Dzejūļu autors: Raibīs

Pīduovuojam literata Raibuo dzejūļu kūpu nu tūpūšuo kruojuma “Vysi vuordi”. Raibīs, kai jau daudzmuokslinīks, niule vaira aizaraun ar komiksa “Daugavpils bebri” radeišonu i zeimiešonu. Tys apsaverams i juo Facebook lopā i “Daugavpils bebru” Instagram kontā. Raibīs ari viestej, ka 5. novembrī Igaunejā, Tartu Universitatis Svešvolūdu i kulturu instituta vestibilā, Lossi īlā 3, 18.00 stuņdēs nūtiks juo dzejūļu i zeimiejumu izstuodis “Rīsi & šprotes” atkluošona.

***

vysi muni izgleiteibys diplomi
rozlykti vīnā aileitē
kai ūlys kasteitē
kai Boņuku bataļjons kurais verās iz sauli
kai školys i augstškolys atzineibys roksti
kurī červelētīs jau suokuši
grūzuos i spīgeļojās cyts pret cytu
verīs cik es šmuks cik es gluds
kai dāmu epilātuos kuojis
kai jauna sistema lordu palatuos
putekļu vazumi kraunās iz jūs kamīšim i spīž
tūs nazkod nūtrauks svieteigys rūkys pavasara vīneigajā tolkā par godu
kruoj jī putekļus i soka iz jim
kreitit kreitit mes varim izturēt vēļ vaira mes asam izgruzejuši na
vīnu viņ sapresāta sīna vazumu
šaļtim es pats
guodeigi nūtraušu putekļus nu jūs
nu tuos ryndys pajamu kuru maņ tūlaik vāga
aiznasu oi nā
aizsyutu škārsteiklā
tympus čuksta čūksta golā apsaver iz juo…
vysdreižuok ka naapsaver iz juo
nūsakaunej poši i naatsoka maņ nikuo
īeimu azartā
jemu nuokamū buorineiti ailē pa kreisi
nūtraucu jam osorys
kuš kuš itūreiz vyss byus labi
nā tu tai saceji jau paguojušajā reizē i saguoja čiks
jis spīdz i kuorpejās maņ nūst nu rūku
nu… nikas nikas
i buožu jū iudiņa spanī
buļ, buļ
buļ..
vyss ir labi vyss ir teicami i nūžālojami
kai draugu pīsmīšona sev par lobu
vyss tūmār garšoj lobuok kam nav nikaidys puorlīku
akademiskys voi puorlīku tradicionalys pīgaršys

***

sasīti krysti čupuleišus
par četrim
sasprausti kuozu studiņūs
kas juļa saulē vēļ nav izalaiduši
sažņaugti vaiņugi
kur saprūti ka dyžanums nav izmārojams
klīdzūt aizslāgtā pogrobā
tok ir svareigs
viņ vyspasauļa
šyzanutais nūgurums aizamierss
leidza ar sovejuo ignoriešonu
natīsoj i tu natiksi tīsuots
raksteits iz turysma objekta pīrūbeža kopūs
i itūreiz vaicuojums nav par tū
cik pareizi gramatiski ir dūta atbiļde genitivā

***

tu man labs
kad
tu man
labs

***

ir dūta atļuove
i mes vysā augumā varim laist jūkus
par
vīntuleigim cylvākim kas poši asam
ka ari daudzskaitlim ir bārni
ka eistineibā tev ir viņ treis lobi draugi
i tys ir viņ tod kod vīnu nu jim redzi puorjiuru kinuos
ļauds kuri izauguši pūra molā voi laukūs
naīsader apkaimju kopienās
mudri viņ nūsluopst sovuos golda spieļu spieļu gammuos
īzī masti
pīzī samasti
ar taidu signalu maņ atīt sābrineicys sms
tavā mašīnā jau nedēļu dzīvo un kopojas bomži
man roka neceļas to visu nodedzināt
mienesi naasu sātā koč dzeivoju tīpoš
tai var byut tai var byut
jo mienesi maņ mašine stuov naaizslāgta
koč varbyut tys deļtam
ka es grybātu tū skotu redzēt kai aizadag vysaidys ellis i kardani
nabyus jau pyrmūreiz sajust smuordus nu bierneibys
kai piec signala litanejis pavadeibā
Biruta podraun spičku
koč i pikseļu kvalitate loba
es pīsaturu pi tāvu vuiceibu
ka dzierdēt i zynuot ite ir divys dažaidys lītys

***

Latviešu īstā dzīvesziņa un
nacionālā vērtība ir
vardarbība.

***

kū vajadzē’ tū puorrunuom
kū navajadzē’ tū narunuom
taipoš dzeivuos tāvi bez tāvim
muotis bez muotem
tāvi bez muotem
muotis bez tāvim
aizkūrtī ustobys širmeiši
napaleidz īekonomēt iz apkuris riekinim
i sābru attīceibom
kai kotrā vosorys rudinī tu gribi
nūmainēt cytu piļsātu
ar nūgramdātu budžetu
i kaijom aiz lūga kuruos nu reitim čārc
CELĪS CELĪS
tu myusu kebabu radeja
izbaroj myusim tovūs smedziņūs izkoltušuos garumzeimis
ka nā tu namiersi nikod
maņ ruodīs ka tys ir tragikomiskuokais grāks
nanūmiert nikod i sabyut par pādejū duraku
voi rokstāram pieški palikt par šlāgeristu
i spēlēt rūženis vysūs pasuokumūs kas moksoj viņ naudu
o je
na zam lobu koza pard
tok kū padareisi
šudiņ komplimenti reit alimenti
a alimenti koč kai jau juomoksoj

***

Runoj ar munu ūtrū meitu.
Tei normaļnuo.
Love is.

***

nivīns nazyna
kai atraiseit tuos minys
ar spruogstūšim čukstim

nivīns nazyna
kai atraiseit sevī zaltu
ka viņ tys
jau nav puordūts