Rokstu sagataveja: portals lakuga.lv

Svātdiņ, 15. junī, Lelvuordē, Rembatis parkā, nūtyka raidejuma “Latvijas Sirdsdziesma” 2024./2025. gods sezonys finala koncerts i bolsuošona. Pyrmū vītu 15 dzīšmu konkurencē dabuoja Andris Baltacis i Dainis Skutelis ar dzīsmi “Latgalietis ir”, piečuok sarunā portalam lakuga.lv pīzeistūt, ka itaids rezultats bejs lykumsakareigs. Taipat jau Juoņa dīnā, 24. junī, TV pyrmizruodi pīdzeivuos dokumentaluo koncertkina “Atgriežamies Latgolā. Post scriptum”, kurys motivs ari ir taišni itei dzīsme.

Raidejuma “Latvijas Sirdsdziesma” finalā tyka 15 dzīšmu, nu kurūs 3. vītu dabuoja grupys “Zelta kniede” dzīsme “Es tevi palūgšu”, 2. vītā palyka Artis Šimpermanis ar “Dzimtās mājas”, bet pyrmuo vīta i 2024./2025. gods sezonys uzvarātuoja gūds tyka Andram Baltačam i Daiņam Skuteļam ar dzīsmi “Latgalietis ir”. Kai pyrma raidejuma saceja juo režisors Arvīds Babris, tod “Latvijas Sirdsdziesma” finalā itūgod, cīši īspiejams, vaira nakai cytus godus beja jiutams taišni nūsaukuma pyrmais vuords – Latveja. “Finalā 15 dzīšmu izpiļdeituoji puorstuovēja gondreiž 20 Latvejis piļsātu, kam itūgod vārojama tendence, ka vīnā dzīsmē sasateik dzīduotuoji nu vysaidu piļsātu i pat viesturyskūs nūvodu,” tai Babris.

Raidejuma “Latvijas Sirdsdziesma” finala koncertu Lelvuordē vadeja Velga Vītuola (Vītola) i Normunds Zušs, bet kūpā ar finalistim, kurūs skateituoji izalaseja vysys sezonys garumā, kuope i cyti muokslinīki.

Kai latgalīšu kulturys ziņu portalam lakuga.lv sarunā piec uzvarys nūsaceja Andris Baltacis, tod, ka tai nūtiks, bejs sagaidoms. “Itai dzīsmei vystik apakšā ir plota viesture – saknis nu Baļtinovys amaterteatra “Palādas” i izruodem “Ontans i Anne”, tod guojs Latvejis Nacionalais teatris ar sovu izruodis “Latgola.lv” verseju, kluotyn īt dzīsmis muzykys autors Valdis Zilvers i vuordu autors Jānis Peters. Tod pārņ i aizpārņ caur izruodem “Atgriežamies Latgolā” i mums saguoja datikt pi ituo materiala. Niu mes ar Daini, kurim tīpat i grupa “Baltie lāči” blokus bejuši, leidza ar tū beja skaidra apziņa, ka itei ir taida latgalīšu spāka dzīsme. Tycu, ka vys jau mums obejim leidza iz skotivis grybātu nūsastuot vēļ desmitis, symti, pat tyukstūšys i pasaceit tū frazi: “Kas aiztiks Latgolu, tam labi naīs!”,” soka Andris Baltacis.

Jis nūsasmej, ka zynomā mārā itys ir bejs nalels apriekins, bet ar mierki paceļt latgalīšu īškejū goru. “Apleik radzu vysā lelu naapmīrynuoteibu ar dzeivi, deļtuo redzīs, ka vajag kaidu gaismeņu. Koč i dzīsme poša ir kai ba jautra, aša i osa, bet gitarists Armands Uozuoliņš (Ozoliņš) jamā dalyka smeļdzeigū gitarys motivu. Juopīzeist, ka kai radejis hits jei naaizguoja, bet, lai maņ atlaiž, saceišu gūdeigi, ka daudzim uorpus Latgolys napateik itei fraze. Varātu dzīduot, ka naaiztiks i Kūrzemi, i Zemgali, i Vydzemi, bet vystik jei ir eistyna latgalīšu spāka dzīsme. Vys jau medejūs ari volda aizdūmeiga separatisma švuorbys, kū tī Baltacs grib dareit. Bet, radzūt kaidys mums niu vysaidys kopu i sportsmenu partejis skrīn pa prīšku, mani satrauc, kas nūteik, kaida byus zeme, kurā aug muni mozbārni,” puordūmuos pasadola raidejuma “Latvijas Sirdsdziesma” uzvarātuojs.

