Rokstu sagataveja: portals lakuga.lv

Apvīneibys “Ausmeņa Records” provokativuo repa muzykys puorstuove Ūga klauseituojim pīduovoj jaunu dzīsmi “Gļāvais suns Drūsminīks”, informej poša muzike. Dzīsme radeita, sasadorbojūt ar muzykys producentu Nikitu Grappu, i īraksteita “Jezupa studejā” Rēzeknē.

Dzīsme rodusēs, izcylojūt dzeivis mozuos, bet daiļuokuos lītys. Ūga klauseituojam atguodynoj par kasdīnys vierteibom, par kuruom sabīdreiba ir damiersuse. Dzīsmē jiutama ironeja, skaidrys redziejums i analize par lītom, kuruos ir saisteitys ar sevkuru: nūgurumu, emocejom, speiteigumu i pastuoviešonu par sovu.

“Kompoziceja roduos, izškatynojūt svareiguokuos lītys, kas pi rūkys kasdīnā. Prūtams, vyss ir pasaceits ironejā. Izcieļu sovu īškejū bārnu i gļāvū suni, kurim tik itaidā veidā varu pasasaceit. Īroksta tapšonā tyka daaicynuoti ari bārni, kurūs jius varit cīši labi kompozicejā dzierdēt. Taidā veidā mes simbolizejam cylvāka patīsumu i maksimalismu. Mudynojam palikt taidim, kaidi asam – cytreiz rūtaleigi, cytreiz nūsabeiduši, puoruok skali i naglobojūt sovu eistū byuteibu i emocejis,” pastreipoj muzike.

Singla nūformiejumā redzim Ūgu ar suni. Jau zynim, ka jai suņu tema nav sveša. Muzikis albumā “Čardaukšu rūtaļa” beja dzīsme “Suņu murgi”. Bet kū jaunajā dzīsmē simbolizej cylvāka lobuokais draugs? “Es poša asu dzymuse suņa godā, varbyut partū maņ itei tema ir cīši tyva sirdei. Konkreti itamā dzīsmē golvonais varūņs ir suņs, kurs simbolizej īškejuos puorlīceibys tryukumu, švuorbys, tautā saucamū gļāvumu, kas kotram nu myusu ik pa laikam traucej sasnēgt mierkus. Tok tymā pošā laikā jis ir Drūsminīks, kam, nasaverūt ni iz kuo, laižās ceiņā i, varbyut ceļā kreitūt, vystik sasnādz sovys īdūmuotuos viersyunis. Singla vuokā asu radzama kūpā ar Latgolys leluokū vylku. Īpasazeistit – juo vuords ir Moriss, ar divejim “s”,” smejās Ūga.

“Dzīsme roduos jau dīzgon seņ. Piec laika atsagrīzem pi īroksta i nūsprīdem, ka tei nūteikti ir juopabeidz. Roduos dūma atsvaidzynuot skaniejumu, kam īprīškejais mani da gola naapmīrynuoja. Pamats beja lobs, atmosfera sasaglobuoja, tok gribiejuos padareit vysu divreiz lānuoku, kab rostūs vaira telpys grūvam, kū Ūga īaude sovūs vuordūs. Jau pyrmajūs sūļūs, struodojūt pi jaunuo pavadejuma, saprotu, ka tys struodoj – vuordi it kai poši suoc doncuot zam jaunuos skaniejuma kuortys. Īvodā i nūbeigumā izsprīžu pamest vacūs fragmentus, kab radeitu kontrastu. Kod pamats beja gotovs, es pīsalāguoju Ūgys radeitajai strukturai,” stuosta muzykys producents Nikita Grapps.

Ūga aktivi dorbojās apvīneibā “Ausmeņa Records” nu 2016. goda. Itūšaļt jei struodoj pi jauna albuma, tok apsūla klauseituojus napamest olkonus, partū dreiži jau var gaideit jaunus singlus. Tyvuokais koncerts, kur kluotīnē dzierdēt Ūgu byus 19. julī muzykys i muokslys festivalā “Muzykys skrytuļs” Leiksnā.