Rokstu sagataveja: portals lakuga.lv

Vakar, 4. julī, vysys dīnys garumā nūtyka XIII Latvejis Školu jaunuotnis dzīšmu i deju svātku koru konkursa finals, kurā pīsadaleja 76 Latvejis izgleiteibys īstuožu lobuokī kori ar 3620 dzīduotuojim četruos kategorejuos: zānu kori, 4.-9. klašu kori, 5.-12. klašu kori i jauktī kori. Apbolvuošonys ceremonejā pasnāgti zalta, sudobra i bronzys diplomi. Zalta diplomu sajēme ari vairuoki Latgolys kori, tymā skaitā Rēzeknis suokumškolys zānu kors “Vokālā iedvesma” i dirigents Juoņs Veličko (Veļičko), kuri vīneigī beja sagatavejuši breivuos izvielis dzīsmi latgaliski. Ceremonejis īrokstu var nūsavērt i ar cytim diplomu sajiemiejim īsapazeit ITE.

Konkursa 1.-3. vītys sajiemiejus nūsauks nūslāguma koncerta “Te-aust” generalmieginuojumā 12. julī, bet Leluos bolvys īgiviejs tiks paziņuots nūslāguma koncertā.

Zānu kors “Vokālā iedvesma” uzastuoja Reigys Latvīšu bīdreibys noma Zalta zālē i izpiļdeja treis dzīsmis: Jāņa Stībeļa “Upi”, Laurys Jēkabsonis “Daiļu dziesmu es dziedāju” ar latvīšu tautysdzīsmis vuordim i Guntrys Kuzminys-Juknys tautysdzīsmis apdari “Vardeite”. Kora dirigents ir Juoņs Veličko, bet koncertmeistars – Kaspars Bačkurs. Vyss ūtruos dalis finala īroksts ITE.

“Mes ar Juoni asam kolegi MIKC Latgolys Muzykys i muokslys vydsškolā. Vīnu dīnu jis pavaicuoja, voi maņ nav kaidys dzīsmis, kas īsadarātu juo kora konkursu repertuarā. Es kai reize beju škūrstejuse dzīšmu gruomotu i taišni pi dzīsmis “Iz vacuo okas sukruma” nazkod beju īlykuse atzeimi, dūmojūt, ka grybātu tai izveiduot apdari. Kai soka – kotrai dzīsmei ir sovs laiks. Ari “Vardeite” (kai vāluok nūsauču apdari) varēja suokt sovu muzykalū ceļu pi kolektivu. Lela prīca par Juoņa entuziasmu i zānu kora myrdzūšajom acim. Beju ari kaidā mieginuojumā i, vārojūt konkursa gaitu, varu saceit, ka puiši eistyn izacēle konkursantu vydā. Taipat dūmoju, ka vysa pamotā beja latgaliskuo identitāte. Tai pa eistam i nu sirds,” tai tautysdzīsmis apdaris autore Guntra Kuzmina-Jukna.

“Daleiba koru karūs beja lels gūds i reizē ari izaicynuojums. Vysleluokuo prīca maņ beja puišu acīs redzēt sajiusmu, entuziasmu i eistu atdevi vysā procesā – nu pyrmūs mieginuojumu da uzastuošonys šaļts iz skotivis. Eipaši nūzeimeiga beja šaļts, kod dzīduojom Guntrys Kuzminys-Juknys aranžiejumu “Vardeite” latgaliski. Tys beja myusu cīnis i lapnuma aplīcynuojums kai sovam regionam, tai latgaliskajai identitatei. “Vardeite” uzrunuoja na tik mani kai dirigentu – tei palyka par vīnu nu puišu meiluokūs dzīšmu. Jī tū dzīd ar eistu prīcu, puorlīceibu i īškejū dzierksti, kas vysod aizraun ari klauseituojus. Es asu cīši pateiceigs Guntrai par sadarbeibu, rodūšū uzticeibu i sirsneigū atbolstu. Klauseituoji ari sajuta ituos dzīsmis eipašū spāku – tei skanēja dzeiva, patīsa i ar lelu emocionalu pīsuotynuojumu. Asu lapnys par puišu dorbu, iztureibu i lelū motivaceju. Tok sajimtais zalta diploms ir šmuks aplīcynuojums tam, ka Latgola skaņ – cīši, skaneigi i nu sirds,” tai dirigents Juoņs Veličko par sajimtū apbolvuojumu i daleibu konkursā.

Šudiņ, 5. julī, īsasuoc i da 13. juļa Reigā nūtiks XIII Latvejis Školu jaunuotnis dzīšmu i deju svātki. Tī puļcēs vaira nakai 38 000 koru i vokalūs ansambļa dzīduotuoju, tautys i myusu dīnu deju doncuotuoju, muzykantu i cytu muokslinīcyskūs kolektivu dalinīku nu Latvejis i diasporys. Tys ir leluokais daleibnīku skaits naatkareiguos Latvejis laikā. Nu Latgolys svātkūs pīsadaleis 240 kolektivu. Svātku programā byus vaira nakai 30 pasuokumu, tymā skaitā ari vairuoki bezmoksys pasuokumi, kurim varēs sekuot leidza na tik kluotīnē, tok ari tīšraidēs Latvejis Televizejā, Latvejis Radejā, portalūs LSM.lv i REplay.lv.