Andris ir skorbs sokūt, ka jam ruodītīs, ka šūbreid Latgola asūt padareita par taidu kai balasta rūbežu storp Krīveju i Reigu. “Reiga ir kai taida kieneņvaļsts, bet beistūs, ka dreiži voi vāluok i jei kai iudiņa golva spruogs. Banalai atkuortuot, bet Latgolys ļaudim nikod nabyus taidu kreditu kai Pīreigā, jī navar ceļt sātys i pierkt dzeivūkļus. Bet, nasaverūt iz tū, ite cylvāki ir patrioti. Es sovulaik asu sacejs, ka mes laikam asam taidi kai idioti.lv, kas mīļoj sovu muolainū zemi. Mums ir skaisti azari, bet zeme nav tik ražeiga, nav leidzonu teirumu, lai vysu appļautu tik dreiži, kai, par pīmāru, Zemgalē. Myus grib pavuiceit, bet nagrib saprast. Tei ir suope, i dzīsme ir tam dūmuota – nalels protests pret situaceju na tik nu Reigys, bet i nu ūtrys pusis,” soka Andris Baltacis.

Juoņa dīnā, 24. junī, 17.15 stuņdēs LTV1 par reizi piec izruodis “Latgola.lv 2” varēs vērtīs dokumentaluos koncertfilmys “Atgriežamies Latgolā. Post scriptum” pyrmizruodi. Filmys režisors i scenareja autors ir Andris Baltacis. Ari itamā kinā dzīsme “Latgalietis ir” byus golvonais motivs. “Nūtikšonys ap dzīsmi saīt kai taids vasals komuļs! Es vaira nadoru tik vīnu lītu, tuos ir vairuokys seceigys darbeibys, kas vīna ūtru papyldynoj i golā roda sova veida spāku. Tai i ar dzīsmi – beja izruodis, raidejums, niu kina. Fiļmiešona nabeja vīgla, deļtuo ka vajadzēja vīnlaiceigi byut kai iz skotivis, tai i redzēt, saprast i likt stuostu kūpā. Maņ cīši patyka tys ciļviecyskais, kū akteri dareja, atmosfera, kū radeja skateituoji i kaidi jī beja! Iz izruodem atguoja mozi, leli, vaci, jauni, cylvāku acīs radzama dzierksts, ka jūs interesej, kas nūteik. Cīši seņ nabeju pats siediejs pi montažys. Nazkurā šaļtī padūmuoju, ka mes turpynuotu taidā gorā i uzturātu izruodi taidā vidē, jei piļneigi varātu leidzynuotīs “Skrūderdīnom Silmačūs”. “Atgriežamies Latgolā” nabeja teiri latgaliska – akteri latgaliski narunuoja, bet mes, muzykanti, bejom latgaliskuo daļa. Daudzim napatyka, ka nabeja tik latgaliski, otkon cytur, puorejā Latvejā, tys ruodejuos saprūtamuoks i vīgluok pījamamuoks. Teatrī iz skotivis tei beja vīna izruode, bet breivdobā nazkas cyts – palyka eistuoka,” stuosta Andris. Jis pīzeist, ka cīši ilgi pats nabeja otkon siediejs pi montažys, bet rezultats dabuots efekts, ka izruodis aina, dialogs salykts nu vairuoku vītu – vīnlaiceigi nūtiks Kandovā, Neretā, Ikškilē voi cytur, pasamaineišūt tik fons.

Atsagrīžūt pi svātdīnis raidejuma “Latvijas Sirdsdziesma” finala, Andris nūsasmej, ka šaļtī, kod nūsaukti finalisti, asūt varējs saceit “Stop!” i paziņuot grupys “Pārnovadnieki” uzvaru. “Grupys “Zelta kniede” Silvestrs, Artis Šimpermanis i es – vysi asam vīnys grupys daleibnīki. Datryuka tik Māra Sluokys! “Latvijas Sirdsdziesmā” itūgod uzvarēja “Pārnovadnieki!”,” smaidūt nūsoka Andris.