” stuosta Jurs Ostrovskis.

Ūtruo autordzīšmu albuma nūsaukuma sprīsšonā Jurs Ostrovskis īsaisteja sovu auditoreju socialajā teiklā “Facebook”, i juos bolsuojumā par uzvarātuoju palyka variants “Muna zemeite”. Kai portalam lakuga.lv pīzeist Jurs, jis jau seņ ir saprats, ka publika ir pats svareiguokais faktors muzykys sferys dorbā. “Ir goda bolvys voi aptaujis, kurys na vysod tevi jam vārā, bet publika vysod ir ar tevi. Tys muzykantam ari ir cīši svareigi, ka tevi mīļoj, īt iz nūtikšonom voi sauc spēlēt,” soka Jurs. Par tū, ka muzykai latgaliski byutu juoskaņ vaira i ka jam ir sajiuta – leluos aptaujis na cik daudzi atbolsta latgalīšu muzyku, Jurs Ostrovskis runuoja ari latgalīšu kulturys ziņu portala lakuga.lv raidīroksta “Mīti” pyrmuos sezonys raidejumā par muzyku, kū var nūsaklauseit ITE.

Jau svātdiņ, 15. junī, Rēzeknē, Latgolys viestnīceibā “Gors”, kas ir taišni dzīduotuoja 45. dzimšonys dīna, paradzāts da ituo leluokais Jura Ostrovska solo koncerts “Viss tikai tev”. Muzykants soka, ka pādejūs divejus mienešus dzeivoj satraukumā par koncertu, kam “Gors” ir lela i īvārojama koncertvīta. “Kū tyvuok īt, tū leluoks satraukums. Na jau aiz tuo, ka nazkas var saīt greizi, bet tei ir lela atbiļdeiba – ruodīs, ka itys koncerts ir da ituo iz vysa nūzeimeiguokais dzeivē. Ir bejuši leli koncerti, bet ite byus daudzi gostu, svareigu, pat legendaru cylvāku, daudzi emoceju,” tai par sovom sajiutom pyrma svātdiņ paradzātuo koncerta stuosta Jurs.

Koncertā leidza ar Juri pīsadaleis muziki, ar kurim jis ir kūpā struoduojs, bejuse kaida sadarbeiba voi savaduši cyti celi. Koncertā byus Valērijs Mukāns, Ainārs Lipskis, Karīna Stivriņa, Irēna Kjarkuža, vokaluo grupa “Solversija”, videjuos paaudzis deju kolektivs “Pilskalne”, byus muzykaluo grupa “ArMaestro” Anatolija Livčys vadeibā i cyti. Taipat kluotyn byus i Artūrs Uškāns, ar kuru kūpā struoduots projektā “Patrioti.lg” i bez kura, kai sprīž Jurs, varbyut vyspuor nabyutu suocs dorbuotīs muzykys laukā. Koncerta eipašais gosts byus Jānis Paukštello. Par itū sasatikšonu dzīduotuojam ir sovs stuosts. “Sovā socialuo teikla “Facebook” profilā asu atvārts sarunom ar auditoreju, reizi nu reizis nazkū pavaicoju. Tai beju pyrma kaida laika dalics īrokstu, ari vaicuojumu kolegim, kuri grybātu sadzīduot ar mani jubilejis koncertā. Akteram Jānim Paukštello beja koncerts Daugovpilī, beju aizguojs, i Jānis tod pasaceja: “O, Juri, tev vosorā ir jubilejis koncerts, vaicuoji, kurs varātu uzastuot, es lobpruot pīsadaleitu!”” atstuosta Jurs Ostrovskis, nūsokūt, ka itys vyss kūpā tod izlīk tū lelū atbiļdeibys sajiutu.

Par Juri Ostrovski plotuok sabīdreiba izzynuoja leidza ar muzykalajim projektim “Patrioti.lg” i “Dvinskas muzikanti”. Kai gūdeigi nūsoka Jurs, tod, suocūt sasadorbuot ar Artūru Uškānu “Patriotūs.lg”, juts, ka pošam datryukst muzykaluos izgleiteibys, saprasšonys, deļtuo dorba turpynuošona ir taida kai pīruodeišona pošam sev, ka jis var izaraut pats i dareit ari uorpus īprīškejūs projektu. “Ruodīs, ka niu es asu izaruovs nu taida kai “Patriotu.lg” zeimyna. Deļtuo ka beja vaicuojumi, kas ar myusu projektu, deļkuo vaira nastruodoju ar Uškānu. Pandemejis deļ beidzēs ari projekts “Dvinskas muzikanti”, leidz ar tū puoreja iz solo projektu saguoja namonama. Lela prīca, ka niu ir vareiba nūorganizēt itaidu jubilejis koncertu. Raudzeisim publikai radeit eipašu atmosferu, i saīt breineiga duovona na cik daudzi maņ pošam, cik kai lela pateiceiba taišni koncerta apmaklātuojim, kuru atbolstu jiutu kasdīnā!” prīceiga satraukuma pylns soka Jurs Ostrovskis.