Rokstu sagataveja: portals lakuga.lv

Bīdreiba “Latgolys Turysma asociaceja” aicynoj dasaceit pretendentus Latgolys Turysma goda bolvai 2025. Tū var dareit kai uzjāmums, tai privatpersona, NVO i cyti. Latgolys Turysma goda bolvys pretendentu dasaceišona ir veids, kai izceļt regiona turysma vītys i tūs puorstuovus, kuri sovā pakolpuojumā īnasuši inovacejis, byutiski papyldynuojuši asūšū pīduovuojumu voi vīnkuorši pamatuši palīkūšu pozitivu īspaidu.

Latgolys Turysma godu bolvu jau dasmytū godu piec kuortys organizej bīdreiba “Latgolys Turysma asociaceja”. Bolvys mierkis ir veicynuot Latgolys turysma pīduovuojuma i kvalitatis uzalobuošonu, taipoš ari izceļt i apbolvuot Latgolys regiona (tymā vydā ari kulturviesturyskūs zemu) lobuokūs turysma nūzaris puorstuovus. Goda bolva teik padūta deveņuos nominacejuos, bolvys pretendentus izviertej goda bolvys komiseja, kurys sastuovā ir Latgolys turysma nūzaris specialisti, īprīškejī goda bolvys sajiemieji i Latvejis mārūga turysma specialisti. Ar goda bolvys nūlykumu var īpasazeit ITE. Sovpus pretendentu viertiešonys kritereji daīmami ITE.

“Vīns nu Latgolys Turysma bolvys mierkim ir motivēt regiona turysma pakolpuojumu snīdziejus īt iz atteisteibu. Turysmys ir regionam svareiga nūzare, i mes asam piļneigi puorlīcynuoti, ka Latgolā ir daudz izcylu saiminīku i turysma vītu, kuri ir peļnejuši sajimt atzineibu i pateiceibu par īguļdeitū dorbu, deļtam aicynojam byut aktivim pretendentu dasaceišonā i nasabeit pasalapnuot pošim ar sevi i sovim sābrim,” doluos “Latgolys Turysma asociacejis” turysma koordinatore Laura Spundere.

Goda bolva teik padūta deveņuos nominacejuos:

1. Turysma profesionaļs (padūd Turysma informacejis centram voi individualam komersantam – gidam, žurnalistam, blogeram/vlogeram i cytim);
2. Lobuokuo turystu palikšonys vīta piļsātā;
3. Lobuokuo turystu palikšonys vīta laukūs;
4. Lobuokais jaunais privatais turysma objekts (padūd turysma objektam, kurs ir sataiseits pādejūs diveju godu laikā);
5. Lobuokais jaunais pošvaļdeibu turysma objekts (padūd turysma objektam, kurs ir sataiseits pādejūs diveju godu laikā);
6. Lobuokais privatais turysma objekts (padūd kvalitati pīruodejušam turysma objektam naatkareigi nu juo izveidis goda);
7. Lobuokais pošvaļdeibu turysma objekts (padūd kvalitati pīruodejušam turysma objektam naatkareigi nu juo izveidis goda);
8. Goda amatnīks/muojražuotuojs/uzjiemiejs;
9. Turysma izcileiba (padūd turysma jūmys profesionaļam, kas devs vārā jamamu īguļdejumu sova regiona ci vysys Latgolys turysma jūmys atteisteibā).

Pretendentus var dasaceit da 6. novembra, aizpyldūt tīšsaistis anketu ITE. Bolvu padūšona nūtiks piec kasgadejuos Latgolys Turysma konferencis ituo gods 12. decembrī Latgolys viestnīceibā “Gors”.