Rokstu sagataveja: portals lakuga.lv

26. junī, dīnu pyrma storptautyskuo folklorys festivala “Baltica”, folklorys kūpa “Upīte” aicynoj vysus interesentus iz eipašu koncertu “Kod īt iz balli”, kas nūtiks Āgenskolna tiergā, Reigā, informej pasuokuma organizatori. Koncerts suoksīs 21.00 stuņdē.

Folklorys kūpa “Upīte” viestej, ka vokors byus sadaleits divejuos daļuos. Pyrmajā daļā folklorys kūpa uzastuos ar daudzbaļseigom Zīmeļlatgolys dzīsmem, izceļūt dzīduošonu ar pusbolsu, i tradicionalim daņčim. Koncerta programā īkļautys ari kolhoza laikūs dzīduotuos dzīsmis – tuos kūpa goda garumā apzynuoja i atjaunuoja eipašā projektā, pīduovojūt klauseituojim na tik folklorys montuojumu, bet ari tuo laikmata dzeivis sajiutu. Sovutīs koncerta ūtrajā daļā vysi apmaklātuoji byus aicynuoti īsasaisteit kūpeigūs daņčūs, kur varēs izbaudeit i Upītis pusis daņčus, i kadreļus.

Bolvu nūvoda Namaterialuo kulturys montuojuma centra “Upīte” direktors Andris Slišāns nūruoda: “Asu lapnys i gondareits, ka folklorys kūpa poša nūorganizējuse itū koncertu Āgenskolna tiergā. Pādejūs godūs tei ir na tik aktivai struoduojuse pi jaunu dzīšmu apdaru i videoklipu, tok ari sajāmuse daudzi sirsneigu atsaukšmu i aicynuojumu koncertēt vysaidūs Latvejis regionūs.”

Koncerts Reigā īzeimoj ari plotuokys vosorys i rudiņa koncertturis suokys. “Upīte” itūvosor uzastuos Līpuojā, Ciesīs, Rēzeknē, kai ari uorpus Latvejis – Gruzejā, i turi nūslēgs ar koncertu tuolajā Kostarikā piec Latvejis dzimšonys dīnys.

Folklorys kūpa “Upīte” dybynuota 2002. godā, atteistūt Upītis bārnu folklorys kūpys, kas dybynuota 1980. godā, darbeibu. Da ituo FK “Upīte” ir izdavuse vairuokus albumus: “Vusi ļauds breinovuos”, “Dzīduot muoku, doncuot muoku”, “Ryugts”, “Padzīdam i…”, kai ari digitalū albumu “Kod īt iz balli”. Kūpa aktivai pīsadola vysaidūs Latvejis festivalūs i nu 2016. goda Latveju puorstuov ari vysaidūs storptautyskajūs festivalūs vysā Eiropā – Leitovā, Igaunejā, Pūlejā, Itālejā, Čehejā, Rumanejā, Portugalē, Slovakejā, Fraņcejā, Kosovā, Dīnavydkorejā i Boltkrīvejā.